XÓ NI̱GI̱ꞋDU̱U̱N-MUU 11

Ana̱ꞌlóꞌ eꞌne wájíi ajngáa ná Babél

1 Nákhí rí mbiꞌi rúꞌkhue̱n, mbóó ajngúún xa̱bo̱ mbá xúgíí inuu numba̱a̱, jamí mbóó máꞌ xóo nothee̱n. 2 Jamí ído̱ nigájnúu̱ ná na̱ꞌkha̱ a̱kha̱ꞌ, ikhín ni̱xka̱maa̱ mbá xkua̱ ná mbayuu Sinár. Ikhín máꞌ niwanúu̱ rí ma̱ju̱wée̱ꞌ. 3 A̱ꞌkhue̱n nithan-mi̱jne̱e̱: «Mo̱ꞌne̱lóꞌ ju̱ba̱ꞌ gaꞌkho̱ jamí mu̱tsikhálóꞌ ne̱ xóo tsíjui̱í». Xkuaꞌnii neꞌne rí nijmúu̱ tsíjui̱í xóo xtiꞌkhuu itsí, jamí i̱ndo̱ó mbá wájia rakha skuni nijmúu̱ rí ni̱ru̱ꞌwáa̱ ne̱. 4 A̱ꞌkhue̱n nithan-mi̱jne̱e̱: «Mu̱ꞌgílóꞌ mbá xuajen jamí mu̱xu̱xílóꞌ mbá guꞌwá rí phú tsída̱ꞌ jamí ma̱jráꞌáan asndo mikhuíí. A̱ꞌkhue̱n rí ma̱bo̱o̱ꞌ ajngáa ga̱jma̱á numalóꞌ, ra̱ꞌkhá ma̱dráꞌáánlóꞌ mbá xúgíí ná inuu numba̱a̱».

5 A̱ꞌkhue̱n ni̱ga̱taa Ana̱ꞌlóꞌ Mikhuíí gáꞌyoo xuajen jamí guꞌwá rí phú tsída̱ꞌ rí nu̱xu̱xí máꞌ xa̱bo̱ numbaa. 6 Niꞌthán Ana̱ꞌlóꞌ Mikhuíí: «Mbóó xuajen ñajúu̱n, jamí mbá xúgíi̱n mbóó ajngáa rí nothee̱n. Rí nigíꞌdíi̱ máꞌ nuñajuii̱n, asndo nimbá ma̱xáwe̱je̱-thu̱u̱n rí ma̱xúne̱ gáxíi̱ rí niꞌgí-mi̱jne̱e̱. 7 Ikhaa jngó xúge̱ꞌ rá, mu̱guataalóꞌ mo̱ꞌne̱-ngra̱ꞌaalóꞌ ajngúu̱n, ikhaa jngó asndo nimbáa ma̱xáfroꞌo̱o̱ rí naꞌthán dxájuu».

8 Xkuaꞌnii neꞌne Ana̱ꞌlóꞌ Mikhuíí rí ni̱drúꞌúu̱n mbá xúgíí inuu numba̱a̱, a̱ꞌkhue̱n ni̱ni̱ñáa̱ꞌ rí nu̱xu̱xi̱i̱ xuajen. 9 Ikhaa jngó xuajen rúꞌkhue̱n neꞌne mbiꞌyuu Babél, numuu rí ikhín neꞌne-ngra̱ꞌaa Ana̱ꞌlóꞌ Mikhuíí ajngúún mbá xúgíin xa̱bo̱ numbaa, jamí ikhín niꞌnii̱ rí ma̱drúꞌúún xa̱bo̱ mbá xúgíí inuu numba̱a̱.

Xa̱bi̱i̱ Sém

10 Tsíge̱ꞌ ñajúún xa̱bo̱ ri̱jiu̱u̱ꞌ Sém. Ído̱ neꞌne riajma̱ tsigu rí ninújngoo máꞌ ruꞌwa a̱pha̱, Sém gíꞌdoo mbá siénto̱ (100) tsigu, a̱ꞌkhue̱n ni̱gu̱maa a̱dée̱ tsí mbiꞌyuu Arfaksád. 11 Rí ni̱gu̱maa máꞌ Arfaksád, xóó nixtáa Sém mbá witsu siénto̱ (500) tsigu, a̱ꞌkhue̱n rí ni̱gu̱mii xóó i̱ji̱i̱n xa̱bekha jamí go̱ꞌo̱.

12 Arfaksád gíꞌdoo mbá skíñú gu̱wa̱ꞌ-nítsu (35) tsigu ído̱ rí ni̱gu̱maa a̱dée̱ tsí mbiꞌyuu Sála̱. 13 Rí ni̱gu̱maa máꞌ Sála̱, xóó nixtáa Arfaksád mbá akho̱ siénto̱ e̱tso̱ (403) tsigu, a̱ꞌkhue̱n ni̱gu̱mii xóó i̱ji̱i̱n xa̱bekha jamí go̱ꞌo̱.

