1 Obe wɔ di Yaa batɔkyɛntɛ banyɔ nwu nkpo labuo ni Sodom ku kɔtɔɔfɔ lebe, Lot lasiɛ di okpoo nwu nkpo kayoko. Obe wɔ aanya ma nii, ni aataka aalaakyakako ma, ni aapɛ akunkyi aafuusa anu kaasɔ nɛ. 2 Ni aabuɛ alɛ, <<Basaate nii, lekoto biwa biɛbasoosa di kpɛmblatɛ lee leyo. Ninta ye ntu bifoto nkpaa biete di ɔkyɛ nii, nse kale lɛsɛ yi, biasifi osuku lee.>>

Ni baatɔkɔ nwɔ alɛ, <<Oowo, bubate di okpoo wɔ mmle lɛkpaka.>>

3 Kafɔɔ aabunka ma osie kanya ni baatuna baalaasosa di leyo nɔɔ nɛ. Ni aata baawa alesaa baata ma nɛ. Aata baafiɛ bloblo wɔ di lɛnyakasaa diesi ni aata ma baale. 4 Fiɛ nfɛ babasifi manaate nii, basuɔtɔ bamuu di Sodom okpoo nwu kakɔ biala, bakosopo ku banɔɔfo labamana leyo nwu baakyi. 5 Baalɛɛ Lot osie kanya baakaalɛ alɛ, <<Fɛ di basuɔtɔ ba niebabuo fɔ ni kɔfɔɔ ku kakyɛ ka nkpe? Dieko ma fawako wo buotenko ma.>>

6 Lot ladie aakyɛ ɔkyɛ lɛma kaayi, ni aasɛɛ leyo sɛɛmaa nɔɔ nɛ. 7 Ni aalaatɔkɔ ma alɛ, <<Oowo, basiɛwo! Bitambla okpile wɔ mmle okle. 8 Binyu, nkpe babisankobi banyɔ, manan-ye ni osuɔtɔ diidii. Bitɛɛ nkpaa ma nwako ye lele bilɛ biɔbla ma yi, biɛbla ma. Kafɔɔ bitambla basuɔtɔ ba mmle lɛsalɛsaa, diekye ami beebuo kɔfɔɔ, dikpenii nnyu nlɛ lɛsalɛsaa diɛbla ma.>>

9 Ni baatɔkɔ nwɔ alɛ, <<Kyɛwo dianu wla, afɔ ɔfɔɔ akpa! Afɔ owe fabatɔkɔ wo lɛsaale dikpeni buɔbla ni. Kyɛwo dianu wla! Nse diele nkpo, bubabla fɔ lɛsaa munlenkee bia bafɔɔ lɛfɔ nwu. Ni baatukusa Lot baafenko sɛmaa baakyɛ alɛ bɔɔlaabiɛ kokloo nwu nɛ.

10 Kafɔɔ basuɔtɔ nwu leeyo kamɛ ladie baananfi Lot baakpee leeyo nwu kamɛ baasɛɛ kokloo. 11 Ninfɛ baata anu lawɔfɔ basuɔtɔ nwu nkpo niayila ni di leyo nwu kayoko nɛ, bakosopo ku banɔɔfo nwu, mmle okle manaasinya ni kayoko nwu nkpo.

12 Ninfɛ di basuɔtɔ nwu nkpo banyɔ latɔkɔ Lot alɛ, <<Batii lɛfɔ bawo lekple bakpe ninfũ, dile ni balɔ ee babisankobi ee otii bamba owo di okpoo wɔ mmle kamɛ? Kpaa ma fadieko. 13 Diekye buɔwa nfũ mmle ɔwɔɔsa. Saate ntoonu asaakuu ya baatii ba mmle kɔbla nii, ni eekpee wo alɛ bubawɔɔsa Sodom nɛ.>>

14 Nioso Lot lakyɛ aalaatɔkɔ balɔ nɔɔ ba niakaalɛ nwɔ babisankobi nɔɔ alɛ bɔɔyɔ ni alɛ, <<Bipɛsɛwa biedie ninfũ, diekye Saate nfɛ mawɔɔsa okpoo wɔ mmle!>> Kafɔɔ balɔ nɔɔ nwu nkpo lanyu alɛ kɔkyɔ ookpee.

15 Kolesɛtũ kaale nfɛ masɛ ni, Yaa batɔkyɛntɛ nwu nkpo lapɛko Lot sɛwa alɛ, <<Pɛsɛwa! Faakpaa ɔsɔfɔ lɛfɔ ku babisankobi lɛfɔ nwu banyɔ ninkpe ni ninfũ, nse diele nkpo ni bibawɔɔ nse bɛɛnanfi okpoo wɔ mmle kootoko.>>

16 Kafɔɔ Lot latooku nkpaa. Ninfɛ di basuɔtɔ nwu nkpo lamufũ nwɔ kɔɔnɛɛ, baamufũ ɔsɔfɔ ku babisankobi nɔɔ nwu banyɔ kafɔɔ n-le baananfi ma baadiki di okpoo nwu kamɛ, diekye SAATE nwu lanya ma nyaami. 17 Di obe wɔ baakpaa ma baadieko nii, ni di onwii lɛma latɔkɔ Lot alɛ, <<Bitoso biefũ suoto nkpa! Bitanyu sɛmaa, bitanyila kafɔɔ kaakɔkaakɔ di ɔtaata nwu. Bitoso bisifi abokote nwu suoto, se diele nkpo bibawɔɔ!>>

