Bakuutu ba Bayudaayo bali mu ukuta pfuundu mu Yisu
1 Bu Yisu haamani uva mandongisili mo maana moosi, nde aleeli huli bayihi ba nde: 2 «Benu liyaabi ti bilumbu byole bimiisaala, mu usa mukungi a Paake26.2 Pal 12.1-27. Sa bayeholo Mwana a Muutu, mana bakomene nde ŋa kuruwa.»
3 Buuna, bakuutu ba bangu ba bangaanga na bakuutu ba Bayudaayo, baakuukimi hu litandala li mukuutu bangaanga ba Nzambi watsomi, Kayifa. 4 Bo baakuti pfuundu mu ukaanga Yisu mu tswehi, mana baduba nde. 5 Ka bo balelisini: «A luukaangaani nde mu taangu mukungi ve, kini baatu buutuumbaha.»
Mukaasu miipuupala nyafi mu mutswe a Yisu
6 Yisu aba hu musyenge a Betanya, mu nzo a Simoni nga bwatsi. 7 Bu Yisu haaba haatsahala ŋa metse, mukaasu mumosi ayasusaha ŋa pedu a nde na itutu hya alabatere26.7 alabatere manya li mulingu li baakavangila bitutu byusyeholo nyafi. hi hyaluula mu nyafi ya kaluha yinene. Nde apuupili nyafi mo yiina ŋa yulu mutswe a Yisu. 8 Bu bayihi baamoni buuna, bo baamoni pasi mu mutima, na baaleeli: «Ki tooni mu ubiiyasa nyafi mo yiniiyi? 9 Bakiisuumbasa yo mu talu yi yaafulala na uva mbongo mo yiina huli bapuumbu!» 10 Bu Yisu haayuhi nzambilili a bo, nde aleeli: «Nyahaani nde. Mu hima benu lili mu ukwamisa mukaasu mo wunuuwu? Ma nde amiivangila mu me, maafulala bubwe. 11 Mu tooni ati, benu luuba na bapuumbu taangu yoosi, ka uto ti me, benu a luuba na me taangu yoosi ve. 12 Nde miiteehele upuupala nyutu a me nyafi, mu uvangimasa yo mu kotili ya mu ngila. 13 Mu mbuli me ndeele benu: pasi tsyelo yi buukaayabisa Musamu wu Mubwe mu toto yoosi, buukaayambila mu mukaasu mo wunuuwu na buukaayibuhala moonyi mu ma nde amiivaanga.»
Yuda miivolo kesili yi usuumbasa Yisu
14 Buuna, Yuda Isikaryoti mumosi mu bakuumi na boole li bayihi, ayamono bakuutu ba bangaanga ba Nzambi. 15 Na nde aleeli huli bo: «Benu hima luuva me, tso me tsuumbisi benu Yisu?» Bo baataangi maku matatu ma mbongo a palata, na baaviidi nde mo26.15 Zak 11.12. 16 Umata taangu mo yiina, Yuda akasaha buni nde huuyeholo bo Yisu mu taangu yi yaafwana.
Bayihi ba Yisu bamiivangimasa ilaambu hya Paake
17 Ilumbu hyatsomi hi mukungi wu mapa ma maaveledaana, bayihi baafuuli Yisu: «Huni we toondi ti bisu liyavangimasa we ilaambu hya Paake?» 18 Nde afutili bo: «Yenaani hu musyenge, huli bahala limosi, na leelaani lo ti mulongisi miileele: "Tangu a me yimiikuha, ni huli we me undya ilaambu hya Paake na bayihi ba me."» 19 Bayihi baasiidi bu Yisu haatumisi bo, na bo baavangimisi ilaambu hya Paake.
Yisu miiyabisa ti muyihi mumosi usuumbasa nde
20 Bu tsitsaha yaatoodi, Yisu atsahili ŋa meetse na bayihi bakuumi na boole. 21 Bu bo baakadya, Yisu aleeli: «Mu mbuli me ndeele benu: mumosi mu benu sa asuumbasa me.» 22 Bayihi baasinzimono lingebe, na baabaandihi ufuula nde mumosi mumosi: «Pfumu! Ni me?» 23 Yisu afutili: «Nde wuuna wu li mu upfuuta myoho mu ikoombe na me, ni nde usuumbasa me. 24 Eye, Mwana a muutu mu ukwa ali, we bu Mabasonehe ma Ngidi mali mu uyabisa mu nde26.24 Mkg 22.2-19; Esa 53. Ka ki pila lingebe huli wu li mu usuumbasa Mwana a muutu! Beedi kini bubwe mu muutu mo wuuna, avelebutama hwa nde.» 25 Yuda wu akasuumbasa nde ni uleele: «Rabi! Ni me?» Yisu afutili nde: «We miileele lo.»
Ilaambu hya Ngidi
26 Bu bo baaba mu udya, Yisu avoli lipa. Hu mbisa ufutala matondo huli Nzambi, nde atabuli lo, na aviidi lo huli bayihi ba nde na aleeli: «Volwaani na dyaani, yiniiyi ni nyutu a me.» 27 Titswene, nde avoli mbuungu ya vinye. Hu mbisa ufutala matondo huli Nzambi, nde aviidi bo yo, na aleeli: «Nywaani yo benu boosi, 28 mu tooni ati, maniima ni makila ma me, makila ma nzuhisini a Nzambi26.28 Pal 24.8; Yel 31.31-34 . Makila ma maatsamuhi mu tooni a baatu ba balahi, mu tooni a kolo-kolo yi masumu ma bo.
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)