14 Sála̱ gíꞌdoo mbá skíñú gu̱wa̱ꞌ (30) tsigu ído̱ rí ni̱gu̱maa a̱dée̱ tsí mbiꞌyuu Ébe̱r. 15 Rí ni̱gu̱maa máꞌ Ébe̱r, xóó nixtáa Sála̱ mbá akho̱ siénto̱ e̱tso̱ (403) tsigu, a̱ꞌkhue̱n ni̱gu̱mii xóó i̱ji̱i̱n xa̱bekha jamí go̱ꞌo̱.

16 Ébe̱r gíꞌdoo mbá skíñú gue̱kho̱ (34) tsigu ído̱ rí ni̱gu̱maa a̱dée̱ tsí mbiꞌyuu Pelég. 17 Rí ni̱gu̱maa máꞌ Pelég, xóó nixtáa Ébe̱r mbá akho̱ siénto̱ mbá skíñú gu̱wa̱ꞌ (430) tsigu, a̱ꞌkhue̱n ni̱gu̱mii xóó i̱ji̱i̱n xa̱bekha jamí go̱ꞌo̱.

18 Pelég gíꞌdoo mbá skíñú gu̱wa̱ꞌ (30) tsigu ído̱ rí ni̱gu̱maa a̱dée̱ tsí mbiꞌyuu Réu̱. 19 Rí ni̱gu̱maa máꞌ Réu̱, xóó nixtáa Pelég i̱jma̱ siénto̱ mijnagu̱wa̱ꞌ (209) tsigu, a̱ꞌkhue̱n ni̱gu̱mii xóó i̱ji̱i̱n xa̱bekha jamí go̱ꞌo̱.

20 Réu̱ gíꞌdoo mbá skíñú gue̱jma̱ (32) tsigu ído̱ rí ni̱gu̱maa a̱dée̱ tsí mbiꞌyuu Serúg. 21 Rí ni̱gu̱maa máꞌ Serúg, xóó nixtáa Réu̱ i̱jma̱ siénto̱ juan (207) tsigu, a̱ꞌkhue̱n ni̱gu̱mii xóó i̱ji̱i̱n xa̱bekha jamí go̱ꞌo̱.

22 Serúg gíꞌdoo mbá skíñú gu̱wa̱ꞌ (30) tsigu ído̱ rí ni̱gu̱maa a̱dée̱ tsí mbiꞌyuu Nakór. 23 Rí ni̱gu̱maa máꞌ Nakór, xóó nixtáa Serúg i̱jma̱ siénto̱ (200) tsigu, a̱ꞌkhue̱n ni̱gu̱mii xóó i̱ji̱i̱n xa̱bekha jamí go̱ꞌo̱.

24 Nakór gíꞌdoo mbá skíñú mijnagu̱wa̱ꞌ (29) tsigu ído̱ rí ni̱gu̱maa a̱dée̱ tsí mbiꞌyuu Taré. 25 Rí ni̱gu̱maa máꞌ Taré, xóó nixtáa Nakór mbá witsu skíñú gu̱wa̱ꞌ-nítsu i̱kho̱ (119) tsigu, a̱ꞌkhue̱n ni̱gu̱mii xóó i̱ji̱i̱n xa̱bekha jamí go̱ꞌo̱.

26 Taré gíꞌdoo máꞌ mbá atsú skíñú gu̱wa̱ꞌ (70) tsigu ído̱ rí ni̱gu̱mii i̱ji̱i̱n tsí mbiꞌñúú Abrám, Nakór jamí Arán.

Xa̱bi̱i̱ Taré

27 Tsíge̱ꞌ ñajúún xa̱bo̱ ri̱jiu̱u̱ꞌ Taré. Taré ni̱gu̱mii i̱ji̱i̱n tsí mbiꞌñúú Abrám, Nakór, jamí Arán. Xúꞌkhue̱n máꞌ Arán ni̱gu̱maa mbáa a̱dée̱ tsí mbiꞌyuu Lót. 28 Arán nijáñuu wapha xó rí Taré, tsí ñajuun anu̱u̱. Ná xuajen rí ni̱gu̱maa̱, mbiꞌyuu Úr drígu̱ún mbo̱ kaldéo̱, ikhín máꞌ nijáñuu̱. 29 Abrám ga̱jma̱á Nakór ni̱ni̱gui̱i̱nꞌ. A̱ꞌgui̱i̱ Abrám mbiꞌyuu Saraí, jamí a̱ꞌgui̱i̱ Nakór mbiꞌyuu Mílka̱. Mílka̱ ga̱jma̱á Íska̱ ñajúún i̱ji̱i̱n Arán. 30 Xómáꞌ Saraí tsígu̱mii i̱ji̱i̱n ja.

31 Nigájnuu Taré ná Úr drígu̱ún mbo̱ kaldéo̱ rí na̱ke̱e̱ ná mbaa Kanaán. Jamí na̱ka̱ ga̱jma̱á máꞌ Abrám, mangaa Lót tsí ñajuun a̱ꞌdá-xíñii Taré, xúꞌkhue̱n máꞌ mangaa Saraí, a̱ꞌgui̱i̱ Abrám. Jamí ído̱ niguáꞌníi̱ asndo ná xuajen Arán, ikhín máꞌ niwanúu̱ nijúwe̱e̱ꞌ. 32 A̱jma̱ siénto̱ witsu (205) tsigu nixtáa Taré, a̱ꞌkhue̱n nijáñuu̱ ná Arán.