1 Nioso Abram ku ɔsɔfɔ ladie di Egipte ku lɛsaawɛ nɔɔ nimuu, Lot kafɔɔ latikanko ma baasifi Kanaan nkpaalɔ kasɔ. 2 Abram labakple saawɛntɛ kplɛ. Aawɛ babɔkɛɛ sele ku koto fututu ku koto sɛɛle.

3 Diadie ni di nkpaalɔ kasɔ nwu aakyi aalaadu Betel, di lɛba le ninsi ni di Betel ku Ai obo nfũ aapɛ ni lɛkpaayo nɔɔ kasale 4 ku lɛba le aapɛ ni oleɔta akyikye kasale. Nfa di Abram lasumu Saate nɛ.

5 Lot wɔ niatɔɔkyɛ ni ku Abram, kafɔɔ lawɛ bafoso, banankyue ku akpaayo. 6 Nioso kasɔ nwu nkpo ditapɔ kaata banyɔ lɛma alɛ baasiɛ mankaako bawo, diekye lɛsaawɛ lɛma lapɔ kpinwu alɛ batafuo osiɛ ɔkaako bawo. 7 Nioso kalɔ labuo di Abram babɔkɛɛbakpatɛ ku Lot babɔkɛɛbakpatɛ ntɛɛ. Kanaan batii ku Perisi batii kafɔɔ lasiɛ di kasɔ nwu suoto di obe nwu kamɛ.

8 Nioso Abram latɔkɔ Lot alɛ, <<Tanta kalɔ kukanwii lasiɛ di munko fɔ ntɛɛ, ee kaasiɛ di babɔkɛɛbakpatɛ lɛfɔ ku bale mi ntɛɛ, diekye banwii bule. 9 Sɛɛ diele kasɔ nwu kamuu ninte di anu lɛfɔ nɛ? Ta bubla baawo. Nse feediki ɔmɛntukyɛ yi, kamayɔ oletanɛɛkyɛ; nse feediki oletanɛɛkyɛ yi, kamayɔ ɔmɛntukyɛ.>>

10 Lot latakatɛsa anu aanyu kasɔ lakataa nwu di Yordan, koofe ni Soar, ntu lawɛ fɛ nka ninte ni di SAATE nwu kɔba fɛle Egipte kasɔ. (Diekye obe nwu SAATE nwu diiwɔɔsa Sodom ku Gomora). 11 Nioso Lot ladiki kasɔ lakataa nwu kamuu ninte ni di Yordan, ni aadie aasifi nfa di kufĩ katunkɔ nɛ. Nkpo nfɛ di batii ba mmle banyɔ ntɛɛ lasɛ nɛ. 12 Abram lasiɛ di Kanaan kasɔ suoto, ni di Lot lasiɛ sekpoo se niawɛ ni di kasɔ lakataa ntɛɛ nwu aatɔɔpɛ akpaayo nɔɔ aakaakosa Sodom nɛ. 13 Sodom batii kafɔɔ lale batii kpile baatɔɔbla sikpile kpinwu di Saate suoto.

14 Obe wɔ di Lot ntɔɔbla ni di Abram suoto eeloo nii, ni di Saate latɔkɔ Abram alɛ, <<Takatɛsa anu ninfũ fayɛ ni faanyu katoo ku kala, kufĩ katunkɔ ku kamɛɛkɔ. 15 Kamayɔ kasɔ ka kamuu fɛɛnya ni nta fɔ ku banantii lɛfɔ dinaa ni kaloo. 16 Kamata banantii lɛfɔ mpɔ fɛ kudu kaasɔ, alɛ nse otii owo lefuo kudu nwu ɔka yi, ni babafuo fɔ banantii kafɔɔ ɔka nɛ. 17 Taka, faalaakyɛ di kasɔ nwu nkpo kanɛ ku lɛblɛfɛ suoto, diekye afɔ kɔyɔ ka nta.>>

18 Nioso Abram lakpa akpaayo nɔɔ, ni aasifi aalaasiɛ di Mamre awoso kplɛ ɔlɔɔkɔ di Hebron, ni aapɛ oleɔta akyikye ninfa aata Saate nɛ.