Lucas 8

27 Yesu avaga kwika mu mutumbwi, akamufikaje munu yumwe munya lisoka. Kwa siku ntsolofu munu uyo siafwalaga myenda, na saikalaga mu nyumba lechelelo ikalaga kogali makabuli. 28 Munu uyo avaga kumuwona Yesu, akitotsaje halutalo ha Yesu na kukola fikami, "Un’gana undite chichi heve Yesu mwana va Mulungu yoali kilanga ndalahela? Ntsingusuka uleche kunetsa!" 29 Kwasawuli Yesu avaga aling’anulye lisoka lila lihume mugati mwa munu yula. Lisoka ilyo lyamutovaga lwahihyo, na hala ho vamuwopaga kwa pingu mu mawoko na nyololo mu magulu na kumwamila. Lechelelo mwene adumulaga pingu tsila na nyololo na kubilimila ku mbuga. 30 Yesu akamuputsaje, "Heve litawa lyako nani?" Likamujibulaje, "Litawa lyangu, Hetwe tulililugu," alontsile ihyo kwasawuli avaga na misoka myolofu. 31 Misoka jila jikamugongoletsaje Yesu aleche kujisindika kulyowo likomi. 32 Hono iho havaga na chipinga chikomi cha migubi cho chadimwaga mulubali lwa chidunda. Duve, misoka ijo jikamugongoletsaje ajileche jinjile mu migubi jila. Nayo Yesu akajidikitsaje. 33 Ho ihyo misoka jila jikamuhumaje munu yula, jikinjilaje mu migubi jila, chipinga cheka chikikaje luvilo mulwisa na kwinjila mu bahali jikafwaje. 34 Vala vadimi vavaga kuwona chila chochihumye vakabilimaje, vakabitaje kuvalonjela vanu wovali ku mujini na ku fijiji. 35 Vanu vakatsaje kulola chila chochihumye. Hovaveye kufika hoali Yesu, vakamuwonaje munu yula yo ahumitswe misoka ikalise habehi na Yesu, afwite myenda na aponile, vanu vala vakavaje na muloto ndalahela.