1 Ninfɛ di Yosef latɔkɔ kpɛmblatɛ nɔɔfo nɔɔ alɛ: <<Yiisa basuɔtɔ nwu bakotoku ku atitabi pɔ di mmle babafuo ni otuka, faayɔ obiala lɛma koto fakpee di kotoku nɔɔ kamɛ. 2 Faayɔ koto fututu nii opũ nwu ku atitabi nɔɔ koto fututu fakpee di obisɔnle kotoku kamɛ.>> Nioso aabla fɛ mmle di Yosef latɔkɔ nwɔ nii.

3 Kaleesɛ kuyitatũ, basuɔtɔ nwu layefe osuku ku babɔkɛɛ lɛma ba nintuka ni atoo baatoosifi okpoo lɛma. 4 Di obe wɔ manadikyɛ ni kakyonkɔ di okpoo nwu, Yosef latɔkɔ kpɛmblatɛ nɔɔfo nɔɔ nwu alɛ, <<Ti basuɔtɔ nwu nunua, nse fɛɛwɛ ma faakaalɛ ma falɛ, <Be oso biɛyɔ dikpile biɛta dibiene koto? 5 Diele opũ wɔ mmle kamɛ di saate nii n-yɔ anyi ntu, an-yɔ nwu kafɔɔ ampɛ sɛbɔ nɛ? Lɛsaa kpile ninle nle mmle biɛbla ni nɛ.> >>

6 Obe wɔ di kpɛmblatɛ nwu lalaawɛ ma nii, aatɔkɔ ma fɛ mmle alɛ atɔkɔ ma nii. 7 Kafɔɔ baatɔkɔ nwɔ alɛ, <<Be oso di saate loo kabuɛ sɛlaa se mmle nkpo? Nle mmle dikyɛ di okyo, alɛ buabla lɛsaa fɛ nle mmle okle! 8 Bia buakplesa koto fututu ko buanya ni di bakotoku loo kamɛ di Kanaan kasɔ buawako. Ni be oso nfɛ buayu koto fututu ee koto sɛɛle di saate lee leyo? 9 Nse fɛɛnya nwu di onwii loo ɔkyɛ, faalo nwɔ; ni babule loo kafɔɔ bubakple balanle munta saate loo.>>

10 Ni di osuɔtɔ nwu latuna alɛ, <<Yioo, kulɛ, mabla fɛ mmle feebuɛ nii. Otii lele ɔkyɛ lɛnya opũ nwu nkpo makple mi ɔlanle; ole ku onwii dilɔbawɛ di babule lee suoto.>>

11 Obiala lɛma lapɛsɛwa aasoosa kotoku nɔɔ aatɛ kaasɔ aafukuti kanya. 12 Ninfɛ di kpɛmblatɛ nɔɔfo nwu lakyako opũ nwu owolaa nɛ. Aakye kasɔ ku ɔnɔɔfole aalaayɛntɛ ku obisɔnle. Ni aanya opũ nwu di Benyamin kotoku kamɛ nɛ. 13 Nkpo oso baabɛbɛɛ akpeele lɛma. Ni baakplesa atoo baatika di babɔkɛɛ lɛma ba nintuka ni atoo suoto baakple baasifi okpoo kplɛ nwu nɛ.

14 Yosef lakple aawɛ leeyo fiɛ di Yuda ku babilɛma suɔtɔbi lawa babapɛ akunkyi kaasɔ di anu nɔɔ. 15 Ni di Yosef lakaalɛ ma alɛ, <<Be lɛsaa biɛbla nkpo nɛ? Bieye bilɛ osuɔtɔ fɛ ami okle mpɛ sɛbɔ?>>

16 Ni di Yuda ladiki kanya alɛ, <<Be ninkpe wo mumbuɛ muntɔkɔ saate loo? Be buobuɛ? Lɛ nfɛ buale lɛbɛ? Yaa nintoodiki bakpɛmblatɛ lɛfɔ sikpile kayi. Awo ku nnwɔ kotoku kamɛ bɛɛnya ni opũ nwu, saate loo balanle nfɛ bule.>>

17 Kafɔɔ Yosef labuɛ alɛ, <<Kpaoo, ami nɔmafuo lɛsaa le mmle ɔbla! Osuɔtɔ wɔ kotoku kamɛ bɛɛnya ni opũ nwu lete nimale mi ɔlanle. Aye ba niebu nii bikple bitɔɔkyɛ teeye nfũ ku atoko ɔkyɛ ole.>>

