1 Nioso nkpo aaloo osi ku kasɔ ku asaa ya amuu ninsi ni kaamɛ ɔbla nɛ.

2 Di dii kuɛnsinle Yaa laloo ɔkpɛ wɔ aatɔɔbla ni ɔbla, ni aatɛ ɔnyɛɛ di dii kuɛnsinle nwu nkpo suoto di sɛkpɛ nɔɔ ɔbla kamɛ nɛ. 3 Ni di Yaa lawii dii kuɛnsinle nwu nkpo lɛyɔɔ ni aabla ni klekle nɛ, diekye dii nwu nkpo suoto aatɛ ɔnyɛɛ di ɔkpɛ wɔ omuu aabla ni di asaa ya aabla ni suoto nɛ.

4 Nnya mmle okle diawa ni di obe wɔ baabla ni osi ku kasɔ.

Obe wɔ di SAATE Yaa labla ni kasɔ ku osi yi, 5 lepoo kamɛ kowoso kukunwii ditayila kaasɔ ee ɔfa kuonwii ditayila, diekye SAATE Yaa diita kanto anɔɔ akpete ka ee otii kuonwii nnaa abakpɛ ka nii. 6 Kafɔɔ seklenyii ntaa sinkye kasɔ kamɛ simakpekpete kaasɔ nwu kamuu anu. 7 Ninfɛ di Saate Yaa layɔ kɔtɛ kaasɔ aabla osuɔtɔ, ni aanwuna nkpa ninwuna aakpete nwɔ di onwu kamɛ, ni di osuɔtɔ nwu lakple otii wɔ ninkpe ni nkpa nɛ.

8 Ninfɛ di Saate Yaa labla kɔba di Eden, di kufĩ katunkɔ, ni aayɔ osuɔtɔ wɔ aabla nii aalaakpee ninfa nɛ. 9 Ninfɛ di Saate Yaa lata awoso ate ate ya nikɔlɛ ni onyu, ku n-ya abi ninlɛ kafɔɔ alɛ baale ni lakɔntɔ kaasɔ nwu suoto nɛ. Di kɔba nwu nkpo ntɛɛ yi, nkpa kowoso ku lɛsaatofo kowoso, ɛɛta ni dibiene ku okpile layila.

10 Okle onwii labiɛ kuakye Eden kuatookpete kɔba nwu ntu; diayɔ ni ninfa kuasɛ kuabla ekle ɛna. 11 Ɔkasale leyooto ninle Pison, nwu ninle okle wɔ niebiɛ kuokyi ni Hawila kasɔ kamuu suoto, nfũ kooto sɛɛle nkpe ni nɛ. 12 (Koto sɛɛle nwu kaasɔ nwu suoto lɛtɛ kulɛ. Akɔnɔkɔnɔsaa bɔɔlɛɛ ni bedolas ku afuɔ ya niefũ ni kɔya bɔɔlɛɛ ni oniks nkpe ninfa.) 13 Okle nyɔɔfa leyooto ninle Gison, kuobiɛ kuokyi Kus kasɔ kamuu suoto. 14 Okle tiɛfa leyooto ninle Tiklis nwu kuobiɛ kuofe di Assur kasɔ suoto di kufĩ katunkɔ. Okle naafa kafɔɔ ninle Eufrate nɛ.

15 Ninfɛ di Saate Yaa layɔ otii aakpee di Eden kɔba nwu kamɛ alɛ akpɛ aatoonyu kũ nɛ. 16 Ninfɛ di Saate Yaa lakpee osuɔtɔ nwu kufiofa alɛ, <<Le kowoso biala dibi di kɔba nwu kamɛ fãa. 17 Kafɔɔ kowoso ko ninta ni lɛsaatofo diɛta ni dibiene ku dikpile dibi yi, tanle. Nse fɛɛnwaanii feele, kubio fabakpi.>>

18 Ninfɛ di Saate Yaa labuɛ alɛ, <<Diɛlɛ alɛ osuɔtɔ kasiɛ lete nɔɔ. Kamabla kyakaakotɛ wɔ niesiɛko ni ntɔɔ.>>

19 Nioso Saate Yaa layɔ kɔtɛ aabla lepoo kamɛ babɔkɛɛ bamuu ku bakansiɛ bamuu ninflɛlɛtɛ ni kɔɔfɛɛfɔ kamɛ. Ni aakpaa ma aakyɛnko otii nfũ alɛ anyu mmle okle aata ma ni ayooto nɛ. Nioso mmle okle di otii lalɛɛ ni bɔkɛɛ biala ninkpe ni nkpa, nkpo okle niale ma ayooto nɛ. 20 Nioso otii nwu lata babɔkɛɛ sele bamuu ayooto, bakansiɛ ba ninflɛlɛtɛ ni kɔɔfɛɛfɔ kamɛ ku lepoo kamɛ babɔkɛɛ bamuu ayooto.

Kafɔɔ Adam nnwɔɔ, atawɛ kyakaakotɛ wɔ niesiɛko nwɔ nii. 21 Nioso Saate Yaa lata osuɔtɔ nwu labuo di sɛkyɔsĩ aasifi kamɛ, di obe wɔ ɔɔkyɔsĩi nii, ni aadiki nwɔ ɔfɛkɛnfɛ-wesee onwii, ni aatĩi lɛba nwu ku suoto sina nɛ. 22 Ninfɛ di Saate Yaa labla ɔsanko aakyeko ɔfɛkɛnfɛ-wesee wɔ aadiki ni di osuɔtɔ kamɛ, ni aakpaa nwɔ aawako osuɔtɔ nwu nɛ.

23 Ninfɛ di osuɔtɔ nwu labuɛ alɛ,

<<Mia nfɛ nɛ! Nle mmle ninle dikufi le niekye ni akufi nii kamɛ

ku sina se niekye ni sina nii kamɛ nɛ;

Baalɛɛ nwɔ alɛ <Ɔsanko,>

diekye osuɔtɔ kamɛ beediki nwɔ beekyeko.>>

24 Nle mmle oso, osuɔtɔ madie andiɛ ote ku ɔya manaabla onwii ku ɔsɔfɔ, mankple suoto sina sinwii.

25 Osuɔtɔ nwu ku ɔsɔfɔ, banyɔ lɛma baasiɛ lɛkyɔtɔ, kafɔɔ sinunsɔ ditatɔɔkpɛ ma.