1 A̱ꞌkhue̱n rí Isaák nindxaꞌwóo Jakób, jamí neꞌne tsakun-rámaa̱, xúꞌkhue̱n máꞌ niꞌthúu̱n:

—Ma̱xíya̱a̱-lá nimbáa a̱díín mbo̱ Kanaán ge̱e̱. 2 Ayu máꞌ ná Padán-arám, ná goꞌóo Betuél, anu̱u̱ máꞌ ru̱dáaꞌ, jamí ayáa mbáa a̱dée Labán, díye̱e̱ máꞌ ru̱dáaꞌ. 3 Jamí Ana̱ꞌlóꞌ tsí Gíꞌdoo Xúgíí Tsiakhe̱ gáꞌne tsakun-rámáá, rí maxniáa̱ꞌ i̱jia̱a̱nꞌ rí ma̱mi̱diúún mi̱ndaꞌkho, asndo náá gáꞌne mbaꞌa xuajen ñajúu̱n. 4 Ikhaa̱ gáꞌne tsakun-rámáá, xúꞌkhue̱n máꞌ xa̱bia̱a̱ꞌ, ga̱jma̱á máꞌ rí nijanáá Abraám, ikhaa jngó ma̱goo ma̱nújnga̱a̱ꞌ ná ñawáanꞌ mbaa ná xtaa naꞌcho̱o̱ xúge̱ꞌ, rí Ana̱ꞌlóꞌ nixnáxu̱u̱ máꞌ Abraám.

5 Xkuaꞌnii neꞌne Isaák rí nixuꞌmaa̱ Jakób rí ma̱ꞌga ná Padán-arám, ná goꞌóo Labán mbo̱ a̱dée Betuél mbo̱ Arám. Labán ñajuun díye̱e̱ máꞌ Rebéka̱ tsí ru̱dúu Jakób ga̱jma̱á Esaú.

6 Xómáꞌ Esaú, ndiꞌyoo̱ xáne ni̱gu̱ma-tsakun-rámaa Jakób neꞌne Isaák, xúꞌkhue̱n máꞌ rí waxuꞌmaa̱ ná Padán-arám, rí ma̱ꞌgee̱ gánigúu̱nꞌ ikhín. Mangaa máꞌ ndiꞌyoo̱ rí waꞌxná-ñájuíi̱n: «Ma̱xíya̱a̱-lá asndo nimbáa a̱ꞌgo̱ a̱díín mbo̱ Kanaán». 7 Xúꞌkhue̱n máꞌ ndiꞌyoo̱ rí Jakób nidxawuun rí niꞌthán anu̱u̱ ga̱jma̱á máꞌ ru̱dúu̱, a̱ꞌkhue̱n rí ni̱ke̱e̱ ná Padán-arám. 8 Mangaa máꞌ ndiꞌyoo Esaú rí go̱ꞌo̱ i̱ji̱ín mbo̱ Kanaán tsígruígú a̱kui̱i̱n anu̱u̱. 9 A̱ꞌkhue̱n rí ni̱ka̱ Esaú ná xtáa Ismaél, jamí ndiyáa̱ i̱mba̱a̱ a̱ꞌgo̱ tsí mbiꞌyuu Maalát, a̱dée Ismaél a̱dée máꞌ Abraám, dxáguíi máꞌ Nebayót. Ndiyáa̱ tsíge̱ꞌ inúú i̱jmi̱i̱ tsí gíꞌdii̱n máꞌ ná goꞌóo̱.

