1 Di obe nwu kamɛ Sarai, Abram ɔsɔfɔ diiloolofo obi kuonwii ata ni Abram, kafɔɔ aawɛ Egipte ɔlanle sankobi onwii baatɔɔlɛɛ ni Hagar. 2 Ni aatɔkɔ Abram alɛ, <<Nyu! SAATE nwu dilɔɔtɛɛ obi nlofo. Tɔɔkyɛ falaayɔ ɔlanle sankobi nii nwu: loobia mawɛ babi bawo nklee.>>

Abram latũna di Sarai ɔlaa nwu suoto. 3 Nioso obe wɔ di Abram ntoosiɛ ni di Kanaan kasɔ suoto di alɛɛ lefosi sɛmaa, ni di Abram ɔsɔfɔ Sarai layɔ Egipte ɔlanle sankobi nɔɔ nwu Hagar aata ɔsa alɛ ayɔ nɛ. 4 Ni aatenko Hagar, ni aalaka lɛmɛ nɛ.

Obe wɔ aatofo alɛ nfɛ alaka ni lɛmɛ, ni aakyako ɔya nwu onyu nyakatãa nɛ. 5 Ninfɛ di Sarai latɔkɔ Abram alɛ, <<Afɔ ninkyɛnko oso oonyu mi nyakatãa. Ami niayɔ ɔlanle sankobi nii lata fɔ, nunua nfɛ aye alɛ alaka ni lɛmɛ, ninfɛ oonyu mi nyakatãa nɛ. Saate nwu aka ɔlaa wɔ mmle ata munko fɔ.>>

6 Ninfɛ di Abram latɔkɔ Sarai alɛ, <<Nyu lo! ɔlanle lɛfɔ ale. Bla nwɔ mmle fɛɛnya falɛ dilɛ ni.>> Ninfɛ di Sarai lakyako nwɔ okukuo nɛ, ni aatoso aasifi nɛ.

7 Saate tɔkyɛntɛ lanya Hagar di ntu kataakɔ kanwii di ɔfaafuu, diale ntu kataakɔ ka niakaako ni Sur osuku nwu. 8 Ninfɛ aakaalɛ alɛ, <<Hagar, Sarai ɔlanle fɛ feekye, ɔfɛ foofe kafɔɔ?>>

Ni aabuɛ alɛ, <<Otoso kotoso nkye ɔyaafɔ nii Sarai nfũ.>>

9 Ninfɛ di Saate tɔkyɛntɛ nwu nkpo latɔkɔ nwɔ alɛ, <<Kple fatɔɔkyɛ ɔyaafɔ lɛfɔ nfũ faawakosa suoto kasɔ fatɔɔ.>> 10 Ninfɛ di tɔkyɛntɛ nwu nkpo labuɛ alɛ, <<Kamata banantii lɛfɔ mpɔ kpinwu alɛ blɔbafuo ma ɔka.>>

11 SAATE nwu tɔkyɛntɛ nwu kafɔɔ labuɛ alɛ,

<<Nfɛ falaka lɛmɛ

fabalofo obisuɔtɔbi kafɔɔ.

Faatika nwɔ leyooto Ismael,

diekye SAATE nwu ntoonu sɛnyaami lɛfɔ se faawi fakpe nwɔ ni di dibuo lɛfɔ kamɛ.

12 Abasiɛ nkpa yakayaka di otii kuonwii dilɔbafuo ni oklee, obe lele abakyɛ antookyi:

abataka anyila di otii biala suoto

otii biala kafɔɔ mataka anyila nwɔ di suoto,

abasiɛ ɔblɔ nkpa amblasa suoto

di batii nɔɔ bamuu suoto.>>

13 Ni aayɔ leyooto le mmle aata Saate wɔ niakakatɛko nwɔ ni alɛ, <<Afɔ ninle Yaa wɔ niɛnyɛɛ nii,>> diekye aabuɛ alɛ, <<Ntɔɔnya Otii wɔ ninnyɛɛ nii.>> 14 Nkpo oso bɔɔlɛɛ ntu kataakɔ nwu nkpo alɛ, Beer Lahai Roi. Diekple dite di Kades ku Bered obo.

15 Nioso Hagar lalofo obisuɔtɔbi aata Abram, ninfɛ di Abram latika osuɔtɔbi nwu aalofo ni leyooto alɛ Ismael nɛ. 16 Abram lafũ alɛɛ afosi anɛ alɛɛ akuɔ di obe wɔ di Hagar lalofo Ismael aatɔɔ nii.