1 A̱ꞌkhue̱n rí nigájnuu Israél ga̱jma̱á mbá xúgíí rí gíꞌdoo̱, jamí ni̱ga̱níi̱ ná Beerséba̱. Ikhín nixnáxi̱i̱n xu̱kú tsi̱gi̱jia̱nꞌ inuu Ana̱ꞌlóꞌ tsí neꞌne-mba̱a̱ Isaák, mbo̱ anu̱u̱ máꞌ. 2 A̱ꞌkhue̱n rí Ana̱ꞌlóꞌ nindxákuun ga̱jma̱á Israél awúun xnuꞌndaa, jamí niꞌthúu̱n xáꞌnii:

—Jakób, Jakób.

Xómáꞌ ikhaa̱ niriꞌñee̱:

—Ge̱e̱ xtáá na̱dxawaanꞌ.

3 A̱ꞌkhue̱n niꞌthúu̱n:

—Ikhúúnꞌ ñaju̱nꞌ Táta̱ Mikhu, Anu̱u̱ ana̱a̱ꞌ. Ma̱xámíñaaꞌ rí mi̱dxu̱ꞌ ná Ejípto̱, numuu rí ikhín ma̱ne̱ rí ma̱nindxu̱ún xa̱bia̱a̱ꞌ mbá xuajen rí maphú mba̱a̱. 4 Ikhúúnꞌ máꞌ ma̱ꞌgá ga̱jma̱á nindxa̱a̱ꞌ ná Ejípto̱, jamí ikhúúnꞌ máꞌ ma̱ne̱ rí ma̱tanga̱án mangaa, xúꞌkhue̱n máꞌ José ma̱rugua̱a̱ la idaaꞌ ído̱ gájáñaaꞌ.

5 A̱ꞌkhue̱n rí nigájnuu Jakób ná Beerséba̱. Xómáꞌ i̱ji̱i̱n nini̱i̱ rí ma̱tsimuu anúu̱ gajmíí máꞌ i̱jíi̱n, xúꞌkhue̱n máꞌ gu̱ꞌwíi̱n, ná ixe̱ rí kixmáthaa rí nixuꞌma Faraón rí magóo̱ ga̱jma̱á. 6 Xúꞌkhue̱n máꞌ judii̱n xu̱kuíi̱n, jamí mbá xúgíí rí niguaꞌdáa̱ ná mbaa Kanaán. Xkuaꞌnii neꞌne rí Jakób gajmíí mbá xúgíin xa̱bi̱i̱ nigóó ná Ejípto̱. Na̱ka̱ Jakób gajmíí xúgíin xa̱bi̱i̱ ná Ejípto̱. 7 Ni̱ka̱ jagu̱u̱n i̱ji̱i̱n ga̱jma̱á i̱jín-xíñii̱, xa̱bekha jamí go̱ꞌo̱, mbá xúgíin máꞌ tsí ni̱gu̱mii ná goꞌóo̱ ni̱ka̱ jagu̱u̱n ná Ejípto̱.

8 Ríge̱ꞌ ñajuun mbiꞌñúú i̱ji̱i̱n xa̱bo̱ Israél tsí ni̱tu̱ꞌúún ná Ejípto̱, tsí ñajuun máꞌ Jakób gajmíí i̱ji̱i̱n:

Rubén ñajuun xa̱bo̱ ginii a̱dée Jakób. 9 Tsí i̱ji̱i̱n Rubén: Anók, Falú, Esrón jamí Kármi̱.

10 Tsí i̱ji̱i̱n Simeón: Jemuél, Jamín, Oád, Jakín, Soár jamí Saúl, a̱dée nána̱ Kanaán.

11 Tsí i̱ji̱i̱n Lebí: Jersón, Koát jamí Merári̱.

12 Tsí i̱ji̱i̱n Judá: Ér, Onán, Séla̱, Fáre̱s jamí Sára̱. (I̱ndo̱ó tsí Ér ga̱jma̱á Onán nijáñúú ná mbaa Kanaán.) Jamí i̱ji̱i̱n Fáre̱s ñajúún Esrón jamí Amúl.

13 Tsí i̱ji̱i̱n Isakár: Tóla̱, Fúa̱, Jób jamí Simrón.

14 Tsí i̱ji̱i̱n Sabulón: Seréd, Elón jamí Jaleél.

15 Tsúꞌkhue̱n neꞌne ñajúún i̱ji̱i̱n Léa̱, tsí ni̱gi̱ꞌdii̱n ga̱jmáa̱ Jakób ná Padán-arám. Rí asndo a̱díi̱n Dína̱ tsí dxáꞌgú, naꞌne mbá skíñú gue̱tso̱ (33) i̱ji̱i̱n.

16 Tsí i̱ji̱i̱n Gád: Sifión, Ági̱, Esbón, Súni̱, Éri̱, Aródi̱ jamí Aréli̱.

17 Tsí i̱ji̱i̱n Asér: Ímna̱, Isúwa̱, Isúwi̱, Beríya̱ jamí Séra̱, tsí dxáguíi̱n máꞌ ikhii̱n. Tsí i̱ji̱i̱n Beríya̱: Ébe̱r jamí Malkiél.

