1 ಜೆರುಜಲೆಮಾಚೊ ರಾಜಾ ಅದೊನಿಚೆದೆಕಾನ್ ಜೊಶ್ವಾನ್ ಜೆರಿಕೊ ಅನಿ ತೆಚ್ಯಾ ರಾಜಾಕ್ನಿ ಕರಲ್ಲ್ಯಾ ಸಾರ್ಕೆ, ಆಯಿ ಮನ್ತಲೆ ಶಾರ್ ಅನಿ ಥೈತ್ಲ್ಯಾ ರಾಜಾಂಚೊ ಜಿವ್ ಕಾಡ್ಲ್ಯಾನ್ ಮನ್ತಲಿ ಖಬರ್ ಅನಿ ಗಿಬ್ಬೆಯಾನಿ ಇಜ್ರಾಯೆಲಾಂಚ್ಯಾ ಮದ್ದಿ ಝಿತ್ತೆರಾವ್ಕ್ ಮನುನ್, ಕರಾರ್ ಕರುನ್ ಘೆಟ್ಲ್ಯಾನಿ, ಮನ್ತಲಿ ಖಬರ್ ಆಯ್ಕುನ್, 2 ಆಯಿ ಮನ್ತಲ್ಯಾ ಶಾರಾಕಿಂತಾ ಎಕ್ ರಾಜಧಾನಿ ತವ್ಡೆ ಮೊಟೆ ಗಿಬ್ಬೆಯ್ ಶಾರ್ ಅನಿ ಥೈತ್ಲಿ ಲೊಕಾ ಅಪ್ನಿ ಲಡಾಯಿತ್ ಶ್ರೆಸ್ಟ್ ಹೊತ್ತಿ, ಜಾಲ್ಯಾರ್ಬಿ ತೆಂಕಾ ಅಸೆ ಹೊಲ್ಲೆ ಹೆ ಆಯ್ಕುನ್ ಭಿಂಯಾಲ್ಯಾನ್. 3 ಅದೊನಿಚೆದೆಕಾನ್ ಹೆಬ್ರೊನಾಚೊ ರಾಜಾ ಹೊಹಾಮ್, ಜಮುರ್ತಿಚೊ ರಾಜಾ ಪಿರಾಮ್, ಲಾಕಿಶಿಚೊ ರಾಜಾ ಜಾಫಿಯ್, ಎಗ್ಲೊನಿಚೊ ರಾಜಾ ದೆಬಿರ್ ಹೆಂಚ್ಯಾಕ್ಡೆ ಖಬರ್ ಧಾಡುನ್, 4 ಅಮಿ ಇಜ್ರಾಯೆಲಾಂಚ್ಯಾ ಅನಿ ಜೊಶ್ವಾಚ್ಯಾ ವಾಂಗ್ಡಾ ಕರಾರ್ ಕರುನ್ಗೆಟಲ್ಲ್ಯಾ, ಗಿಬ್ಬೆಯಾಕ್ನಿ ಹಾರ್ವುಂವಾ ತುಮಿ ಯೆವ್ನ್ ಅಮ್ಕಾ ಮಜತ್ ಕರಾ ಮಟ್ಲ್ಯಾನ್. 5 ತನ್ನಾ ಜೆರುಜಲೆಮ್, ಹೆಬ್ರೊನ್, ಜಮುರ್ತ್ ಲಾಕಿಶ್, ಎಗ್ಲೊನ್ ಮನ್ತಲ್ಯಾ ಪಾಂಚ್ ಶಾರಾಂಚೆ ರಾಜಾ ತಯಾರ್ ಹೊವ್ನ್ ಗಿಬ್ಬೆಯಾಕ್ ಘೆರೊ ಘಾಲುನ್ ಆಕ್ರಮನ್ ಕರ್ಲ್ಯಾನಿ. 