1 Yakob lanu mmle di Laban babisuɔtɔbi latoobuɛ ni alɛ, <<Yakob ntoofũ lɛsaa biala ninkpe ni teewo, lɛsaawɛ le nimuu ninkpe nwɔ nii teewo nfũ diekye.>> 2 Yakob kafɔɔ latofo alɛ manko Laban kasiɛ ntookyi.

3 Ni di SAATE nwu latɔkɔ Yakob alɛ, <<Kple fasifi bate lɛfɔ ku banantii lɛfɔ kasɔ suoto, kamasiɛko fɔ.>>

4 Nioso Yakob lata Rahel ku Lea kanya alɛ badie bawa kofe di nfũ di babɔkɛɛ nɔɔ n-yɛ ni. 5 Ni aatɔkɔ ma alɛ, <<Ntɔɔnya nlɛ teeye nkpa ntookyi di suoto nii, kafɔɔ teemi Yaa nsiko mi. 6 Biye bilɛ ntɔɔbla ɔkpɛ ku osie nii omuu lɛta teeye,

7 kafɔɔ teeye lɛtafaa mi, aakyɛlɛnsa mi kɔkpɛnto lefosi simu. Kafɔɔ Yaa diɛta osuku abla mi dikpile. 8 Nse eebuɛ alɛ, <Babɔkɛɛ ba niɛpɛpɛɛ ni nimale letota lɛfɔ,> di babɔkɛɛ bamuu lelofo abi ya niɛpɛpɛɛ ni; nse eebuɛ alɛ, <Mba di akpana ntika ni nimale letota lɛfɔ,> di babɔkɛɛ bamuu lelofo abi ya niɛkpakpana ni. 9 Nioso Yaa ntoofũ teefɔ babɔkɛɛ ninnɛɛ ɛɛyɔ ɛɛtɛɛ.

10 <<Di obe wɔ di babɔkɛɛ n-yie ni bawo kamɛ, lasɛ kɔlaafɔ lanya ntiekpaa be niɛpɛpɛɛ, diɛkpakpana ni ku mbe ninte ni abadi abadi koyie batiesanko. 11 Ni di Yaa tɔkyɛntɛ latɔkɔ mi di kɔlaafɔ nwu kamɛ alɛ, <Yakob.> Ni latuna nlɛ, <Nnyɛɛ.> 12 Ni aabuɛ alɛ, <Takatɛsa anu faanyu ntiekpaa be mmuu niɛpɛpɛɛ ni ee niɛkpakpana ni ee mbe ninte ni abadi abadi koyie batiesanko. Diekye ntɔɔnya mmle di Laban kɔbla fɔ nii. 13 Ami ninle Yaa wɔ niadiki suoto latuo fɔ ni di Betel, lɛba le faakpete ni nnɔnyi di difuɔ suoto faaka ntam faatɛɛ nii. Nunua lolaa suoto faadie di kasɔ ka mmle, fasifi banantii lɛfɔ kasɔ suoto.> >>

14 Ninfɛ di Rahel ku Lea lakaalɛ nwɔ alɛ, <<Awo kafɔɔ bukpe kalekɔ di teewo atesaa kamɛ? 15 Diele onyu nfɛ oonyu wo fɛle bafɔɔ nɛ? Diele osunsũ lete eesunsũ wo, kafɔɔ atɔɔblako koto ko baata ni diisi loo ɔkpɛ. 16 Nwaako asaa ya amuu di Yaa lefũ ni di teewo nfũ, awo ku babiloo ale nfɛ ale. Nioso bla fɛle mmle di Yaa latɔkɔ fɔ ni.>>

17 Ninfɛ di Yakob layɔ babi ku basɔfɔ aatika di kapubapɔnkɔ suoto nɛ, 18 ni aatɔɔ babɔkɛɛ nɔɔ bamuu ku asaa nɔɔ ya amuu aawɛ ni di Padan Aram* baale katũ ni baayefe osuku baasifi ote Isak nfũ di Kanaan kasɔ nɛ.

19 Di obe wɔ di Laban lasifi ni bafoso nɔɔ sinwini kanwiɛkɔ, Rahel layu ote leyo kamɛ afiɔ aayɔ. 20 Kafɔɔ Yakob lakyɔnkyɔ Laban Aram otii nwu, atatɔkɔ nwɔ alɛ ootoso ansifi. 21 Nioso aatoso ku asaa nɔɔ ya amuu aawɛ nii, aataalɛ okle,* aakyɔɔ Gilead kobokote anu.

