1 Di obe nwu nkpo kamɛ, Yuda lasifi aadiɛ babilɛma suɔtɔbi aalaasiɛ di osuɔtɔ onwii manlɛɛ ni Hira, aakye ni Adulam ɔkyɛ. 2 Nfa di Yuda lanya Kanaan osuɔtɔ onwii manlɛɛ ni Sua obisankobi nɛ. Ni aayɔ nwɔ ni aatenko nwɔ nɛ; 3 ni aalaka lɛmɛ aalofo obisuɔtɔbi, ni baatika nwɔ leyooto alɛ Er nɛ. 4 Aakple aalaka lɛmɛ aalofo obisuɔtɔbi ni baatika nwɔ leyooto alɛ Onan nɛ. 5 Ni aakple aalaka lɛmɛ aalofo obisuɔtɔbi bamba ni baatika nwɔ leyooto alɛ Sela nɛ. Kesib aawɛ fiɛ aalofo nwɔ.

6 Yuda lakaalɛ ɔsanko wɔ manlɛɛ ni Tama aata obisuɔtɔbi nɔɔ kasale Er. 7 Kafɔɔ Er wɔ niale ni Yuda obisuɔtɔbi kasale labla okpile di Saate nwu anu; nioso Saate nwu lalo nwɔ.

8 Ni di Yuda latɔkɔ Onan alɛ, <<Yɔ obilee suɔtɔbi ɔsɔfɔ nwu, faatenko nwɔ faalofo babi fata obilee suɔtɔbi.>> 9 Kafɔɔ Onan latofo alɛ babi nwu dilɔbale nwɔ bale; nioso nse ootenko obilɛma ɔsɔfɔ nwu yi, andiki alombi nɔɔ an-wii kaasɔ ta mmle ɔnɔmalofo ata ni obilɛma suɔtɔbi oso. 10 Lɛsaa le aabla ni lale lɛsaa kpile di Saate nwu anu; nioso aalo nnwɔɔ kafɔɔ.

11 Ninfɛ di Yuda latɔkɔ obisɔfɔ nɔɔ Tama alɛ, <<Tɔɔkyɛ falaasiɛ di teefɔ leyo fɛ kpisɔfɔ dilaase di obe wɔ di obisuɔtɔbi nii Sela kamamuɔ ni.>> Diekye aanyu alɛ, <<Loo nnwɔɔ kafɔɔ abakpi fɛle babilɛma suɔtɔbi okle.>> Nioso Tama lasifi aalaasiɛ di ote leyo.

12 Di obe kpinwu sɛmaa, Yuda ɔsɔfɔ, niale ni Sua obisankobi lakpi. Di Yuda laloo ni okusii yi, nnwɔɔ ku siɛwo nɔɔ Hira wɔ niale ni Adulam otii baakyɛ Timnat di basuɔtɔ ba niatoonwiɛ ni bafoso nɔɔ sinwini nfũ nɛ.

13 Otii onwii latɔkɔ Tama alɛ, <<Ɔsa lɛfɔ ote kofe Timnat ɔlaanwiɛ bafoso nɔɔ sinwini.>> 14 Nioso aadiki sikpisɔfɔ abula aatɛ, aayɔ anuditĩisaa aatĩi anu nɔɔ, aakakatu suoto aalaasiɛ di Enaim kasukunya ka niawɛ ni di Timnat osuku. Tama latofo alɛ Sela ntoomuɔ, kafɔɔ Yuda diiyɔ nwɔ atɔɔ alɛ ayɔ.

15 Obe wɔ di Yuda lanyɔɔ nii, aanyu alɛ loo sɔnɔkpeetɛ aale, diekye aatĩi anu nɔɔ. 16 Yuda ditatofo alɛ obisɔfɔ nɔɔ diale, ni aakyɛ ɔkyɛ nɔɔ di osuku kotoko nwu aalaatɔkɔ nwɔ alɛ, <<Wa ninaatenko fɔ.>>

Ni aakaalɛ nwɔ alɛ, <<Be lɛsaa fabatɛɛ nse feetenkoe?>>

17 Ninfɛ di Yuda latɔkɔ nwɔ alɛ, <<Kamakyesee fɔ tie kabitɛ di batie nii kamɛ.>>

Ni di Tama lakaalɛ nwɔ alɛ, <<Fabayɔ lɛsaa lewo fanse kamaa ninaase di obe wɔ fabakyesee mi ni tie nwu?>>