6 ಗಿಬ್ಬೆಯಾಚ್ಯಾನಿ ಗಿಲ್ಗಾಲಿತ್ ಹೊತ್ತ್ಯಾ ಜೊಶ್ವಾಕ್ಡೆ ದುತಾಕ್ನಿ ಧಾಡುನ್ "ತುಮ್ಚಿ ಸೆವಕಾ, ಅಮ್ಕಾ ಹಾತ್ ಸೊಡಿನಸ್ತಾನಾ, ಲಗ್ಗುನಾ ಯೆವ್ನ್, ಮಜತ್ ಕರಾ, ಅಮ್ಚ್ಯಾ ವಿರೊಧ್ ಯೆಲ್ಲ್ಯಾ ಹ್ಯಾ ಮಡ್ಡಿವೈಲ್ಯಾ ಅಮೊರಿತಾಂಚ್ಯಾ ರಾಜಾಂಚ್ಯಾಕ್ನಾ ಅಮ್ಕಾ ಸೊಡ್ಸುನ್ ಘೆವಾ" ಮನುನ್ ಮಾಗುನ್ ಘೆಟ್ಲ್ಯಾನಿ. 7 ತನ್ನಾ ಜೊಶ್ವಾ ಸಗ್ಳ್ಯಾ ಸೈನ್ಯಾಚ್ಯಾ ಅನಿ ಬರ್ಯಾ ಲಡಾಯಿಕ್ ತಯಾರ್ ಹೊತ್ತ್ಯಾಂಚ್ಯಾ ವಾಂಗ್ಡಾ ಗಿಲ್ಗಾಲಿಕ್ನಾ ಜಾವ್ಕ್ ಲಾಗ್ಲೊ. 8 ಸರ್ವೆಸ್ಪರಾನ್ ಜೊಶ್ವಾಕ್, ತೆಂಕಾ ಭಿಂವ್ ನಕ್ಕೊ, ಮಿಯಾ ತೆಂಕಾ ತುಜ್ಯಾ ಹಾತಿತ್ ದಿಲಾ, ತೆಂಚಾತ್ಲೊ ಎಕ್ಲೊಬಿ ತುಜ್ಯಾ ಇದ್ರಾಕ್ ಇಬೆ ರ್‍ಹಾಯ್ನಾ, ಮಟ್ಲ್ಯಾನ್. 9 ಜೊಶ್ವಾನ್ ಗಿಲ್ಗಾಲ್ ಸೊಡುನ್ ಸಗ್ಳಿ ರ್‍ಹಾತ್ ಪರ್ಯಾನ್ ಕರುನ್ ಲಗ್ಗುನಾ ಜಾವ್ನ್ ತೆಂಚ್ಯಾ ವರ್‍ತಿ ಎಗ್ದಮ್ ಆಕ್ರಮನ್ ಕರ್ಲ್ಯಾನಿ. 10 ಸರ್ವೆಸ್ಪರಾನ್ ಅಮೊರಿತಾತ್ನಿ ಇಜ್ರಾಯೆಲಾಂಚ್ಯಾ ಇದ್ರಾಕ್ ಘಾಬ್ರಿ ಸಾರ್ಕೆ ಕರಲ್ಲ್ಯಾ ಸಾಟ್ನಿ, ಜೊಶ್ವಾನ್ ತೆಂಕಾ ಗಿಬ್ಬೆಯಾಚ್ಯಾ ಜಗ್ಗೊಳ್ ಹಾರ್ವುನ್ ಬೆತ್ ಹೊರೊನ್ ಮನ್ತಲ್ಯಾ ಮಡ್ಡಿಚ್ಯಾ ವಾಟೆ ವರ್‍ತಿ ಅಜೆಕ್ ಅನಿ ಮಕ್ಕದ್ ಮನ್ತಲ್ಯಾ ಗಾವಾಂಚ್ಯಾ ಪತರ್ಬಿ ಫಾಟ್ ಲಾಗುನ್ ನಾಶ್ ಕರ್ಲ್ಯಾನ್. 