22 Di dii tiɛfa suoto baatɔkɔ Laban alɛ Yakob ntootoso. 23 Nioso aakpaa banantii nɔɔ, ni aati Yakob ayi akuɛnsĩ, ni aalaatũ nwɔ di Gilead kobokote kale nɛ. 24 Ni di Yaa lawa Laban, Aram otii nfũ ku kakyɛ nwu di kɔlaafɔ kamɛ aatɔkɔ nwɔ alɛ, <<Lolaa fanyu alɛ faabuɛ ɔlaa okpile kuonwii fatɔkɔ Yakob.>>

25 Yakob lapɛ lɛkpaayo nɔɔ di Gilead kale kobokote osi fiɛ di Laban labatũ nwɔ, ni di Laban ku batii nɔɔ kafɔɔ labasiɛ di ɔlɔɔkɔ nɔɔ nɛ. 26 Ni di Laban lakaalɛ Yakob alɛ, <<Be fɛɛbla nɛ? Fɛɛkyɔnkyɔ mi, fɛɛkpaa babisankobi nii feesifiko fɛle kakpɛ beemufũ ma. 27 Obe oso fɛɛkyɔnkyɔ mi feetoso leewofa kamɛ? Obe oso fatatɔkɔ mi, nindiki fɔ osuku ku suoto lɛyɔɔ ku sinu, abi ku basanku ɔsa? 28 Fatatɛɛ nfifiɔ babisankobi nii ku bawa nii akpoo ndiki ma osuku. Dibuusaa fɛɛbla nɛ. 29 Nkpe osuku alɛ kabla fɔ lɛsaa; kafɔɔ kɔsa ku kakyɛ teefɔ Yaa latɔkɔ mi alɛ, <Lolaa fanyu alɛ faabuɛ ɔlaa okpile kuonwii fatɔkɔYakob.> 30 Nunua n-ye nlɛ teefɔ leyo osifi nkle fɔ ɔkɔnsɔ. Kafɔɔ be oso feeyu afiɔ nii?>>

31 Yakob ladiki kanya aatɔkɔ Laban alɛ, <<Latɔɔyɛkɛ, diekye lanyu nlɛ fabafũ babisankobi lɛfɔ di nnɛɛ nii ku osie. 32 Kafɔɔ otii lele ɔkyɛ fɛɛnya afiɔ lɛfɔ, diɛkaatɛ ansiɛ nkpa. Di batii loo anu, nyu afɔ omu nse lɛsaa lɛfɔ lewo nsi di asaa nii kamɛ; nse disi, faadiki.>> Kafɔɔ Yakob ditatofo alɛ Rahel layu afiɔ nwu.

33 Nioso Laban labuo Yakob lɛkpaayo kamɛ, Lea lɛkpaayo kamɛ ku basanko bakpɛmblatɛ banyɔ nwu akpaayo kamɛ kafɔɔ atanya lɛsalɛsaa. Aadie ni di Lea lɛkpaayo kamɛ ni aabuo Rahel lɛkpaayo nɛ. 34 Rahel niayɔ leyo nwu afiɔ, aayɔ nya aakpee di kapupɔnkɔ nɔɔ disiɛsaa kamɛ aasiɛ nya di suoto, Laban lawolaa lɛsaa biala kamɛ di lɛkpaayo nwu kamɛ aafenko kafɔɔ atanya lɛsalɛsaa.

35 Rahel latɔkɔ ote alɛ, <<Teete nii, tannya ɔblɔ, nɔmafuo ɔtaka oyila di anu lɛfɔ; diekye lɛpɛ kɔkpaa kaasɔ.>> Nioso Laban lawolaa kafɔɔ atanya leyo lɛma afiɔ nwu.

36 Ɔblɔ lafiɛ Yakob di Laban suoto osie kanya. Ni aakaalɛ Laban alɛ, <<Be ɔlaa kule nkpo?>> <<Ɔmɛnkpile lɛbla fiɛ foowolaa mi kaanya nkpo? 37 Nunua fatɔɔkpɛnkpɛ ni asaa nii amuu kamɛ, obe lɛsaa fɛɛnya dile leyo lɛfɔ batii lele? Yɔ ni fatɛ di batii lɛfɔ ku bale mi anu baawolaa kamɛ bata batii loo banyɔ.

