Oséias 1

Ka va Hosiya na̱ muwun

1 Adanshi a̱ A̱sulazuva a̱ ta̱wa̱ ta̱ uba̱ta̱ wa̱ Hosiya ulobo wa̱ Beri, a mantsa mo tsugono tsa a ama a nda: Uziya na̱ Jotam na̱ Ahaz na̱ Hezekiya ngono ma Yahuda, waru za suru ushi ta̱ tsugono diga e ekere a za na kuwa̱i. A mantsa mo ndolo ma ɗa Yerobowam ulobo wa̱ Yowash da̱na̱i o tsugono a̱tsuma̱ a Isra’ila. A mantsa mo tsugono vu ngono n ndolo ɗa A̱sulazuva a̱ lyunguyi ikaka ya̱ yi o una̱ wa̱ Hosiya.✝1:1 2 Ngo 14:23; 15:7; 15:32-16:20; 18:1-20:21; 2 Alb 26:1-27:8; 28:1-32:33.

2 Ikaka yu ufaru u na A̱sulazuva a dammai Hosiya a̱ yi ɗa, <<'Ya̱wa̱, vu taraa aciya̱wu ka na aa yuwusan tsushakala adama vu matsan muwun tsipere, adama a na iɗa’a i ta yuwusan tsipere lon, a na u lyawai tsutoni na̱ A̱sula̱.>>

3 Ɗaɗa u ka̱ra̱i u zuwai Goma usheli wa̱ Dibiliyam, reve u yuwan a̱a̱tsuma̱ u matsaan yi mawun mo ulobo. 4 Ɗaɗa A̱sulazuva a dammai Hosiya, <<Vu ca yi aala Yezireyel,*1:4 Yezireyel Urevu wa̱ yi u ɗa A̱sula̱ e bete’we. adama a na wa jima na ma ca u’wa wa̱ Yehu oforo adama a mpasa n na wo ocoi ɗe Yezireyel shi. N ta̱ ta̱wa̱ nu ukosu u tsugono tsa Isra’ila.✝1:4 2 Ngo 10:11. 5 O urana u ndolo n ta kuɗa utan wa Isra’ila o Uka̱ri wa̱ Yezireyel.>>

6 Reve Goma yuwisan a̱a̱tsuma̱ u matsan usheli. Reve A̱sulazuva a dammisa Hosiya, <<Vu ca yi aala Lo Rahama,*1:6 Urevu wa aala <<Lo Rahama>> A̱yi ɗa, <<za na a cigai shi.>> adama a na m buwa o roco u’wa wa Isra’ila iliyali shi, hali na mayuwan le gafura shi. 7 Na̱ ne suru n to roco u’wa wa Yahuda iliyali, a̱vu n wawa le, agba a̱tsuma̱ e itana yu uvon wa aya ko matsun me pe’eni, ko ni ido ko na akumbi e ido ko uvon shi. Amma a̱mu A̱sulazuva A̱sula̱ e le n ta wawa le.>>

8 Ana Goma kasai Lo Rahama maani, u yuwisan ta̱ a̱a̱tsuma̱ a̱vu u matsisan mawun mo ulobo mo ro. 9 Ɗaɗa A̱sulazuva a damma niyi, <<Ca yi aala Lo Ami*1:9 Urevu wa aala <<Lo Ami>> A̱yi ɗa, aza a na a̱ ri ama a̱ va̱ shi, adama a na Isra’ila ama a̱ va̱ a ɗa shi, a̱mu waru A̱sula̱ e le a ɗa shi.>>

10 <<Suru na̱ ne ugundo wa ama a Isra’ila a̱ ta̱ da̱na̱ a̱bunda̱ cine vu revei wuyun wu nge’en m mala, n na aa gura rito ko e kece shi. Waru uba̱ta̱ u na a damma nle, <Ama a̱ va̱ a ɗa i ri shi,> a̱ ta̱ ɗe le <Muwun ma̱ A̱sula̱ a Wuma.>✝1:10 Rom 9:26. 11 Adama o ndolo reve oɓolo ama a Yahuda na ama a Isra’ila o’wo ili i ta̱. A̱vu a zuwaa aciyele zagbain ta̱, na̱ zagbain ndolo ɗa o uta̱ a usa iɗa’a. Adama a na urana u ndolo u to o’wo a̱ba̱jini o urana, urana u ɗa wa̱ Yezireyel!>>