Salmos 92

एक भजन। बिसराम दिन बर एक गीत।

1 यहोवा के परसंसा करई

अऊ हे सर्वोच्च परमेसर, तोर नांव म बाजा बजई बने बात ए,

2 बिहनियां तोर मया

अऊ रथिया तोर बिसवासयोग्यता के घोसना करई,

3 दस तारवाला बाजा

अऊ बीना के सुघर राग बजई बने बात ए।

4 काबरकि हे यहोवा, तेंह अपन काम के दुवारा मोला खुस कर देथस;

तोर करे गय काम के कारन मेंह आनंद के गीत गाथंव।

5 हे यहोवा, तोर काममन कतेक बड़े हवंय,

तोर बिचारमन कतेक गंभीर हवंय!

6 अगियानी मनखे येला नइं जानंय,

मुरूखमन येला नइं समझंय,

7 हालाकि दुस्ट मनखे कांदी के सहीं निकलथें

अऊ जम्मो दुस्ट काम करइयामन उन्नति करथें,

पर ओमन हमेसा बर नास हो जाहीं।

8 पर हे यहोवा, तोर सदा-सर्वदा बड़ई होथे।

9 काबरकि हे यहोवा, खचित तोर बईरीमन,

खचित तोर बईरीमन नास हो जाहीं;

जम्मो दुस्ट काम करइयामन तितिर-बितिर हो जाहीं।

10 तेंह मोर सींग*92:10 सींग ह इहां ताकत के प्रतीक अय ला जंगली सांड़ के सहीं ऊंच करे हस;

सुघर तेल ह मोर ऊपर रितोय गे हवय।

11 मोर आंखी ह मोर बईरीमन के पराजय ला देखे हवय,

मोर कान ह मोर दुस्ट बईरीमन के कोलाहल ला सुने हवय।

12 धरमी मनखे ह खजूर के रूख सहीं फूलही-फरही,

ओमन लबानोन के देवदार सहीं बढ़हीं;

13 यहोवा के घर म रोपे जाके,

ओमन हमर परमेसर के अंगना म फूलहीं-फरहीं।

14 ओमन बहुंत उमर होय के बाद घलो फर दीहीं,

ओमन तरो-ताजा अऊ हरियर रहिहीं,

15 अऊ ये घोसना करहीं, "यहोवा ह नियायी अय;

ओह मोर चट्टान ए, अऊ ओमा कोनो दुस्टता नइं ए।"