18 Kafɔɔ Lot labuɛ alɛ, <<Oowo, Basaate nii, lekoto, bitambla wo nkpo! 19 Feele mi sibualɛ fɛɛnyɛɛ nyaami feediki mi nkpa. Kafɔɔ namafuo otoso odu abokote nwu fiɛ kaawɔɔ nwu mawa, ni kamakpi. 20 Nyu lo, nya okpoo onwii ninkpe ninfa kuɔtɛɛtɛɛ ni, tɛɛ ntoso nsifi nfa. Okpoo biibii ko kule, nioso tɛɛ osuku nintoso nsifi nfa ninwɛ nkpa. Sɛɛ, diele okpoo biibii ko kule?>>

21 Ninfɛ aabuɛ alɛ, <<Kulɛ, kamatuna nta fɔ, namawɔɔsa okpoo nwu nkpo foobuɛ nii. 22 Kafɔɔ toso nkyenkye, diekye nɔmafuo lɛsalɛsa ɔbla nse fayidu nfa.>> (Nioso baalɛɛ okpoo nwu nkpo alɛ Soar).* nɛ.

23 Obe wɔ di Lot labuo ni Soar kufĩ ntootũ. 24 Ninfɛ di Saate lata amã ku ɔtɔ lanɔɔ kuakye osi di Saate nfũ kuakpete di Sodom ku Gomora kasɔ suoto nɛ. 25 Ni aawɔɔsa sekpoo nwu nkpo ku sɛtaata nsɔ nwu mmuu ku okpoo nwu nkpo kamɛ basiɛtɛ ku lɛsaa biala niakɔntɔ ni kaasɔ nwu suoto nɛ. 26 Kafɔɔ Lot ɔsɔfɔ lanyu sɛmaa ni aakple mmba dituu nɛ.

27 Ku kolesɛtũ Abraham lataka aakple aakyɛ lɛba le aayila ni di Saate anu. 28 Ni aanyu aasooko diofe ni Sodom ku Gomora ku sɛtaata nsɔ nwu, ni aanya kɔyɔ kplɛ kɔtaka kaasɔ nwu suoto fɛle lɛfɛnku kɔyɔ.

29 Nioso obe wɔ di Yaa lawɔɔsa ni sɛtaata nsɔ nwu nkpo di Lot lasiɛ nii, aanyuma Abraham ni aadiki Lot aakyeko kawɔɔ nwu kamɛ nɛ.

30 Lot ku babisankobi nɔɔ nwu banyɔ ladie di Soar baasifi baalaasiɛ di abokote osi. Diekye aatɔɔyɛkɛ alɛ aasiɛ di Soar. Manko babisankobi nɔɔ nwu banyɔ baasiɛ di ofuɔntuu kamɛ. 31 Dii ninwii ɔsankobi nɔɔfole latɔkɔ maatɛ nɔɔ alɛ, <<Teewo ntoobe, osuɔtɔ kuonwii nnaa ninfũ aatenko wo nii, fɛ mmle dite ni kaayi kamuu. 32 Ta buta teewo nta anyi asiɛ alɛ aatenko wo munlaka amɛ munlofo babi, alɛ teewo kɔna dilaawɔɔ.>>

33 Dii nwu nkpo kakyɛ baata ote lɛma nta aanyi, ni di ɔsankobi nɔɔfole lakyɛ aalate nwɔ di ɔkyɛ nɛ. Kafɔɔ ote ditatofo obe wɔ aabate nwɔ ni di ɔkyɛ ku obe wɔ aataka nii.

34 Kaleesɛ ɔsankobi nɔɔfole latɔkɔ maatɛle alɛ, <<Kɔsa kakyɛ late di teemi nfũ. Kakyɛ ka kafɔɔ ta bukple butɔɔ nta anyi, di afɔ kafɔɔ faalaate di ɔkyɛ nɔɔ alɛ munkofɔ bualofo babi di teewo suoto.>> 35 Nioso baata ote lɛma nta aanyi kakyɛ nwu nkpo kafɔɔ, ni di ɔsankobi bisɔnle kafɔɔ lalaate nwɔ di ɔkyɛ nɛ. Nni nkpo kafɔɔ atatofo obe wɔ abate ni ku obe wɔ aadie nii.

36 Nioso Lot babisankobi nwu banyɔ lalaka amɛ di ote lɛma suoto. 37 Ɔsankobi nɔɔfole lalofo obisuɔtɔbi ni aatika nwɔ leyooto alɛ Moab nɛ. Nnwɔɔ ninle miɛ Moab batii ɔwa nɛ. 38 Ɔsankobi bisɔnle kafɔɔ lalofo obisuɔtɔbi ni aatika nwɔ leyooto alɛ Ben-Ami. Nnwɔɔ ninle miɛ Amon batii ɔwa nɛ.