1 Ninfɛ di Yaa lawii Noa ku babisuɔtɔbi nɔɔ lɛyɔɔ, ni aatɔkɔ ma alɛ, <<Bilaalofo biɛkpɛ biyii kasɔ ka mmle suoto. 2 Lɛta babɔkɛɛ bamuu kaayi ku bakansiɛ bamuu ku lɛsaa biala ninkpɔkɔ ni kaasɔ suoto ku kɔkpaku di lekpo kamɛ nlɛ babayɛkɛ ye. Nioso lɛyɔ ma lekpee ye ninnɛɛ. 3 Lɛsaa biala ninkpe nkpa ninkyɛ ni, lɛyɔ nya amuu lɛta ye nlɛ aale ye alesaa. Fɛ mmle okle layɔ sɛfa kɔɔnle lata ye nii, nunua ntɔɔyɔ lɛsaa biala lɛta ye.

4 <<Kafɔɔ bitanle sina se di ntɔ nɔɔ nsi ni kaamɛ, diekye mmi kamɛ di nkpa nɔɔ nsi nɛ. 5 Otii lele niediki owo nɔɔ nkpa, kamakaalɛ kanya didiki di otii nwu nkpo nfũ. Bɔkɛɛ lele nielo otii, kamakaalɛ kanya didiki nkyeko ɔkyɛ nɔɔ. Kamakaalɛ kanya didiki kafɔɔ nkyeko otii lele nielo owo nɔɔ.

6 <<Otii lele niewii owo nɔɔ ntɔ kaasɔ,

otii kafɔɔ mawii nwɔ ntɔ kaasɔ;

diekye, Yaa letembi,

di Yaa labla otii.

7 Aye yi, bilofo biɛkpɛ kaasɔ ka mmle suoto, bikpɛnsa kaasɔ ka mmle suoto bieyii ka pɔ.>>

8 Ninfɛ di Yaa latɔkɔ Noa ku babisuɔtɔbi nɔɔ nwu alɛ, 9 <<Lenii kanya ku aye ku banantii lee ba nimawa ni sɛɛmaa lee 10 ku lɛsaa biala niawɛ ni nkpa di ɔkyɛ lee, bakansiɛ ku babɔkɛɛ sele ku lepoo kamɛ babɔkɛɛ bamuu ku mba bamuu niadie ni di lɛlakaa nwu nkpo kamɛ ku aye, ku lɛsaa biala ninkpe ni nkpa kaasɔ suoto. 11 Lenii kanya ku aye nlɛ, diidii namasinwɔɔsa asaa ya amuu ninkpe ni nkpa ku ntu oyii. Diidii ntu dilasin-yii kasɔ dilalaasa asaa.>>

12 Ni di Yaa labuɛ alɛ, <<Nnya nle mmle ninle dituosaa le nimate ni di kanya ka konii ni munkofɔ ntɛɛ ku lɛsaa biala ninkpe ni nkpa ku banantii lɛfɔ bamuu ba nimawa ni. 13 Ntɔɔta kolosansa nii lɛtaa koolo, nni nimale dituosaa le nimasiɛ ni munko kasɔ ntɛɛ di kanya ka lenii ni nɛ. 14 Nse diɛwa alɛ kosiisa alokonkyɛ koolo di kolosansa lɛtaa yi, 15 ni kamanyuma kanya ninii le ninsi ni munkoye ntɛɛ ku asaa amuu ninkpe ni nkpa ku atembi lɛnya. Diidii kafɔɔ ntu dilɔbasin-yii dilalaasa asaa ya amuu ninkpe ni nkpa. 16 Obe lele di kolosansa lɛtaa di alokonkyɛ suoto yi, kamanya kũ nnyuma kanya ninii le ninaa ni kaloo ninsi ni di Yaa ku asaa ya amuu ninkpe ni nkpa ntɛɛ ku atembi lɛnya kaasɔ suoto.>>

17 Ninfɛ di Yaa latɔkɔ Noa alɛ, <<Nle mmle ninle dituosaa le kanya ka lenii ni di ami ku asaa ya amuu ninkpe ni nkpa ntɛɛ kaasɔ nɛ.>>

18 Noa babisuɔtɔbi ba niadie ni di lɛlakaa nwu kamɛ niale Sem, Ham ku Yafet, (Ham nialofo Kanaan.) 19 Mma mmle niale Noa babisuɔtɔbi batiɛ nwu nɛ. Mma kamɛ di batii ladie basamii baabuo kaasɔ suoto nɛ.

20 Noa lakye kasɔ aatɔɔkpɛ kofe, ni aakpɛ awosobi ya mambla ni nta kofe nɛ. 21 Obe wɔ aanyi ni awosobi nwu nta nwo, aasiɛ, ni aate lɛkyɔtɔ di lɛkpaayo nɔɔ kamɛ nɛ. 22 Ham wɔ nialofo ni Kanaan, lakyɛ aalaanya ote lɛkyɔtɔ, ni aakyɛ aalaatɔkɔ babilɛma suɔtɔbi banyɔ bule kaayi nɛ. 23 Kafɔɔ Sem ku Yafet baayɔ dibula baatika di amuusi lɛma baakyɛ sɛmaa, sɛmaa baayɔ baalaatĩi ote lɛma lɛkyɔtɔ. Baamunikĩisa anu baakpee di ɔlɔɔkɔ alɛ balaanya ote lɛma lɛkyɔtɔ. 24 Obe wɔ diakpa ni Noa di lɛtasiɛ nɔɔ nwu kamɛ, aanu ni lɛsaa le di obi bisɔnle nɔɔ labla nii, 25 ni aabuɛ alɛ,

<<Bɛɛkpaani Kanaan!

Abale ɔlanle yɛntɛle niɛwa ni kasɔ alenke ni

anta babilɛma suɔtɔbi.>>

26 Aakple aabuɛ alɛ,

<<Baatansa Saate wɔ ninle ni Sem Yaa!

Kanaan ale Sem ɔlanle.

27 Yaa ata Yafet kasɔ kamuɔ!

Yafet asiɛ di Sem akpaayo kamɛ,

di Kanaan ale nwɔ ɔlanle.>>

28 Di ntu layii kasɔ dialoo nii, Noa lakple aafũ alɛɛ alafa atiɛ afosi anɔɔ. 29 Noa lafũ alɛɛ alafa anaasĩ afosi anɔɔ fiɛ nfɛ aakpi.