1 Ninfɛ di Yaa latɔkɔ Yakob alɛ, <<Kple fasifi falaasiɛ di Betel, faapɛ oleɔta akyikye ninfa fata Yaa, nnwɔ niadiki suoto aatuo fɔ ni di obe wɔ faatootoso ni di obilee Esau nfũ.>>

2 Nioso Yakob latɔkɔ leyo nɔɔ batii ku batii ba bamuu niawɛ ni di ɔkyɛ nɔɔ alɛ, <<Biyɔ bafɔɔ afiɔ ya bikle ni biyu, biekleklesa suoto lee biɛkyɛlɛnsa akpeele lee. 3 Ni biɛwa buosifi Betel. Nfa mapɛ oleɔta akyikye nta Yaa wɔ niatuna aatɛɛ ni di nimiina nii kamɛ ku nnwɔ niasiɛkoe ni di kaakɔ lele lakyɛ ni.>> 4 Nioso baayɔ bafɔɔ afiɔ ya amuu baakle ni ku atokosakasaa di atoko lɛma baata Yakob. Ni di Yakob layɔ nya aakookaa di mawogani kowoso kplɛ kunwii kalɔ di Sekem nɛ. 5 Ni baayefe osuku nɛ, ni di Yaa lata difu lapɛ sekpoo se simuu niamana ma siakye ni, alɛ kuonwii lɛma ditataka di Yakob ku leyo nɔɔ batii suoto.

6 Ni di Yakob ku batii ba bamuu niawɛ ni di suoto nɔɔ lalabuo Lus (ninle ni Betel) di Kanaan kasɔ. 7 Nfa aapɛ oleɔta akyikye, ni aalɛɛ lɛba nwu alɛ El Betel,* diekye nfa di Yaa ladiki suoto nɔɔ aatuo nwɔ di obe wɔ aatootoso ni di obilɛma Esau nfũ nɛ.

8 Ninfɛ di Debora wɔ niaklee ni Rebeka ku sibisɔ nɔɔ lakpi, baakookaa nwɔ di kowoso kplɛ kunwii kalɔ di Betel okpoo kalakasɔ nɛ. Nioso baalɛɛ lɛba nwu alɛ Alon Bakut* nɛ.

9 Di Yakob lakple ni di Padan Aram,* Yaa lakple aadiki suoto aatuo nwɔ, ni aawii nwɔ lɛyɔɔ nɛ. 10 Yaa latɔkɔ nwɔ alɛ, <<Leyooto lɛfɔ ninle Yakob, kafɔɔ blɔbasinlɛɛ fɔ Yakob; leyooto lɛfɔ nfɛ nimale Israel.>> Nioso Israel nfɛ baatɔɔlɛɛ nwɔ.

11 Ni di Yaa latɔkɔ nwɔ alɛ, <<Ami ninle Yaa wɔ Ninlenke ni nɛ; lofo, faakpɛ di lɛpɔ kamɛ. Kale ku nnle sekpoo kamadie mankye kamɛ lɛfɔ, baka kafɔɔ madie mankye suoto lɛfɔ kamɛ. 12 Kasɔ ka layɔ lata ni Abraham ku Isak yi, lɛyɔ ka kafɔɔ lɛta fɔ. Mayɔ kafɔɔ kasɔ ka mmle nta banantii lɛfɔ ba nikɔwa ni sɛɛmaa lɛfɔ.>> 13 Ninfɛ di Yaa lasifi osi aadiɛ nwɔ di lɛba le aakakatɛko nwɔ ni nɛ.

14 Ninfɛ di Yakob layɔ difuɔ ninwii aatɛ di lɛba le di Yaa lakakatɛ ko nwɔ nii, ni aanyɛɛnɛ asaaɔta nta aakpete ninni; aakpete kafɔɔ nnɔnyi ninni suoto nɛ. 15 Ni di Yakob lalɛɛ laba le di Yaa lakakatɛ ko nwɔ ni alɛ Betel* nɛ.

16 Yakob ku batii nɔɔ ladie di Betel baasifi. Di obe wɔ bakyɛ ni di osuku manadibuo ni Efrat, kolofo latoonu Rahel, diawɛ nwɔ osie. 17 Di kolofo nwu latoonu nwɔ ni osie kanya, ɔsanko lofosatɛ nwu latɔkɔ nwɔ alɛ, <<Tanyɛkɛ, diekye fatookple fɛɛwɛ obisuɔtɔbi bamba.>> 18 Aatookpi, fiɛ ninwuna nɔɔ madie nii, aatika obisuɔtɔbi nɔɔ nwu leyooto alɛ Benoni.* Kafɔɔ ote latika nwɔ leyooto alɛ, Benyamin.*

19 Nioso Rahel lakpi baakookaa nwɔ di osuku boofe ni Efrat (nfa ninle Betlehem) nɛ. 20 Yakob layɔ difuɔ aatika di ɔkya nɔɔ suoto, dite bia mmiɛ difuɔ nwu lɛtɛ Rahel ɔkya nsũ.

21 Israel lakple aayefe osuku, ni aalaapɛ akpaayo di Migdal Eder. 22 Obe wɔ di Israel nfɛ nsi ni kaasɔ nwu suoto yi, obisuɔtɔbi nɔɔ nɔɔfo le Ruben lalaatenko ote ɔsɔnɔ wɔ manlɛɛ ni Bilha. Ni di Israel lanu ɔlaa nwu nɛ.

Lefosi babisuɔtɔbi banyɔ niawɛ Yakob:

23 Lea babisuɔtɔbi niale:

Yakob obisuɔtɔbi kasale Ruben,

Simeon ku Lewi ku Yuda ku Isakar ku Sebulon.

24 Rahel babisuɔtɔbi niale:

Yosef ku Benyamin.

25 Rahel kpɛmblatɛ sanko Bilha babisuɔtɔbi niale:

Dan ku Naftali

26 Lea kpɛmblatɛ sanko Silpa babisuɔtɔbi niale:

Gad ku Aser

Yakob babisuɔtɔbi ba baalofo baatɔɔ ni di Padan Aram nɛ.

27 Yakob lakple aasifi kafa di ote Isak nfũ di Mamre, niɛtɛɛtɛɛ ni Kiriat Arba (nfa ninle Hebron) nɛ. Nfa di Abraham ku Isak lasiɛ nɛ. 28 Isak lasiɛ nkpa alɛɛ kɔlafa afosi anɛ. 29 Aatɛ aabe fiɛ ninwuna ladie, aakpi aasifi aalaatũ bawa nɔɔ. Ni di babisuɔtɔbi nɔɔ Esau ku Yakob lakookaa nwɔ nɛ.