18 Ninfɛ di Yuda lakpukuti aatɛɛtɛɛ Yosef aatɔkɔ nwɔ alɛ: <<Lekoto, saate nii, ta kpɛmblatɛ lɛfɔ abuɛ ɔlaa onwii atɔkɔ saate nii. Tannya ɔblɔ faakpeeko kpɛmblatɛ lɛfɔ, kuntɛ minko Farao omu bikyɛkyɛ. 19 Afɔ saate nii faakaalɛ bakpɛmblatɛ lɛfɔ falɛ, <Teeye ee obilɛma osuɔtɔbi bamba lekple akpe ye?> 20 Buadiki kanya bulɛ, <Bukpe kote ko nintoobe ni, akpe obisuɔtɔbi baalofo baatɔɔ ni di sɛnɔɔfo nɔɔ kamɛ. Obilɛma suɔtɔbi ntookpi, lete nɔɔ nfɛ ninle ɔya obisuɔtɔbi wɔ niebu ni nɛ, ote kafɔɔ mbɔmbɔ nwɔ.

21 <<Ni faatɔkɔ wo falɛ, <Bikpaa nwɔ biwakoe di ami omu nnyɔɔ.> 22 Ni buatɔkɔ fɔ bulɛ, <Osuɔtɔbi nwu dilɔbafuo odie odiɛ ote; nse eedie eediɛ nwɔ, ote nwu makpi.> 23 Kafɔɔ faatɔkɔ wo falɛ, <Nse biɛkpaa obilee suɔtɔbi bisɔnle biwako, ni bitanwa mi anu.> 24 Buakple buasifi ni kpɛmblatɛ lɛfɔ, teemi nfũ yi, buatɔkɔ nwɔ ɔlaa wɔ di afɔ saate nii labuɛ nii.

25 <<Ni di teewo latɔkɔ wo alɛ, <Bikple bikyɛ biɛlaaya atitabi awo biwako.> 26 Kafɔɔ buatɔkɔ nwɔ bulɛ, <Bulɔbafuo okple ɔkyɛ. Fiɛ bubakyɛ nii, diediki obiloo suɔtɔbi bisɔnle letikanko wo. Bulɔbafuo osuɔtɔ nwu anu ɔnya nse osuɔtɔbi loo bisɔnle diesi wo kaamɛ.>

27 <<Ninfɛ di kpɛmblatɛ lɛfɔ teemi latɔkɔ wo alɛ, <Biye bilɛ babisuɔtɔbi banyɔ di ɔsɔfɔ nii lalofo aatɛɛ. 28 Onwii ntoosifi eediɛ mi, ni labuɛ nlɛ, <<Bɔkɛɛ kplɛ owo labɛbɛɛ nwɔ kɔkyɛɛkɔkyɛɛ.>> Diayɔ ni di obe nwu kamaa ninsinnyɔɔ. 29 Nse biɛkpaa nnwɔ mmle kafɔɔ biesifiko di ɔlaa kpile owo lɛwa nwɔ di suoto, ni bibata disi fututu nii mbuo di ɔkya kamɛ ku sɛnyaami.>

30 <<Nioso nunua, nse lɛkyɛ teemi kpɛmblatɛ lɛfɔ nfũ, di osuɔtɔbi nwu di teemi mbɔmbɔ ni nwaa, 31 ɛɛnya alɛ osuɔtɔbi nwu diesiwo kaamɛ yi, ni abakpi. Ni awo bakpɛmblatɛ lɛfɔ mata teewo disi fututu nwu mbuo di ɔkya kamɛ ku sɛnyaami. 32 Ami kpɛmblatɛ lɛfɔ niayila kamaa latɔkɔ teemi nlɛ, malolaa osuɔtɔbi nwu nnyu nwaa. Latɔkɔ nwɔ nlɛ, <Nse ninkpleko nwɔ nwako fɔ, ni teete, lekpi fɔ lɛpɔɔ di nkpa nii mmuu kamɛ!>

33 <<Nioso lekoto, ta kpɛmblatɛ lɛfɔ asiɛ ninfũ fɛ saate nii ɔlanle di osuɔtɔbi nwu disi, faata osuɔtɔbi nwu akple asifi manko babilɛma suɔtɔbi. 34 Lɛ makple nsifi teemi nfũ alɛ osuɔtɔbi nwu dietikanko mi? Oowo! Tantɛɛ lanya mmle di teemi mabuo ni sɛnyaami ku anu.>>