Kyenesis 23

Sara Kukpi Ku Okookaa Nɔɔ.

1 Sara lasiɛ nkpa aafũ alɛɛ kɔlafa afosi anyɔ akuɛnsĩ. 2 Aakpi di Kiriat Arba (ninle ni Hebron) di Kanaan kasɔ suoto. Ninfɛ di Abraham lakyɛ alɛ ɔɔlaawi nwɔ, ni aawi kaku di Sara suoto nɛ.

3 Ninfɛ di Abraham lataka di ɔsɔfɔ kpi ɔlɔɔkɔ ni aakyɛ aalatɔkɔ Hiti batii alɛ, 4 <<Ɔfɔɔ nle nsi ye kaamɛ. Bisunsũ kakookaasɔ kawo bitɛɛ nin-yɔ ɔsɔfɔ nii kpi naakookaa.>>

5 Ninfɛ di Hiti batii latɔkɔ Abraham alɛ, 6 <<Ɔnɔɔfo, nu ɔlaa loo wɔ buobuɛ ni. Ɔnɔɔfotii fale fiɛ fasi wo kaamɛ. Nyu ɔkya lele ninlɛ fɔ faakookaa nwɔ kaamɛ. Kuonwii loo dilabasĩ ata fɔ alɛ tankookaa ɔsɔfɔ lɛfɔ kpi di ɔkya nɔɔ kamɛ.>>

7 Ninfɛ di Abraham lataka awakosa suoto kasɔ aata kasɔ nwu nkpo batii ninle ni Hiti batii nɛ. 8 Ni aabuɛ alɛ, <<Nse bietuna bilɛ nkookaa otii nii ninfũ yi, ni binu mi ɔlaa bietikiti Efron Sohar obi lekoto bitɛɛ, 9 ni aayɔ Makpela ofuɔntuu wɔ ninle nwɔ ni ole kute ni di kofe nɔɔ kayɛntɛkɔ asunsũ atɛɛ. Bitɔkɔ nwɔ aasunsũ atɛɛ fɛ mmle boosunsũ ni nintɔɔ koto alɛ kawɛ batii kakookakɔ kaamɛ lee.>>

10 Kafɔɔ Efron Hiti otii nwu lasiɛ di batii lɛma nwu kamɛ, ni aadiki kanya aabuɛ aatɔkɔ Abraham di Hiti batii ba niawa ni di okpoo nwu nkpo kayoko lanu alɛ. 11 Aabuɛ alɛ <<Oowo, saate nii, nu ɔlaa wɔ kobuɛ ni; Lɛyɔ kasɔ nwu kamuu ku ofuɔntuu nwu nkpo lɛta fɔ di batii nii anu. Kookaa kpi lɛfɔ.>>

12 Ninfɛ di Abraham lakple aawakasɔ di kasɔ nwu nkpo batii anu, 13 ni aabuɛ aatɔkɔ Efron, batii nwu bamuu lanu alɛ, <<Nu mi ɔlaa, faatuna, ninta fɔ kasɔ nwu koto, faafũ ninkookaa ɔsɔfɔ nii kpi ninfa.>>

14 Ninfɛ di Efron ladiki Abraham kanya alɛ, 15 <<Nu mi ɔlaa, saate nii, kasɔ nwu kɔya kafũ koto fututu alafa ana, ɔlaa wɔ mmle diele ɔlaa kuonwii di munko fɔ ntɛɛ fiɛ! Kookaa ɔsɔfɔ lɛfɔ ninfa.>>

16 Abraham latũna di Efron ɔlaa nwu suoto, ni aakadi koto ko aabuɛ di Hiti batii lanu ni aatɔɔ di anu lɛma nɛ: Koto fututu onutũ alafa ana niale koto ko baatoofũ ni di asaa basunsũtɛ kamɛ di obe nwu kamɛ nɛ.

17 Nkpo oso Efron kofe nwu di Makpela diɛtɛɛtɛɛ ni Mamre labakple Abraham kole. Kofe nwu ku ofuɔtuu ku awoso ya niayila ni kɔɔmɛ suoto, 18 labakple Abraham ale di Hiti batii bamuu niawa ni okpoo nwu kayoko anu. 19 Nni sɛmaa, Abraham lakookaa ɔsɔfɔ nɔɔ Sara kpi di ofuɔtuu kofe di Makpela wɔ niɛtɛɛtɛɛ ni Mamre di Hebron di Kanaan kasɔ suoto. 20 Nioso Hiti batii ladiɛ kofe nwu ku ofuɔntuu nwu nkpo baata Abraham diakple nwɔ batii kakookaakɔ.