1 Ni di Adam latenko ɔsɔfɔ nɔɔ Ewa ni aalaka lɛmɛ aalofo Kain nɛ. Ni aabuɛ alɛ, <<Di Saate lɛkyakaako kamɛ lelofo osuɔtɔ.>> 2 Nni kamaa aalofo obilɛma Abel.

Ninfɛ di Abel labale babɔkɛɛ setɛ, ni di Kain lale fekpɛntɛ nɛ. 3 Di obe owo sɛmaa, Kain layɔ kofe nɔɔ alesaa awo aabaata asaaɔta aata SAATE nwu. 4 Abel kafɔɔ layɔ babɔkɛɛ nɔɔ abi kasale ya ninsi ni lɛla aawako. Ni di Abel ku asaaɔta nɔɔ nwu labuo Saate anu nɛ. 5 Kafɔɔ Kain ku asaaɔta nɔɔ nwu ditabuo Saate anu. Nioso Kain lanya ɔblɔ osie kanya aakatu anu.

6 Ninfɛ di Saate lakaalɛ Kain alɛ, <<Be oso fɔɔnya ɔblɔ? Be oso fɛɛkatu anu? 7 Nse fɛ fambla lɛsaa nwaa nse suoto ntabayɔɔ fɔ. Kafɔɔ feesĩ ni lɛsaa nwaa ɔbla oso yi, okpile nfɛ nsoko fɔ di kayokontũ; kuomiɛ alɛ kulenkee fɔ, kafɔɔ dikpeni feelenkee nwu.>>

8 Nni sɛmaa Kain latɔkɔ obilɛma alɛ, <<Ta busifi kofe>> Obe wɔ baawɛ ni koofe, ni di Kain lataka di obilɛma Abel suoto aalo nwɔ nɛ.

9 Ninfɛ di SAATE nwu lakaalɛ Kain alɛ, <<Ɔfɛ di obilee suɔtɔbi Abel nkpe?>>

Ni aatɔkɔ nwɔ alɛ <<Nin-ye! Ami ninle obiloo nyuntɛ?>>

10 Ni di Saate lakaalɛ nwɔ alɛ, <<Be fɛɛbla nkpo nɛ? Nu lo! Obilee suɔtɔbi ntɔ kɔfaa ninlɛɛ mi kaasɔ suoto. 11 Nunua yi, batɔɔkpaani fɔ beediki fɔ kafɔɔ di kasɔ ka niabɛ kanya kaanyi ni obilee ntɔ di nnɛɛ lɛfɔ kamɛ suoto. 12 Nse fɛɛkpɛ kaasɔ nwu yi, klɔbasinsoo alesaa kata fɔ. Fabakple kɔlalaa fankyɛ fantookyi kasɔ ka mmle suoto.

13 Ni di Kain latɔkɔ Saate alɛ, <<Letokonanfi nii nlenke mi nnɛɛ. 14 Miɛ foodiki mi di kasɔ nwu suoto, kodie fɔ kafɔɔ di anu; kamakple kɔlalaa nkyɛ ntookyi kasɔ ka mmle, olele kafɔɔ niɛnyɛɛ kamalo mi.>>

15 Kafɔɔ Saate nwu latɔkɔ nwɔ alɛ, <<Diele nkpo; Nse otii owo lelo Kain, babananfi nwɔ kootoko sikuɛnsĩ manlenkeesa.>> Nioso Saate nwu latɛ nwɔ nsũ alɛ otii lele niɛnyɔɔ, alaalo nwɔ. 16 Nioso Kain ladie di Saate anu aasifi, aalaasiɛ di Nod kasɔ suoto di kufĩ katunkɔ di Eden.

17 Kain latenko ɔsɔfɔ nɔɔ ni aalaka lɛmɛ, ni aalofo Enok nɛ. Kain latoobudi okpoo, ni aayɔ obi nɔɔ Enok leyooto aatika okpoo nwu nɛ. 18 Ninfɛ baalofo Irad nɛ. Ni di Irad lalofo Mehuyael, ni di Mehuyael lalofo Metusael, ni di Metusael kafɔɔ kolofo Lamek nɛ.

19 Lamek layɔ basanko banyɔ, ɔkasale leyooto niale Ada, ɔnyɔɔfa leyooto niale Sila. 20 Ada lalofo Yabal, nnwɔɔ niale akpaayo kamɛ basiɛtɛ ku babɔkɛɛ basetɛ bamuu kote nɛ. 21 Obilɛma suɔtɔbi niale Yubal nɛ, nnwɔɔ niale sanku ku kakyukyuee bafɛtɛ bamuu kote nɛ. 22 Sila kafɔɔ lalofo Tuba-Kain, nwɔ niatɔɔbla ni akpɛnsaa ateate aatookyeko ni kupa ku abɔɔsaa kamɛ. Tuba-Kain obilɛma sankobi niale Naama nɛ.

23 Lamek latɔkɔ basɔfɔ nɔɔ alɛ,

<<Ada ku Sila, bikyɔɔ mi atoko;

Lamek basɔfɔ, binu mi ɔlaa.

Lalo osuɔtɔ onwii diekye aatika mi kakɔ,

okosopo onwii diekye aatika mi kakɔ.

24 Nse babatufu otii wɔ nimabla ni Kain lɛsaa lewo koto sikuɛnsĩ yi,

ni otii wɔ nimabla ni Lamek lɛsaa lewo, babatufu nwɔ koto afosi-akuɛnsĩ sikuɛnsĩ.>>

25 Adam lakple aatenko ɔsɔfɔ nɔɔ Ewa, ni aalofo obisuɔtɔbi nɛ. Ni di Ewa latɔɔ leyooto alɛ Set nɛ. Ni aabuɛ alɛ, <<Yaa lekple ɛɛtɛɛ obi bamba eese Abel kanya. Nnwɔ di Kain lalo nii.>> 26 Baalofo obisuɔtɔbi kafɔɔ baata Set ni aatika nwɔ leyooto alɛ Enos nɛ.

Obe nwu kamɛ, batii lakye kasɔ baatoosumu SAATE nɛ.