10 A̱ꞌkhue̱n rí nigájnuu Jakób ná Beerséba̱, ni̱ka̱ ná Arán. 11 Ni̱ga̱níi̱ mbá ná ma̱wi̱ji̱i̱ rí mi̱guii̱, numuu rí nijngúun máꞌ a̱kha̱ꞌ. Ndiyée̱ mbá itsí rí ríga̱ ikhín jamí niꞌgíi̱ ne̱ ná maꞌgíi̱ idxu̱u̱, ikhín máꞌ nibóo̱ꞌ mi̱guii̱. 12 A̱ꞌkhue̱n nigundaa̱ rí jnga̱ma mbá ixe̱ biꞌbi rí ꞌgí nakhúu ne̱ inuu ju̱ba̱ꞌ, rí inuu ne̱ na̱ga̱nú asndo mikhuíí. Jamí ndiꞌñúu̱ ánje̱l drígo̱o̱ Ana̱ꞌlóꞌ rí natsimúú jamí naguátáa̱n ná inuu ne̱. Nagundaa Jakób rí ndaꞌñúú ánge̱l naguátaa jamí natsima̱a mikhuíí. 13 Mangaa ndiꞌyoo̱ Ana̱ꞌlóꞌ Mikhuíí wéje̱ ná inuu ne̱, jamí waꞌtháa̱n: «Ikhúúnꞌ ñaju̱nꞌ Ana̱a̱ꞌ Mikhuíí, Anu̱u̱ Abraám, jamí Anu̱u̱ máꞌ Isaák. Mbaa ná rí kri̱ga̱án ma̱xna̱a̱ꞌlo̱ꞌ ikháán jamí xa̱bia̱a̱ꞌ. 14 Tsí xa̱bia̱a̱ꞌ ma̱ꞌne mbaꞌiin asndo xóo yujndo̱o̱ꞌ ju̱ba̱ꞌ, jamí ma̱drúꞌúu̱n mbá xúgíí inuu numbaa, xúꞌkhue̱n máꞌ mbá xúgíin xa̱bo̱ numba̱a̱ ma̱gu̱ma-tsakun-rámii mangiin ga̱jma̱á numaaꞌ ikháán jamí xa̱bia̱a̱ꞌ. 15 Athayáá rí xúge̱ꞌ, ikhúúnꞌ xtáá ga̱jma̱á nindxa̱a̱ꞌ, jamí ma̱ña̱wa̱a̱ꞌ asndo náá máꞌ gídxú, jamí ma̱ꞌkhaa̱ꞌ ja̱ña̱á máꞌ ná mbaa ríge̱ꞌ. Numuu rí ma̱xáni̱ꞌñáaꞌ asndo náá gáne̱-mbánuu rí na̱tha̱a̱nꞌ».

16 Ído̱ nifuii̱ꞌ Jakób rí nigundaa̱, a̱ꞌkhue̱n niꞌthée̱n: «Rí phú gakon rí xtáa ge̱e̱ Ana̱ꞌlóꞌ Mikhuíí, jamí ikhúúnꞌ tsíyo̱lo̱ꞌ mbá jayu». 17 Xúꞌkhue̱n máꞌ phú nimíñuu̱ jamí niꞌthée̱n: «Rí phú mitsúꞌkhaa jaꞌnii mbaa ríge̱ꞌ. Nda̱a̱ rí i̱mba̱, rí goꞌóo Ana̱ꞌlóꞌ ñajuun ne̱, jamí ná rawuun xkrugoo mikhuíí ñajuun ne̱».

18 Miꞌcha̱ máꞌ ni̱tu̱xi̱i̱ Jakób rí i̱mba̱ watse, jamí ndiyée̱ itsí rí niꞌgíi̱ ná idxu̱u̱, nitsijii̱ ne̱ mbá xóo tsina, jamí nistrámuu̱ iya rí miꞌtsín inuu ne̱. 19 A̱ꞌkhue̱n rí nixnúu̱ mbiꞌyuu mbaa rúꞌkhue̱n Bet-él, maske máꞌ Lús mbiꞌyuu xuajen rúꞌkhue̱n nákhí ginii. 20 A̱ꞌkhue̱n rí nixuda-mina̱ꞌ Jakób, jamí niꞌthée̱n: «Xí Ana̱ꞌlóꞌ gáꞌga ga̱jma̱á nindxu̱ꞌ jamí ma̱ña̱we̱nꞌ ná jamba̱a̱ rí nakalo̱ꞌ, jamí maxníꞌ ganitsu rí me̱ꞌkho ga̱jma̱á xtíin rí ma̱ju̱ꞌwunꞌ, 21 xúꞌkhue̱n máꞌ xí ma̱tangu̱ún tsímáá ná goꞌóo anu̱ꞌ, Ana̱ꞌlóꞌ Mikhuíí gáꞌne Anu̱ꞌ ñajuun xúꞌkhue̱n rá. 22 Itsí ríge̱ꞌ ni̱ꞌgílo̱ꞌ xóo tsina, ma̱nindxu̱u̱ goꞌóo Ana̱ꞌlóꞌ. Jamí mbá xúgíí rí maxníꞌ, ma̱rígú mbóó inuu rí mbámbá gu̱wa̱ꞌ rí jaꞌyoo ma̱grui̱gúu̱».