11 ತೆನಿ ಇಜ್ರಾಯೆಲ್‌ಕಾರಾಕ್ನಿ ಫಾಟ್ ದಾಕ್ವುನ್ ಬೆತ್ ಹಾರೊನಿಚ್ಯಾ ಉತ್ತರಾಚ್ಯಾ ಜಾಗ್ಯಾವರ್‍ತಿ ಪಳುನ್ಗೆತ್ ಅಜೆಕಾಕ್ ಪಾವಿ ಪತರ್ಬಿ ಸರ್ವೆಸ್ಪರಾನ್ ಮಳ್ಬಾಕ್ನಾ ತೆಂಚ್ಯಾ ವರ್‍ತಿ ಹಿಮ ಗಡ್ಡೆ ಗುಂಡ್ಯಾಂಚೊ ಪಾವ್ಸ್ ಪಾಡ್ವುಲ್ಯಾನ್, ಹ್ಯಾ ಕಾರನಾನ್ ಲೈ ಲೊಕಾ ಮರ್ಲಿ, ಇಜ್ರಾಯೆಲಾಚ್ಯಾ ಕೊಯ್ತ್ಯಾನಿ ಮರಲ್ಲ್ಯಾಕಿಂತಾಬಿ ಗುಂಡ್ಯಾಚ್ಯಾ ಪಾವ್ಸಾನಿ ಜಾಸ್ತಿ ಲೊಕಾ ಮರ್ಲಿ. 12 ಸರ್ವೆಸ್ಪರಾನ್ ಅಮೊರಿತಾಕ್ನಿ ಇಜ್ರಾಯೆಲಾಚ್ಯಾ ಹಾತಿತ್ ದಿಲ್ಲ್ಯಾ ದಿಸಿ ಜೊಶ್ವಾನ್, ಸರ್ವೆಸ್ಪರಾಕ್ಡೆ ಎಕ್ ಮಾಗ್ನಿ ಕರುನ್, ದಿಸಾ ತಿಯಾ ಗಿಬ್ಬೆಯಾತುಚ್ ಇಬೆರಾ, ಚಂದಾಮ್ ತಿಯಾ ಅಯ್ಯಾಲೊನ್ ಕೊಳ್ಳಾತುಚ್ ಇಬೆರಾ, ಮನುನ್ ಇಜ್ರಾಯೆಲ್ ಲೊಕಾಂಚ್ಯಾ ಇದ್ರಾಕುಚ್ ಹುಕುಮ್ ದಿಲ್ಯಾನ್. 13 ಇಜ್ರಾಯೆಲ್ ಲೊಕಾನಿ ದುಶ್ಮನಾಕ್ನಿ ಹಾರ್ವಿ ಪತರ್ ದಿಸ್ ಅನಿ ಚಂದಾಮ್ ತಸೆಚ್ ಇಬೆರ್‍ಹಾಲೆ, ಹಿ ಗೊಸ್ಟ್ ಯಾಶಾರ್ ಪುಸ್ತಕಾತ್ ಲಿವಲ್ಲೆ ಹಾಯ್ ನ್ಹಯ್, ಅಸೆ ದಿಸ್ ಬುಡುಕ್ ಗಡ್ಬಡಿ ನಸ್ತಾನಾ ಲೈ ಕರುನ್ ಫುರಾ ಎಕ್ ದಿಸ್ ಮಳ್ಬಾತ್ ಮದ್ದಿ ಇಬೆ ಹೊತ್ತೊ. 14 ಸರ್ವೆಸ್ಪರಾನ್ ಎಕ್ ಮಾನ್ಸಾಚ್ಯಾ ಗೊಸ್ಟಿ ಸಾರ್ಕೆ ಕರಲ್ಲೊ ದಿಸ್ ಹೆಜ್ಯಾನ್ ಫಾಟಿಬಿ ನಾ, ಅನಿ ಫಿಡೆಬಿ ಯೆಯ್ನಾ ಸರ್ವೆಸ್ಪರ್ ಅಪ್ನಿಚ್ ಇಜ್ರಾಯೆಲಾಂಚ್ಯಾ ಸಾಟ್ನಿ ಲಡಾಯ್ ಕರಿತ್ ಹೊತ್ತೊ. 