38 <<Alɛɛ afosi anyɔ ntosiɛ ni di ɔkyɛ lɛfɔ nɛ. Kafutu diedie bafoso ku batie lɛfɔ kuonwii, ee mmufũ fɔ dikunumuu kuninwii nlo di babɔkɛɛ lɛfɔ kamɛ. 39 Diidii ntayɔ babɔkɛɛ ba di babɔkɛɛ kplɛ labɛbɛɛ ni matuo fɔ; layɔ ma latika di suoto nii. Faabu mba di bayu layu ni ku kakũ ee kakyɛ koto faatɛɛ lata lata fɔ. 40 Nnya mmle diate mi ni: kufĩ lapɛ mi ku kakũ, lɛwɔɔfɔ laklee mi ku kakyɛ, sɛkyɔsĩ labudi mi di anu. 41 Nkpo diate alɛɛ afosi anyɔ amu lasiɛ ni di leyo lɛfɔ nɛ. Labla ɔkpɛ lefosi alɛɛ ana di babisankobi lɛfɔ banyɔ disi, alɛɛ akuɔ kafɔɔ layɔ lanyu babɔkɛɛ lɛfɔ, kafɔɔ faakyɛlɛnsa kɔkpɛnto nii lefosi simu. 42 Nse fɛle teemi Yaa ku Abraham Yaa ku Isak Yaa Lɛyɛkɛ ditansiɛkoe, nse nkpo faatɛɛ lasifi nnɛɛ fukuti nɛ. Kafɔɔ Yaa lanya dibuo nii ku okyiini nii ɔkpɛ ɔbla, ni kɔɔsa ku kakyɛ aasĩ ɔlaa aata fɔ nɛ.>>

43 Ni di Laban latɔkɔ Yakob alɛ, <<Basanko nwu, babisankobi nii bale, babi lɛma bawa nii bale, babɔkɛɛ lɛma kafɔɔ babɔkɛɛ nii bale. Asaa amuu fɔɔnya ni ale mi ale. Kafɔɔ be mablako babisankobi nii ba mmle miɛ, ee babi ba batoolofo ni? 44 Wa buonii kanya, ami ku afɔ, diɛbla kamaadiyilasaa dita batii loo banyɔ.>>

45 Nioso Yakob layɔ difuɔ aase fɛle nsũ lɛtɛsaa. 46 Ni aatɔkɔ batii nɔɔ alɛ, <<Bisiisa afuɔ awo.>> Nioso baasiisa nya baabla afuɔ ditii, ni baale alesaa di afuɔ ditii nwu ɔlɔɔkɔ nɛ. 47 Ni di Laban lalɛɛ lɛba nwu alɛ Yegar Sahaduta,* ni di Yakob lalɛɛ lɛba nwu alɛ, Galed* nɛ.

48 Ni di Laban labuɛ alɛ, <<Afuɔ ditii le mmle ninle kamaadiyilasaa di ami ku afɔ ntɛɛ miɛ.>> Nkpo oso bɔɔlɛɛ lɛba nwu Galed nɛ. 49 Mankple manlɛɛ lɛba nwu alɛ Mispa,* diekye aabuɛ alɛ, <<Saate nwu atoonyu ami ku afɔ se butɔɔbla baawo suoto. 50 Nse fɛɛbla babisankobi nii amumu ee fɛɛyɔ basanko bamba di babisankobi nii sɛmaa, se kuntɛ otii kuonwii nnaa wo di ɔkyɛ, nyuma falɛ Yaa ninle ami ku afɔ kamaayilatɛ.>>

51 Laban lakple aatɔkɔ Yakob alɛ, <<Nnya afuɔ ditii ninfũ, nnya leke lɛtɛ ni ninfũ di ami ku afɔ ntɛɛ. 52 Afuɔ ditii le mmle ku leke le mmle ninle kamaadiyilasaa, ni oso ami namataalɛ afuɔ ditii le mmle nwa ɔkyɛ lɛfɔ makpee fɔ kubuɛ, afɔ kafɔɔ flɔbataalɛ afuɔ ditii ku leke le mmle fawa ɔkyɛ nii fabakpee mi kubuɛ. 53 Abraham Yaa ku Nahor Yaa ku ote lɛma Yaa aka ata akyuu loo anyɔ.>>

Nioso Yakob laka ntam di ote Isak leyooto Lɛyɛkɛ kamɛ. 54 Ni di Yakob lata ole di kobokote kale nwu aalɛɛ batii nɔɔ babale alesaa nɛ. Baaloo ni ole, kakyɛ nwu baate ninfa.

55 Kaleesɛ ku kuyitatũ Laban lafifiɔ bawa nɔɔ ku babisankobi akpoo, aawii ma lɛyɔɔ. Ni aadie aakple aasifi kafa nɔɔ nɛ.