1 Wapha máꞌ Ana̱ꞌlóꞌ Mikhuíí niꞌthúun Abrám: «Atatsíñáá mbayaaꞌ, a̱ngia̱a̱nꞌ jamí goꞌóo ana̱a̱ꞌ, ayu ná mbaa rí ma̱snga̱jmáaꞌlo̱ꞌ. 2 Ma̱ne̱ rí ma̱nindxa̱a̱ꞌ mbá xuajen mba̱a̱, jamí ma̱ne̱ tsakun-rámáálo̱ꞌ. Ma̱ne̱ rí phú ma̱gi̱ꞌdoo numuu mbiꞌyaaꞌ, jamí ga̱jma̱á numaaꞌ ikháán ma̱gu̱ma-tsakun-rámii iꞌwíin xa̱bo̱. 3 Ma̱ne̱ tsakun-rámii tsí none̱ tsakun-rámáá, jamí tsí nuxna-maꞌáán ma̱xna̱-máꞌíinlo̱ꞌ. Ga̱jma̱á numaaꞌ ikháán ma̱gu̱ma-tsakun-rámii mbá xúgíin xa̱bo̱ numbaa».

4 A̱ꞌkhue̱n rí ni̱ka̱ Abrám, xó rí waꞌtháa̱n neꞌne Ana̱ꞌlóꞌ Mikhuíí, jamí ni̱ka̱ Lót ga̱jma̱á nindxu̱u̱ mangaa. Mbá atsú skíñú gu̱wa̱ꞌ-nítsu (75) tsiguu Abrám nákhí rí nigájnuu̱ ná Arán. 5 Jayáa̱ Saraí tsí a̱ꞌgui̱i̱, ni̱ke̱e̱, xúꞌkhue̱n máꞌ Lót, a̱dée dxíyo̱o̱. Judee̱ mbá xúgíí rí niguaꞌdáa̱, xúꞌkhue̱n máꞌ xa̱bo̱ tsí nitsii̱n ná Arán. Nigájnúu̱ nigóo̱ ná mbaa Kanaán, jamí ikhín máꞌ niguáꞌníi̱.

6 Abrám ni̱ka̱-ranújngoo mbaa rúꞌkhue̱n asndo ni̱ga̱níi̱ ná wéje̱ mbá ixe̱ xi̱xoo ná Moré, ná mbayuu Sikém. Nákhí mbiꞌi rúꞌkhue̱n mbo̱ kananéo̱ júwá máꞌ ná mbaa rúꞌkhue̱n. 7 Ikhín nikujmaa Ana̱ꞌlóꞌ Mikhuíí inuu Abrám, jamí niꞌthúu̱n: «Ikhaa mbaa ríge̱ꞌ ma̱xnu̱úlo̱ꞌ i̱jia̱a̱nꞌ». A̱ꞌkhue̱n rí Abrám ni̱rngu̱xe̱ itsí ná ma̱ꞌne-mba̱a̱ Ana̱ꞌlóꞌ Mikhuíí, tsí nikujmaa inuu̱.

8 A̱ꞌkhue̱n rí nigájnuu̱ ni̱ke̱e̱ ná júba̱ rí wéje̱ ná na̱ꞌkha̱ a̱kha̱ꞌ inuu xuajen Bet-él, jamí niꞌgíi̱ guꞌwá xtíin ná ma̱xtáa̱. Rí Bet-él niwanúu ná najngúun a̱kha̱ꞌ jamí xuajen Aí ꞌgí ná na̱ꞌkha̱ a̱kha̱ꞌ. A̱ꞌkhue̱n rí Abrám ni̱rngu̱xe̱ itsí ná ma̱ꞌne-mba̱a̱ Ana̱ꞌlóꞌ Mikhuíí, jamí nixrégo̱o̱ mbiꞌyuu Ana̱ꞌlóꞌ. 9 Ikhín nigájnuu Abrám ni̱ka̱-rangrigo̱o̱ꞌ mañuu máꞌ xúꞌkhue̱n, asndo ná mbaa Negéb.