15 ತೆಜ್ಯಾ ಮಾನಾ ಜೊಶ್ವಾ ಇಜ್ರಾಯೆಲ್‌ಕಾರಾಕ್ನಿ ಘೆವ್ನ್ ಗಿಲ್ಗಾಚ್ಯಾ ಬಿಡಾರಾಕ್ನಿ ಪರ್‍ತುನ್ ಯೆತಾ.

16 ತೆ ಪಾಂಚ್ ರಾಜಾ ಪಳುನ್ ಜಾವ್ನ್ ಮಕ್ಕದಾಚ್ಯಾ ಡೊಂಬಾತ್ ನಿಪ್ಲ್ಯಾನಿ. 17 ತನ್ನಾ ಲೊಕಾನಿ ಜೊಶ್ವಾಕ್, ಅನಿ ಪಾಂಚ್ ಲೊಕಾ ಅಮ್ಕಾ ಗಾವ್ಲ್ಯಾತ್, ತೆನಿ ಮಕ್ಕದಾಚ್ಯಾ ಡೊಂಬಾತ್ ನಿಪ್ಲ್ಯಾತ್ ಮಟ್ಲ್ಯಾನಿ. 18 ತನ್ನಾ ಜೊಶ್ವಾನ್ ತೆಂಕಾ ತ್ಯಾ ಡೊಂಬಾಚ್ಯಾ ತೊಂಡಾಕ್ ಮೊಟ್ಟೊ ಗುಂಡೊ ಲಾವ್ನ್, ಥೈ ರಾಕ್ವಲ್ಯಾಕ್ನಿ ಥವಾ. 19 ತೆಂಕಾ ಶಾರ್‍ಹಾತ್ ಗುಸುಕ್ ದಿವ್ ನಕಾಸಿ, ತುಮ್ಚ್ಯಾ ಸರ್ವೆಸ್ಪರ್ ದೆವಾನ್ ತೆಂಕಾ ತುಮ್ಚ್ಯಾ ಹಾತಿತ್ ದಿಲಾ ನ್ಹಯ್, ಮಟ್ಲ್ಯಾನ್. 20 ಅಸೆ ಜೊಶ್ವಾನ್ ಅನಿ ಇಜ್ರಾಯೆಲ್ ಲೊಕಾನಿ ತೆಂಕಾ ಪುರಾ ಹಾರ್ವುಲ್ಯಾನಿ, ಖರೆ ಉಲ್ಲಿ ಲೊಕಾ ಚುಕ್ವುನ್ ಘೆವ್ನ್ ಕೊಟೆ ಹೊತ್ಯಾ ಶಾರ್‍ಹಾತ್ನಿ ಗುಸ್ಲ್ಯಾನಿ. 21 ಇಜ್ರಾಯೆಲ್ ಲೊಕಾ ಮಕ್ಕದಾತ್ ಹೊತ್ತ್ಯಾ ಜೊಶ್ವಾಕ್ಡೆ ಆರಾಮಾನ್ ಯೆಲ್ಯಾನಿ, ಇಜ್ರಾಯೆಲ್‌ಕಾರಾಕ್ನಿ ವಿರೊಧ್ ಹೊವ್ನ್ ಕೊನ್ಬಿ ಬೊಲುಕ್ನಾತ್. 22 ಮಾನಾ ಜೊಶ್ವಾನ್ ಡೊಂಬಾಚೆ ತೊಂಡ್ ಉಗ್ಡುನ್ ತ್ಯಾ ಪಾಂಚ್ ರಾಜಾಕ್ನಿ ಮಾಜೆಕ್ಡೆ ಹಾನಾ ಮಟ್ಲ್ಯಾನ್. 