LUKA 19

Yesʉ ayagonzera omwa Sakayo

1 Yesʉ abere ɨngɨra mo muyi w’iYeriko mwakirukania mʉwo. 2 Kwenzi ko muyi oyo kwabyaga muyira mʉgʉma nɨ yo Sakayo. Sakayo oyo abyaga mʉkʉlʉ wa bakarani b’ekoli. Kandɨ abyaga mushoki. 3 Agenda ashondya alole Yesʉ nga nɨ ndɨ. He ng’oko abyaga mofɨ, mwathakotsya ɨmʉlolako bʉshana n’obʉngɨ bw’abandʉ. 4 Bʉshana n’ekyo mwathɨbɨtha embere, n’ɨshamba kʉ mʉthɨ bʉshana ashʉnge kʉ Yesʉ, kʉshangwa aho ho Yesʉ abyaga niangatsukire. 5 Mo ndambi Yesʉ abere ahika aho, mwashʉmba amesho n’ɨbwɨra Sakayo athɨ: «Sakayo, kima tsʉba kʉshangwa nyɨtholere nɨnyagonzera omwawe munobwire.»

6 Sakayo mwakima tsʉba, na mwakokya Yesʉ na lʉmogo lʉnene.

7 Mo ndambi abandʉ boshi babere bashʉnga kw’ebyo, mobarʉkʉma bathɨ: «Ɨyaa! Amayagonzera omw’omukoli w’ebɨtsɨbʉ!»

8 He Sakayo mwimana embere sa Yesʉ n’ɨnegena athɨ: «Nyinya-kowethʉ, onvwa! Nyaha kɨtse ky’ebɨndʉ byaye ky’abatsene. Nyamabya nɨmonyanyagʉla kɨndʉ kya mʉndʉ mʉ mabesɨ nyamʉshʉbʉlɨtsyakyo ngendo ine.» 9 Aho Yesʉ mwamʉbwɨra athɨ: «Munobwire, Gongo amashabʉla abandʉ b’omo nyʉmba eno, kʉshangwa nawe kuthyo ʉlɨ w’omo lʉganda lwa Abʉrahamʉ. 10 Kʉshangwa ingye Mʉgala w’oMʉndʉ nyahikaga bʉshana n’ishondya bo babyaga nibaherire n’ɨshabʉlabo.»