1 Nioso Yakob layefe osuku ku leyo nɔɔ batii ku asaa nɔɔ amuu niale nwɔ ni ale, obe wɔ aadu ni Beerseba, aata oleɔta aata ote Isak Yaa.

2 Ninfɛ di Yaa lakakatɛ ko Israel ku kakyɛ di odiki otuo kamɛ alɛ, <<Yakob! Yakob!>>

Ni aatuna alɛ, <<Nnyɛɛ ninfũ.>>

3 Ni di Yaa labuɛ alɛ, <<Ami ninle Yaa, teete lɛfɔ Yaa, tanyɛkɛ Egipte kasɔ ɔkyɛ, diekye mabla fɔ kale kplɛ ninfa. 4 Makyɛ Egipte kasɔ nwu ku afɔ, nwaako kafɔɔ makplesa fɔ nwako kasɔ lɛfɔ suoto. Yosef kɔnɛɛ kumu kafɔɔ nimatĩi fɔ anu.>>

5 Ninfɛ di Yakob ladie di Beerseba, ni di Israel babisuɔtɔbi lakpaa ote lɛma Yakob ku babi ku basɔfɔ lɛma di bakeke ba di Farao lakyesee alɛ balatuka nwɔ ni nɛ. 6 Nioso Yakob ku banantii nɔɔ lasifi Egipte kasɔ. Baakpaa babɔkɛɛ sele lɛma bamuu, ku asaa ya amuu niawɛ ma ni di Kanaan kasɔ baasifiko. 7 Aakpaa babisuɔtɔbi nɔɔ ku bawa suɔtɔbi ku babisankobi ku bawa sankobi ku banantii nɔɔ bamuu aasifiko Egipte kasɔ.

8 Nnya Israel babisuɔtɔbi ayooto (Yakob ku banantii nɔɔ) ba niasifi ni Egipte kasɔ:

Ruben niale Yakob obi kasale.

9 Ruben babisuɔtɔbi niale:

Hanok, Palu, Hesron ku Karmi.

10 Simeon babisuɔtɔbi niale:

Yemuel, Yamin, Ohad, Yakin, Sohar ku Saul wɔ nianle ni Kanaan ɔsanko obisuɔtɔbi.

11 Lewi babisuɔtɔbi niale:

Gerson, Kohat ku Merari.

12 Yuda babisuɔtɔbi niale:

Er, Onan, Sela, Peres ku Serah (kafɔɔ Er ku Onan lakpi di Kanaan kasɔ).

Peres babisuɔtɔbi niale:

Hosron ku Hamul.

13 Isakar babisuɔtɔbi niale:

Tola, Puwa, Yahub ku Simron.

14 Sebulun babisuɔtɔbi nianle:

Sered, Elon ku Yahleel.

15 Mba mmle niale Lea babisuɔtɔbi ba aalofo aata ni Yakob di Paddam Aram*, di obisankobi Dina nkyakaa ni nɛ. Babisuɔtɔbi ku babisankobi nɔɔ bamuu labla afosi atiɛ babi batiɛ.

16 Gad babisuɔtɔbi niale:

Sifon, Hagi, Suni, Esbon, Eri, Arodi ku Areli.

17 Aser babisuɔtɔbi niale:

Yimna, Isua, Isui ku Beria.

Obilɛma sankobi niale Sera.

Beria babisuɔtɔbi niale:

Heber ku Malkiel.

18 Mba mmle niale babi ba di Silpa lalofo aata ni Yakob nɛ, nnwɔ di Laban layɔ aata ni obisankobi nɔɔ Lea, bamuu labla lefosi batii bakuɔ.

19 Yakob ɔsɔfɔ Rahel babisuɔtɔbi niale:

Yosef ku Benyamin. 20 Potifera, oletatɛ di On obisankobi Asenat lalofo Manase ku Efraim aata Yosef di Egipte kasɔ.

21 Benyamin babisuɔtɔbi niale:

Bela, Beker, Asbel, Gera, Naaman, Ehi, Ros, Mupim, Hup ku Ard.

22 Mba mmle niale babisuɔtɔbi ba di Rahel lalofo aata ni Yakob nɛ, bamuu labla lefosi batii bana.

23 Dan obisuɔtɔbi niale:

Husim.

24 Naftali babisuɔtɔbi niale:

Yahseel, Guni, Yeser ku Silem.

25 Mba mmle niale babisuɔtɔbi ba di Bilha lalofo aata ni Yakob nɛ, nnwɔ di Laban layɔ aata ni obisankobi nɔɔ Rahel, bamuu labla batii bakuɛnsĩ.

26 Batii ba bamuu niasifi ni Egipte kasɔ ku Yakob, baale nwɔ ni kafutu kamɛ kamu banantii, di babisɔfɔ nɔɔ ditasiɛ ni kaamɛ labla afosi akuɔ batii bakuɔ. 27 Ku babisuɔtɔbi ba banyɔ baalofo baata ni Yosef di Egipte kasɔ, nioso Yakob leyo kamɛ batii ba niasifi ni Egipte bamuu labla batii afosi akuɛnsĩ.

28 Yakob lakyesee Yuda alɛ ale nwɔ katũ aalaakaalɛ Yosef osuku wɔ babafe mansifi ni Gosen. Obe wɔ baabuo ni Gosen kasɔ, 29 Yosef lata baayɔ bakeke nɔɔ ba di bapɔnkɔ nnanfi ni baawako nwɔ, ni aakyɛ aalaakyakako ote Israel di Gosen nɛ. Obe wɔ di Yosef lakyɔɔ ni ɔkyɔɔ di anu nɔɔ, ni aayɔ nnɛɛ nɔɔ aaminisa ote, aafaa kaku aawi aaklɛsa nɛ.

30 Ninfɛ di Israel latɔkɔ Yosef alɛ, <<Nunua nfɛ kafuo okpi, diekye ami omu ntɔɔnya nlɛ feekple fakpe nkpa.>>

31 Ni di Yosef latɔkɔ babilɛma suɔtɔbi ku ote leyo kamɛ batii alɛ, <<Kɔkyɛ ninaatɔkɔ Farao nlɛ, <Babiloo suɔtɔbi ku teemi leyo kamɛ batii ba ninsi ni di Kanaan kasɔ ntɔɔwa ɔkyɛ nii. 32 Babɔkɛɛbakpatɛ di batii nwu nle; bɔɔkpa babɔkɛɛ sele lɛma, bɛɛwako bafoso ku batie ku banankyue lɛma ku lɛsaa biala ninkpe ma nii.> 33 Nse Farao lɛlɛɛ ye ɛɛkaalɛ ye alɛ, <<Be ninle ɔkpɛ wɔ biɔbla ni?> 34 bitɔkɔ nwɔ bilɛ, <Diayɔ ni di sibisɔ loo obe kamɛ di bakpɛmblatɛ lɛfɔ lakyako babɔkɛɛ ɔkpa, fɛ mmle di bawa loo labla nii.> Ni abata ye osuku minsiɛ di Gosen kasɔ, diekye babɔkɛɛbakpatɛ lɛbla diyududusaa bɛɛta Egipte batii.>>