23 ತೆನಿ ಜಾವ್ನ್ ಜೆರುಜಲೆಮ್, ಹೆಬ್ರೊನ್, ಜಮುರ್ತ್, ಲಾಕಿಶ್ ಅನಿ ಎಗ್ಲೊನ್, ಮನ್ತಲ್ಯಾ ಶಾರಾಂಚ್ಯಾ ಪಾಂಚ್ ರಾಜಾಕ್ನಿ ಡೊಂಬಾತ್ನಾ ವಡುನ್ಗೆವ್ನ್ ತೆಚ್ಯಾ ಜಗ್ಗೊಳ್ ಹಾನ್ಲ್ಯಾನಿ. 24 ತೆಂಕಾ ಅಪ್ನಾಚ್ಯಾ ಜಗ್ಗೊಳ್ ಹಾನ್ಲ್ಯಾ ಮಾನಾ ಜೊಶ್ವಾನ್ ಸಗ್ಳ್ಯಾ ಇಜ್ರಾಯೆಲ್ ಲೊಕಾಕ್ನಿ ಬಲ್ವುಕ್ ಲಾವ್ನ್, ಅಪ್ನಾಚ್ಯಾ ವಾಂಗ್ಡಾ ಯೆಲ್ಲ್ಯಾ ಸೈನ್ಯಾಚ್ಯಾ ಅಧಿಕಾರಿಯಾಕ್ನಿ, ಜಗ್ಗೊಳ್ ಯೆವ್ನ್ ಹ್ಯಾ ರಾಜಾಂಚ್ಯಾ ಗಳ್ಯಾ ವೈನಿ ಪಾಂಯಾ ಥವಾ ಮಟ್ಲ್ಯಾನ್, ತನ್ನಾ ತೆನಿ ಜಗ್ಗೊಳ್ ಯೆವ್ನ್ ಗಳ್ಯಾ ವೈನಿ ಪಾಂಯಾ ಥವ್ಲ್ಯಾನಿ. 25 ಮಾನಾ ಜೊಶ್ವಾನ್ ತೆಂಕಾ ಭಿಂವ್ ನಕಾಸಿ, ಘಾಬ್ರುನಕಾಸಿ, ಘಟ್ ರಾವಾ, ಅನಿ ಧೈರ್ಯಾನ್ ರಾವಾ, ತುಮ್ಚ್ಯಾ ವಾಂಗ್ಡಾ ಲಡಾಯಿಕ್ ಯೆತಲ್ಯಾ ಹರ್ ಎಕ್ ದುಶ್ಮನಾಕ್ನಿ ಸರ್ವೆಸ್ಪರ್ ಅಸೆಚ್ ಕರ್ತಾ, ಮಟ್ಲ್ಯಾನ್. 26 ಮಾನಾ ತ್ಯಾ ರಾಜಾಕ್ನಿ ಮಾರುನ್ ಜಿವ್ ಕಾಡುನ್, ತೆಂಕಾ ಪಾಂಚ್ ಝಾಡಾಕ್ನಿ ಲೊಂಬಾತ್ ಘಾಲುಕ್ ಲಾವ್ಲ್ಯಾನ್, ತೆಂಚಿ ಮ್ಹಡಿ ಸಾಂಜ್ ಪತರ್ಬಿ ಥೈಚ್ ಲೊಂಬಿತ್ ಹೊತ್ತಿ. 27 ದಿಸ್ ಬುಡ್ತಲ್ಯಾ ಎಳಾರ್ ಲೊಕಾನಿ ಜೊಶ್ವಾಚ್ಯಾ ಹುಕುಮಾ ಸಾರ್ಕೆ ತೆಂಕಾ ಝಾಡಾಂಚ್ಯಾ ವೈನಾ ಖಾಲ್ತಿ ಉತ್ರುನ್, ತೆನಿ ನಿಪುನ್ ಬಸಲ್ಲ್ಯಾ ಡೊಂಬಾತುಚ್ ಘಾಲುನ್, ತೊಂಡಾಕ್ ಗುಂಡ್ಯಾನ್ ಧಾಪ್ಲ್ಯಾನಿ, ತೆ ಗುಂಡೆ ಅಜುನ್ ಪತರ್ಬಿ ತಸೆಚ್ ಹಾತ್.