18 Tsúꞌkhue̱n neꞌne ñajúún i̱ji̱i̱n Sílpa̱, yumbée máꞌ Léa̱ tsí nijanáa̱ neꞌne Labán. Rí mbá xúgíin i̱ji̱i̱n ga̱jmáa̱ Jakób naꞌne mbá gu̱wa̱ꞌ-nítsu i̱mbii̱n xa̱bo̱.

19 Tsí i̱ji̱i̱n Rakél, a̱ꞌgui̱i̱ máꞌ Jakób: José jamí Benjamín.

20 Ni̱gu̱mii i̱ji̱i̱n José ná mbaa Ejípto̱: Manasés ga̱jma̱á Efraín, tsí neꞌne ku̱mii Asenát, a̱dée Potífe̱ra̱, dxakuun mbo̱ Ón.

21 Tsí i̱ji̱i̱n Benjamín: Béla̱, Bekér, Asbél, Jéra̱, Naamán, Éi̱, Rós, Mupím, Upím jamí Árd.

22 Tsúꞌkhue̱n neꞌne ñajúún i̱ji̱i̱n Rakél, tsí ni̱gi̱ꞌdii̱n ga̱jmáa̱ Jakób, rí mbá xúgíi̱n mbá gue̱kho̱ xa̱bo̱.

23 Tsí a̱dée Dán: Usím.

24 Tsí i̱ji̱i̱n Neftalí: Jaseél, Gúni̱, Jesér jamí Silém.

25 Tsúꞌkhue̱n neꞌne ñajúún i̱ji̱i̱n Bíla̱, yumbée máꞌ Rakél tsí nijanáa̱ neꞌne Labán. Rí mbá xúgíin i̱ji̱i̱n ga̱jmáa̱ Jakób naꞌne mbá juiin xa̱bo̱.

26 Rí mbá xúgíin xa̱bo̱ tsí niguwá ga̱jma̱á nindxu̱u̱ Jakób ná Ejípto̱, tsí ri̱jiu̱u̱ꞌ máꞌ ikhaa̱, mbá atsú skíñú majuun (66) xa̱bo̱ ñajúu̱n, rí tsígi̱xnuu máꞌ gu̱ꞌwi̱ín i̱ji̱i̱n Jakób. 27 Xómáꞌ i̱ji̱i̱n José, tsí ni̱gu̱mii ná Ejípto̱ a̱jmi̱i̱ xa̱bo̱ ñajúu̱n. Rí mbá xúgíin xa̱bo̱ ná goꞌóo Jakób, tsí ni̱tu̱ꞌúún ná Ejípto̱, mbá atsú skíñú gu̱wi̱inꞌ (70) ñajúu̱n.

28 A̱ꞌkhue̱n rí Jakób nixuꞌmaa̱ ginii Judá ma̱ꞌga gáꞌthúun José rí ma̱ꞌgee̱ gágrui̱guíi̱ anu̱u̱ ná Gosén. A̱ꞌkhue̱n niguáꞌníi̱ máꞌ ná mbaa Gosén. 29 Xómáꞌ José niꞌthán rí ma̱gu̱ma-mbáníí ixe̱ rí kixmáthaa rí ma̱ꞌgee̱ gágrui̱guíi̱ Israél ná mbaa Gosén. Ído̱ ndiꞌyoo̱ anu̱u̱, ndiyá-raꞌaa̱ jamí mba̱yo̱ꞌ ni̱mbi̱ye̱e̱ꞌ-rámuu̱ ná aphuu anu̱u̱. José naxkama̱a̱ anu̱u̱. 30 A̱ꞌkhue̱n rí Israél niꞌthúun José:

—Ma̱goo máꞌ ma̱ja̱ñúꞌ xúge̱ꞌ rá, numuu rí nda̱yo̱o̱ máꞌ inaaꞌ, jamí nda̱yo̱o̱ rí xóó xtaa nathaya.

31 A̱ꞌkhue̱n rí José niꞌthúún dxíyo̱o̱, xúꞌkhue̱n máꞌ xa̱bo̱ goꞌóo anu̱u̱:

—Ma̱ꞌgá gáthu̱u̱n Faraón: "Dxíyo̱ꞌ jamí xa̱bo̱ goꞌóo anu̱ꞌ, tsí nijúwa̱ꞌ ná mbaa Kanaán, niguáꞌníi̱ máꞌ rá. 32 Ikhii̱n ñajúún waxtú tsí nu̱ña̱wu̱ún xu̱kú, xúꞌkhue̱n máꞌ judii̱n moguíi̱n jamí xedíi̱n, ga̱jma̱á mbá xúgíí rí kuaꞌdáa̱". 33 Jamí ído̱ Faraón mandxaꞌwálaꞌ rí maraxa̱ꞌlaꞌ: "Náá rí ñajun rí no̱ne̱laꞌ róꞌ", 34 a̱ꞌkhue̱n mu̱tháa̱nlaꞌ: "Xa̱bo̱ tsí nu̱ña̱wu̱ún xu̱kú ñajúún yumbiáaꞌ asndo nákhí makáa̱nꞌxo̱ꞌ jamí asndo máꞌ xúge̱ꞌ, xúꞌkhue̱n máꞌ ninindxu̱ún xíña-xi̱ꞌñáxo̱ꞌ mangiin". A̱ꞌkhue̱n rí ma̱goo ma̱wanálaꞌ rí ma̱juwalaꞌ ná mbaa Gosén, numuu rí xa̱bo̱ Ejípto̱, tsíñúú-gúñúú mbá jayu mbo̱ waxtú.