1 Obe owo sɛmaa, Yaa lasɔ Abraham aanyu. Alɛɛ nwɔ alɛ, <<Abraham!>>

Aatuna alɛ, <<Nnyɛɛ!>>

2 Yaa latɔkɔ nwɔ alɛ, <<Yɔ obisuɔtɔbi lɛfɔ nwu, obisuɔtɔbi lɛfɔ onwii nwu Isak wɔ fambɔmbɔ ni, faatɔɔkyɛ Moriak kasɔ suoto. Faayɔ nwɔ falaabla asaa ofiɛ oleɔta di abokote ya matuo fɔ ni kunwii suoto.>>

3 Kolesɛtũ Abraham lataka aabudi oleɔta ntɔɔni nwo ni aanii atoo aatika di bɔkɛɛ wɔ nintuka ni atoo suoto, ni aakpaa obi nɔɔ Isak ku bakpɛmblatɛ nɔɔ banyɔ aakyakaa di suoto nɛ. Ni baayefe osuku baasifi lɛba le di Yaa latɔkɔ nwɔ ni nɛ. 4 Di dii tiɛfa suoto, Abraham latakatɛsa anu aanyu katoo ni aanya lɛba nwu fanfa nɛ. 5 Ninfɛ aatɔkɔ bakpɛmblatɛ nɔɔ nwu alɛ, <<Bisiɛ ninfũ bisokoe ku bɔkɛɛ wɔ nintuka ni atoo. Munko obi nii buɔkyɛ nfa munasumu Yaa munkple munwa ye ɔkyɛ.>>

6 Abraham layɔ asaa ofiɛ oleɔta ntɔɔni nwu nkpo aatukasa obi nɔɔ Isak, ninfɛ di nnwɔɔ kafɔɔ aaklee ɔtɔ ku kapamii nɛ. Obe wɔ di batii lɛma banyɔ nfɛ nkyɛ boosifi nii, 7 Isak lalɛɛ ote Abraham alɛ, <<Teete!>>

Abraham latũna alɛ, <<Obi!>>

Ni di Isak lakaalɛ alɛ, <<Bukle ɔtɔ ku ntɔɔni ninfũ, ni lefosobi le bubayɔ munta ni asaa ofiɛ oleɔta mɔ?>>

8 Abraham ladiki kanya aabuɛ alɛ, <<Obi nii, Yaa omu nimata lefosobi nwu munta asaa ofiɛ oleɔta nwu.>> Ninfɛ di banyɔ lɛma baakyɛ baasifi nɛ.

9 Obe wɔ baadu ni lɛba le di Yaa latɔkɔ nwɔ nii, ninfɛ di Abraham lapɛ oleɔta akyikye ninfa, ni aayɔ ntɔɔni aatitika nɛ. Ninfɛ aanii obi nɔɔ Isak, aayɔ nwɔ aatika di oleɔta akyikye nwu suoto di ntɔɔni osi nɛ. 10 Ninfɛ aayɔ kapamii alɛ oolo obi nwu nkpo nɛ. 11 Kafɔɔ Saate tɔkyɛntɛ lalɛɛ nwɔ aakyeko di osi alɛ, <<Abraham! Abraham!>>

Ni aadiki kanya alɛ, <<Nnyɛɛ!>>

12 Ni di tɔkyɛntɛ nwu latɔkɔ nwɔ alɛ, <<Tankpanko obisɔ nwu, tambla nwɔ lɛsalɛsaa. Mmia nfɛ lɛnya nlɛ fɔɔyɛkɛ Yaa nɛ. Diekye faasĩ mi obi lɛfɔ onwii nwu lete ɔyɔ ɔta.>>

13 Ninfɛ di Abraham latakatɛsa anu aanyu, ni aanya dikũnumuu lekpee akya di dikumii ninwii diyɛ nwɔ di ɔlɔɔkɔ ni aakyɛ aalaadiki ni aayɔ aata asaa ofiɛ oleɔta di obi disi nɛ. 14 Nioso Abraham latika lɛba nwu leyooto alɛ, <<Saate Kamata.>> Bia mmiɛ batii mbuɛ alɛ, <<Di Saate kobokote osi suoto, babata.>>

15 Ni di Saate tɔkyɛntɛ lakple aalɛɛ Abraham aakyeko osi lɛnyɔɔfa nɛ. 16 Ni aabuɛ alɛ, <<Saate alɛ lɛka di suoto nii, ta fɛɛbla ni nle mmle, fanansĩ nwɔ ni obi lɛfɔ onwii nwu lete ɔyɔ ɔta yi, 17 kamanyu nlɛ lewii fɔ lɛyɔɔ, lɛta banantii lɛfɔ lɛpɔ fɛ awɛntrɛbi di osi ku lekpo ɔtɛnsĩa. Banantii lɛfɔ mafũ balo lɛma sekpoo sinkple ma sele. 18 Diefe ni baanantii lɛfɔ suoto babawii nnle mmuu lɛyɔɔ, diekye feenu mi ɔlaa.>>

19 Ninfɛ di Abraham lakple aasifi bakpɛmblatɛ nɔɔ nfũ, ni di bamuu lɛma baakple baasifi Beerseba nɛ. Ni di Abraham lasiɛ di Beerseba nɛ.

20 Sɛlaa se mmle sɛmaa, baatɔkɔ Abraham alɛ, <<Milka kafɔɔ ntoolofo babisuɔtɔbi ɛɛta obilee Nahor: 21 Us niale obi kasale, Bus niale obilɛma, Kemuel (Aram ote), 22 Kesed, Haso, Pildas, Yidlaf ku Betuel.>> 23 Betuel lalofo Rebeka. Milka lalofo babisuɔtɔbi ba mmle banɛ aata Abraham obilɛma Nahor. 24 Nahor ɔsɔnɔ wɔ baatɔɔlɛɛ ni Reuma kafɔɔ lalofo babisuɔtɔbi bana: Ayooto lɛma niale Teba, Gaham, Tahas ku Maaka nɛ.