28 ಜೊಶ್ವಾನ್ ತ್ಯಾಚ್ ದಿಸಿ ಮಕ್ಕದ್ ಸ್ವತಾಚೆ ಕರುನ್ಗೆಟ್ಲ್ಯಾನ್, ತ್ಯಾ ಗಾಂವಾಚೊ ರಾಜಾ ಅನಿ ಲೊಕಾಕ್ನಿ ಕೊಯ್ತ್ಯಾನ್ ನಾಶ್ ಕರ್ಲ್ಯಾನ್, ಎಕ್ಲ್ಯಾಕ್ಬಿ ಹುರ್ವುಕ್ನಾ ಜೆರಿಕೊಚ್ಯಾ ರಾಜಾಕ್ ಕರಲ್ಲ್ಯಾ ಸಾರ್ಕೆಚ್ ಹೆಂಕಾಬಿ ಕರ್ಲ್ಯಾನ್. 29 ಮಾನಾ ಜೊಶ್ವಾನ್, ಸಗ್ಳ್ಯಾ ಇಜ್ರಾಯೆಲ್ ಲೊಕಾಕ್ನಿ ಘೆವ್ನ್ ಮಕ್ಕದಾಕ್ನಾ ಲಿಬ್ನಾಕ್ ಜಾವ್ನ್ ಥೈ ಹೊತ್ತ್ಯಾಂಚ್ಯಾ ವಾಂಗ್ಡಾ ಲಡಾಯ್ ಕರ್ಲ್ಯಾನ್. 30 ಸರ್ವೆಸ್ಪರಾನ್ ತೆ ಶಾರ್ ಅನಿ ಥೈತ್ಲ್ಯಾ ರಾಜಾಕ್ನಿ ಇಜ್ರಾಯೆಲಾಂಚ್ಯಾ ಹಾತಿತ್ ದಿಲ್ಯಾನ್, ತೆನಿ ಥೈ ಹೊತ್ತ್ಯಾ ಲೊಕಾಕ್ನಿ ಎಕ್ಲ್ಯಾಕ್ಬಿ ಹುರ್ವಿನಸ್ತಾನಾ ಕೊಯ್ತ್ಯಾನ್ ನಾಶ್ ಕರ್ಲ್ಯಾನಿ, ಜೆರಿಕೊಚ್ಯಾ ರಾಜಾಕ್ ಯೆಲ್ಲಿ ಗತುಚ್ ಹ್ಯಾ ರಾಜಾಕ್ಬಿ ಯೆಲಿ. 31 ಥೈತ್ನಾ ಜೊಶ್ವಾನ್ ಇಜ್ರಾಯೆಲ್‌ಕಾರಾಕ್ನಿ ಘೆವ್ನ್ ಲಾಕಿಶಿಕ್ ಜಾವ್ನ್, ಲಡಾಯ್ ಕರ್ಲ್ಯಾನ್. 32 ಸರ್ವೆಸ್ಪರಾನ್ ತೆ ಶಾರ್ ಇಜ್ರಾಯೆಲಾಂಚ್ಯಾ ಅಧಿನ್ ಕರಲ್ಲ್ಯಾ ಸಾಟ್ನಿ, ತೆನಿ ತ್ಯಾ ಶಾರಾಕ್ ದೊನ್ವ್ಯಾ ದಿಸಿ ಸ್ವತಾಕ್ ಕರುನ್ ಘೆವ್ನ್ ಶಾರಾಕ್ ಅನಿ ಥೈತ್ಲ್ಯಾ ಲೊಕಾಕ್ನಿ ನಾಶ್ ಕರ್ಲ್ಯಾನ್, ಲಿಬ್ನಾಚ್ಯಾ ಲೊಕಾಕ್ನಿ ಹೊಲ್ಲಿ ಗತುಚ್ ಹೆಂಕಾಬಿ ಹೊಲಿ. 