10 Mbiꞌi rúꞌkhue̱n niríga̱ ewe ná mbaa xtáa Abrám. A̱ꞌkhue̱n rí ni̱ga̱taa̱ gáxtáa̱ ná Ejípto̱, numuu rí phú gakhe̱ eꞌne ewe. 11 Rí inu máꞌ wáa ma̱ga̱níi̱ ná Ejípto̱ niꞌthúu̱n a̱ꞌgui̱i̱: «Ikhúúnꞌ nda̱yo̱o̱ rí a̱ꞌgo̱ tsí phú tsiꞌyáa ñajuaanꞌ. 12 Ído̱ gúyaaꞌ xa̱bo̱ Ejípto̱ muthan: "A̱ꞌgui̱i̱ xa̱bo̱ tsúꞌkhue̱n ñajuu̱n jno̱ꞌ". A̱ꞌkhue̱n rí ikhúúnꞌ mu̱xi̱ñúu̱, xómáꞌ ikháán ma̱jríña̱á gúni̱i̱. 13 Ikhaa jngó arathúu̱n rí dxáguíꞌ ñajuaanꞌ, kajngó nga̱ju̱ún gúni̱i̱ ga̱jma̱á numaaꞌ ikháán, jamí ma̱tha̱ne̱ rí ma̱xtáá xóó».

14 Ído̱ ni̱ga̱nú Abrám ná Ejípto̱, a̱ꞌkhue̱n rí xa̱bo̱ xuajen ndiyáá rí phú tsiꞌyáa mi̱ndaꞌkho Saraí. 15 Xúꞌkhue̱n máꞌ ndiyáá xa̱bo̱ ede̱ tsí nuñajun ná inuu Faraón, ikhaa jngó máján nithee̱n ga̱jma̱á numuu Saraí. A̱ꞌkhue̱n rí ni̱ka̱ jiꞌyáa̱ ná goꞌóo Faraón.*12.15 «Faraón» nuxnáá mbiꞌyuu thúngaa mba̱a̱ ná Ejípto̱.

16 A̱ꞌkhue̱n rí Faraón neꞌne-nga̱jo̱o̱ Abrám ga̱jma̱á numuu Saraí. Nixníi̱ mogo̱, xede̱, yumbáá xa̱bekha, yumbáá go̱ꞌo̱, xtá-ngidi jamí kaméyo̱. 17 Xómáꞌ Ana̱ꞌlóꞌ Mikhuíí rá, niꞌnii̱ rí ma̱ꞌkha̱ mbaꞌa inii nandi gakhe̱ inuu Faraón jamí inúú xa̱bo̱ goꞌóo̱, ga̱jma̱á numuu a̱ꞌgui̱i̱ Abrám. 18 A̱ꞌkhue̱n rí Faraón nindxaꞌwóo Abrám, jamí niꞌthúu̱n: «Náá numuu kajngó xáꞌnii nithañu̱ꞌ róꞌ. Náá rí jngó tára̱thu̱nꞌ rí a̱ꞌgia̱a̱ꞌ ñajuu̱n róꞌ. 19 Náá numuu kajngó nirathán rí dxágiáaꞌ ñajuu̱n róꞌ. Rí i̱tha̱n mba̱ya̱a̱ rí ma̱ꞌne a̱ꞌgui̱ꞌ ñajuu̱n. Ikhaa jngó ge̱jioꞌ xtáa a̱ꞌgia̱a̱ꞌ. Ayáa̱ jamí ayu̱uꞌ ga̱jma̱a̱ꞌ rá». 20 A̱ꞌkhue̱n rí Faraón nixná-ñájúún xa̱bi̱i̱ rí mu̱xkri̱ya̱a̱ꞌ Abrám ga̱jma̱á a̱ꞌgui̱i̱, jamí ga̱jma̱á máꞌ mbá xúgíí rí gíꞌdoo̱.