18 Ni di Yuda lakaalɛ nwɔ alɛ, <<Obe lɛsaa nin-yɔ nse kamaa nta fɔ?>>

Ninfɛ aatɔkɔ nwɔ alɛ, <<Yɔ lɛkɔnii le di leyooto lɛfɔ ntika ni, fɛɛpɛ ni lɛkpa feekpee ni siimu ku ɔkyɛnwoso lɛfɔ wɔ fakle ni kɔɔnɛɛ fatɛɛ.>> Nioso aayɔ nya aatɔɔ, ni aatenko nwɔ, ni aalaka nwɔ lɛmɛ nɛ. 19 Di obe wɔ di Tama lasifi nii, aatekete anu ditĩisaa nwu aakplesa sikpisɔfɔ nɔɔ abula aaklee.

20 Nni sɛmaa Yuda layɔ tie kabitɛ nwu aata siɛwo nɔɔ Adulam otii nwu alɛ akyɛnko aalaafũ kamaa asesaa nɔɔ di ɔsanko nwu ɔkyɛ awako nwɔ. Kafɔɔ siɛwo nɔɔ nwu ditanya ɔsanko nwu. 21 Nioso aakaalɛ basuɔtɔ ba niasiɛ ni ninfa alɛ, <<Ɔfɛ di afiɔ sɔnɔkpeetɛ* wɔ niasiɛ ni di osuku kotoko di Enaim nkpe?>>

Ni di basuɔtɔ nwu latɔkɔ nwɔ alɛ, <<Afiɔ sɔnɔkpeetɛ kuonwii nnaa ninfũ.>>

22 Nioso aakple aasifi aalaatɔkɔ Yuda alɛ, <<Ninaanya ɔsanko nwu. Diɛkyakaa nii, basuɔtɔ ba ninsi ni ninfa alɛ, <Afiɔ sɔnɔkpeetɛ kuonwii nnaa ninfũ.> >>

23 Ninfɛ di Yuda labuɛ alɛ, <<Aafuo asaa nwu ɔyɔ, nse diele nkpo batii kamatɔɔma wo. Nyu, ami lɛyɔ tie kabitɛ ka mmle lekyesee nwɔ, kafɔɔ faanyɔɔ fayɔ fatɔɔ.>>

24 Fɛle awɛntɛ atiɛ sɛmaa, otii onwii latɔkɔ Yuda alɛ, <<Obisɔfɔ lɛfɔ Tama lekpee asɔnɔ, nioso nunua nfɛ alaka lɛmɛ!>>

Ninfɛ di Yuda labuɛ alɛ, <<Binanfi nwɔ bidieko di okpoo bielo nwɔ biekpee nwɔ ɔtɔ bifiɛ!>>

25 Bakle nwɔ boodieko ni yi, aakpee ɔsa nɔɔ ote otii aabuɛ alɛ, <<Osuɔtɔ wɔ nimba ni asaa ya mmle niekpee mi lɛmɛ.>> Aakple aabuɛ alɛ, <<Binyu nse bibatofo otii wɔ lɛkɔnii ku lɛkpa ku ɔkyɛnwoso ninle ni n-ya mmle.>>

26 Ninfɛ di Yuda lanya asaa nwu aatɛ nsũ ni aabuɛ alɛ, <<Ɔsanko nwu lɛbla tinini alenke mi, diekye ami ninan-yɔ nwɔ nta obisuɔtɔbi nii Sela ayɔ.>> Nioso Yuda ditasinkple aatenko ɔsanko nwu.

27 Di obe lawo aalofo nii, basuɔtɔbi atabi anyɔ aale kaafutu nɔɔ kamɛ. 28 Aatoolofo nii, onwii lɛma ladiki kɔnɛɛ nɔɔ; nioso lofosatɛ nwu layɔ okũ sɛɛle aanii nwɔ kaanɛɛtũ aabuɛ alɛ, <<Nnwɔ mmle niɛkasa odie nɛ.>> 29 Kafɔɔ aakple aamɛɛsa kɔnɛɛ nɔɔ, ni di obilɛma ladie aawa nɛ, ni aabuɛ alɛ, <<Nioso osuku wɔ mmle feefe fɛɛwa nɛ?>> Ni aatika nwɔ leyooto alɛ Peres* nɛ. 30 Nni sɛmaa obilɛma wɔ baanii ni okũ sɛɛle kaanɛɛtũ nɔɔ ladie nɛ, ni baatika nwɔ leyooto alɛ Sera* nɛ.