33 ತವ್ಡೆಚ್ ನಸ್ತಾನಾ, ಜೊಶ್ವಾನ್ ಲಾಕಿಶಿಯಾಂಚ್ಯಾ ಮಜತಿಕ್ ಯೆಲ್ಲ್ಯಾ ಗೆರಿಜಿಚೊ ರಾಜಾ ಹೊರಾಮಾಕ್ ಅನಿ ತೆಜ್ಯಾ ಲೊಕಾಕ್ನಿ ನಾಶ್ ಕರ್ಲ್ಯಾನ್, ಎಕ್ಲೊಬಿ ಹುರುಕ್ನಾತ್. 34 ಮಾನಾ ಜೊಶ್ವಾನ್ ಲಾಕಿಶ್ ಸೊಡುನ್ ಇಜ್ರಾಯೆಲಾಂಚ್ಯಾ ವಾಂಗ್ಡಾ ಎಗ್ಲೊನಿಕ್ ಯೆವ್ನ್ ಲಡಾಯ್ ಕರ್ಲ್ಯಾನ್. 35 ತೆನಿ ತ್ಯಾಚ್ ದಿಸಿ ತೆ ಸ್ವತಾಕ್ ಕರುನ್ ಘೆವ್ನ್, ಲಾಕಿಶಿಕ್ ಕರಲ್ಲ್ಯಾ ಸಾರ್ಕೆಚ್ ತ್ಯಾ ಶಾರಾಕ್ ಅನಿ ಥೈತ್ಲ್ಯಾ ಲೊಕಾಕ್ನಿ ಕೊಯ್ತ್ಯಾನಿ ನಾಶ್ ಕರ್ಲ್ಯಾನ್. 36 ಮಾನಾ ಜೊಶ್ವಾನ್ ಅನಿ ಇಜ್ರಾಯೆಲ್ ಲೊಕಾನಿ ಎಗ್ಲೊನ್ ಸೊಡುನ್, ಹೆಬ್ರೊನಾಕ್ ಜಾವ್ನ್ ತೆಂಚ್ಯಾ ವಿರೊದ್ ಲಡಾಯ್ ಕರುನ್, 37 ತೆಕಾ ಸಮಂದ್ ಪಡಲ್ಲಿ ಗಾಂವಾ ಅನಿ ತೆಜ್ಯಾ ರಾಜಾ ಅನಿ ಲೊಕಾಕ್ನಿ ಕೊಯ್ತ್ಯಾನ್ ನಾಶ್ ಕರ್ಲ್ಯಾನ್, ಎಗ್ಲೊನಾ ಸಾರ್ಕೆಚ್ ಹಿತ್ತೆಬಿ ಕೊನಾಕ್ ಹುರ್ವುಕ್ ನಾತ್, ಶಾರಾಕ್ ಅನಿ ಲೊಕಾಕ್ನಿ ನಾಶ್ ಕರ್ಲ್ಯಾನಿ. 38 ಥೈತ್ನಾ ಜೊಶ್ವಾ ಅನಿ ಸಗ್ಳಿ ಇಜ್ರಾಯೆಲ್ ಲೊಕಾ ದೆಬಿರಿಕ್ ಯೆವ್ನ್, ತೆಂಚ್ಯಾ ವಾಂಗ್ಡಾ ಲಡಾಯ್ ಕರ್ಲ್ಯಾನಿ. 