Salmos 66

संगीत निरदेसक बर। एक गीत। एक भजन।

1 हे जम्मो धरती के मनखेमन, परमेसर बर आनंद के जय-जयकार करव!

2 ओकर नांव के महिमा के गीत गावव;

महिमा के संग ओकर परसंसा करव।

3 परमेसर ला कहव, "का ही अद्भूत अंय तोर काममन!

तोर सामर्थ ह अइसे महान हे

कि तोर बईरीमन तोर आघू म चापलूसी करथें।

4 जम्मो धरती के मनखेमन तोर दंडवत करथें;

ओमन तोर परसंसा के गीत गाथें,

ओमन तोर नांव के परसंसा के गीत गाथें।"

5 आवव अऊ देखव कि परमेसर ह का करे हवय,

मानव-जाति बर ओकर अद्भूत काममन!

6 ओह समुंदर ला सूखा भुइयां कर दीस,

ओमन पैदल नदी के ओ पार चल दीन—

आवव, ओमा आनंदित होवव।

7 ओह अपन सामर्थ ले सदाकाल बर सासन करथे,

ओकर आंखीमन जाति-जाति के मनखेमन ला देखत रहिथें—

ओकर बिरूध बिदरोहीमन झन ठाढ़ होवंय।

8 हे जम्मो मनखेमन, हमर परमेसर के परसंसा करव,

ओकर परसंसा के अवाज सुनई देवय;

9 ओह हमर जिनगी ला बचाय हवय

अऊ हमर गोड़ ला फिसल जाय ले बचाय हवय।

10 हे परमेसर, तेंह हमन ला परखे हस;

तेंह हमन ला चांदी के सहीं साफ करे हस।

11 तेंह हमन ला जेल म ले आय

अऊ हमर पीठ म बोझा डार देय।

12 तेंह मनखेमन ला हमर मुड़ ऊपर सवारी करे बर दे हस;

हमन आगी अऊ पानी म ले होके गे हवन,

पर तेंह हमन ला ओ जगह म ले आय, जिहां चीजमन बहुंतायत म हवंय।

13 मेंह तोर मंदिर म होम-बलिदान लेके आहूं

अऊ तोर बर माने गय अपन मन्नतमन ला पूरा करहूं—

14 ओ मन्नत, जेकर परतिगियां मेंह अपन ओंठ ले करे रहंय अऊ अपन मुहूं ले माने रहंय

जब मेंह समस्या म पड़े रहंय।

15 मेंह तोला मोटा-ताजा पसु

अऊ मेढ़ामन के बलिदान चघाहूं;

मेंह तोला सांड़ अऊ बोकरा चघाहूं।

16 ओ जम्मो झन, जऊन मन परमेसर के भय मानथव, आवव अऊ सुनव;

मेंह तुमन ला बतावत हंव कि ओह मोर बर का करे हवय।

17 मेंह अपन मुहूं ले ओला पुकारेंव;

मोर ओंठ ले ओकर परसंसा करेंव।

18 कहूं मेंह अपन मन म पाप करे होतेंव,

त परभू ह मोर बात ला नइं सुनतिस;

19 पर खचित परमेसर ह धियान दे हवय

अऊ मोर पराथना ला सुने हवय।

20 परमेसर के परसंसा होवय,

जऊन ह मोर पराथना ला सुनिस

या अपन मया ला मोर ऊपर ले नइं हटाईस!