1 Ni di Saate latɔkɔ Abram alɛ, <<Die di kale lɛfɔ ku batii lɛfɔ ku teefɔ leyo, faatɔɔkyɛ kasɔ ka matuofɔ ni suoto.

2 <<Kamabla fɔ kale kplɛ

kamawii fɔ lɛyɔɔ kafɔɔ;

Mata leyooto lɛfɔ ntaka katoo,

fankple lɛyɔɔ.

3 Mba niewii fɔ ni lɛyɔɔ, kamawii ma lɛyɔɔ,

olele kafɔɔ niɛkpaani fɔ, kamakpaani nwɔ;

afɔ suoto babafe kafɔɔ manwii

kayi batii bamuu lɛyɔɔ.>>

4 Nioso Abram ladie fɛ mmle di Saate latɔkɔ nwɔ nii; Lot kafɔɔ latikanko nwɔ. Obe wɔ di Abram ladie ni di Haran aasifi nii, atoofũ alɛɛ afosi-akuɛnsĩ alɛɛ anɔɔ. 5 Aakpaa ɔsɔfɔ nɔɔ Sarai ku maatɛ nɔɔ obi Lot ku asaawɛ lɛma amuu ku batii ba baawɛ ni di Haran, ni baadie alɛ boosifi Kanaan kasɔ suoto, ni baalaabuo Kanaan kasɔ suoto nɛ.

6 Abram lakyi kasɔ nwu nkpo suoto aalaadu Morek kowoso kplɛ ɔlɔɔkɔ di Sikem. Di obe nwu nkpo kamɛ Kanaan batii lawɛ kaasɔ nwu nkpo suoto. 7 Ninfɛ di Saate ladiki suoto aatuo Abram ni aatɔkɔ nwɔ alɛ, <<Mayɔ kasɔ ka mmle nta banantii lɛfɔ.>> Nioso aapɛ oleɔta akyikye ninfa aata Saate wɔ niadiki suoto aatuo nwɔ nii.

8 Aadie ninfa aasifi kabokotee osi di Betel kufĩ katunkɔ aalaapɛ lɛkpaayo ninfa, Betel lawɛ di kufĩ kamɛɛkɔ, Ai lawɛ di kufĩ katunkɔ. Ni aapɛ oleɔta akyikye ninfa aata Saate nɛ, ni aalɛɛ Saate leyooto nɛ. 9 Nkpo oso Abram ladie aatoofe nkpaalɔ kasɔ.

10 Kɔka latɔɔkpɛ di kasɔ nwu nkpo suoto, ni di Abram lasifi Egipte alɛ ɔɔlaasiɛ ninfa kɛɛkɛ nɛ. Diekye kɔka nwu lawɛ osie. 11 Ditoobu kɛɛkɛ ababuo ni Egipte ni aatɔkɔ ɔsɔfɔ nɔɔ Sarai alɛ, <<N-ye nlɛ fɛtɛ fale ɔsanko wɔ ninlɛ ni sekpeele. 12 Nse Egipte batii lɛnya fɔ, bababuɛ alɛ, <Nnya ɔsɔfɔ nɛ.> Babalo mi, mandiɛ fɔ fansiɛ nkpa. 13 Nioso buɛ falɛ obiloo sankobi fale, ni babalolaa mi manklee ta afɔ oso, mantɛɛ kafɔɔ nsiɛ nkpa ta afɔ oso.>>

14 Obe wɔ di Abram labuo ni Egipte, Egipte batii lanya alɛ ɔsɔfɔ nɔɔ nle ɔsanko wɔ niɛtɛ alɛ ni sekpeele. 15 Obe wɔ di Farao banɔɔfotii lanyɔɔ nii, baatansa nwɔ baata Farao, ni baakpaa ɔsanko nwu baasifiko Farao leyo nɛ. 16 Nioso baalolaa Abram baaklee ta ɔsanko nwu nkpo oso, aatɔɔ bafoso kpinwu ku banankyue ku babɔkɛɛ ba mantuka ni atoo, basanko ku basuɔtɔ ku balanle-suɔtɔ ku basanko ku kapu bapɔnkɔ.

17 Kafɔɔ Saate lata sifiɛ kpile lapɛ Farao ku leyo nɔɔ batii ta Abram ɔsɔfɔ Sarai oso. 18 Nioso Farao lata baalɛɛ Abram baatɔɔ. Ni aakaalɛ nwɔ alɛ, <<Lɛ oso fɛɛbla mi nkpo? Be oso fatatɔkɔ mi falɛ ɔsɔfɔ lɛfɔ ale? 19 Be oso faabuɛ falɛ, <Obiloo sankobi ale,> fɛɛtɛɛ lɛkpaa nwɔ fɛ ɔsɔfɔ nii? Yioo! Nnya ɔsɔfɔ lɛfɔ. Kpaa nwɔ biɛtɔɔkyɛ!>> 20 Nioso Farao ladiki batii aata alɛ bakpaa Abram ku ɔsɔfɔ nɔɔ ku asaa ya amuu niawɛ nwɔ ni baalaatɛ nwɔ osuku aasifi.