39 ತ್ಯಾ ಶಾರಾಕ್ ಅನಿ ತೆಕಾ ಸಮಂದ್ ಪಡಲ್ಲ್ಯಾ ಗಾಂವಾಕ್ನಿ ಅನಿ ತೆಜ್ಯಾ ರಾಜಾ ಅನಿ ಲೊಕಾಕ್ನಿ ಕೊಯ್ತ್ಯಾನ್ ನಾಶ್ ಕರ್ಲ್ಯಾನಿ, ಎಕ್ಲ್ಯಾಕ್ಬಿ ಹುರ್ವುಕ್ನಾತ್, ಹೆಬ್ರೊನಾಕ್ ಅನಿ ತೆಜ್ಯಾ ರಾಜಾಕ್, ಲಿಬ್ನಾಕ್ ಅನಿ ತೆಜ್ಯಾ ರಾಜಾಕ್ ಹೊಲ್ಲಿ ಗತುಚ್ ದೆಬಿರಿಕ್ ಅನಿ ತೆಜ್ಯಾ ರಾಜಾಕ್ಬಿ ಹೊಲಿ. 40 ಅಸೆ ಜೊಶ್ವಾನ್ ಮಡ್ಡಿಚ್ಯಾ ವೈಲೆ ಶಾರ್, ದಕ್ಷಿನ್ ಪ್ರಾಂತ್ಯಾ, ಉತ್ರನಿಚೊ ಜಾಗೊ, ಮಡ್ಡಿಯಾಂಚೊ ಅನಿ ಖಡ್ಡ್ಯಾಂಚೊ ಜಾಗೊ ಹೆ ಸಗ್ಳೆ ಅಪ್ನಾಚೆ ಕರುನ್ ಘೆವ್ನ್, ಥೈತ್ಲ್ಯಾ ರಾಜಾ ಅನಿ ಲೊಕಾಕ್ನಿ ನಾಶ್ ಕರುನ್ ಎಕ್ಲ್ಯಾಕ್ಬಿ ಹುರ್ವುಕ್ನಾ, ಇಜ್ರಾಯೆಲಾಂಚ್ಯಾ ಸರ್ವೆಸ್ಪರ್ ದೆವಾಚ್ಯಾ ಹುಕುಮಾ ಸಾರ್ಕೆ ಝಿತ್ತೆ ಹೊತ್ತೆ ಹರ್ ಎಕ್ಬಿ ನಾಶ್ ಕರ್ಲ್ಯಾನ್. 41 ಕಾದೆಶ್ ಬರ್ನೆಯಾಕ್ನಾ ಗಾಜಾ ಪತರ್ಲ್ಯಾಬಿ ಅನಿ ಗೊಶೆನ್ ಪ್ರಾಂತ್ಯಾಕ್ನಾ ಗಿಬ್ಬೆಯಾ ಪತರ್ಬಿ ಫುರಾ ಹಾರ್ವುಲ್ಯಾನ್. 42 ಇಜ್ರಾಯೆಲಾಂಚ್ಯಾ ಸರ್ವೆಸ್ಪರ್ ದೆವಾನ್, ತೆಂಚ್ಯಾ ಸಾಟ್ನಿ ಲಡಾಯ್ ಕರಲ್ಲ್ಯಾಕ್, ಜೊಶ್ವಾನ್ ಹ್ಯಾ ಸಗ್ಳ್ಯಾರಾಜಾಕ್ನಿ ಅನಿ ರಾಜಾಕ್ನಿ ಎಕುಚ್ ಎಳಾರ್ ಸ್ವತಾಕ್ ಕರುನ್ಗೆಟ್ಲ್ಯಾನ್. 43 ಮಾನಾ ಜೊಶ್ವಾ ಸಗ್ಳ್ಯಾ ಇಜ್ರಾಯೆಲಾಂಚ್ಯಾ ವಾಂಗ್ಡಾ ಗಿಲ್ಗಾಲಿತ್ಲ್ಯಾ ಅಪ್ನಾಚ್ಯಾ ಬಿಡಾರಾಕ್ ಪರ್‍ತುನ್ ಗೆಲೊ.