Mateus 26

Enama y’eritha Yesʉ

1 Yesʉ abere amamala amakangɨrɨtsya woshi ayo, mwabwɨra abɨga bʉwe athɨ: 2 «Mwetsi kw’elinye ly’ePasaka lyabya mʉ bɨro bɨbɨrɨ, n’oMʉgala w’oMʉndʉ andahotherwa bʉshana abambwe kʉ mʉsalaba.»

3 Aho abakʉlʉ b’abaheri n’abangʉmwa b’aBayuta mobahindana mo nyʉmba ya Kayafa Muheri Mʉkʉlʉ. 4 Mobahʉlɨkɨrɨrana ɨtsɨmba Yesʉ mʉ menge bʉshana bamwithe. 5 Hewethuwe bagendaga abanegena bathɨ: «Thʉthamʉmɨnaga ekɨro ky’elinye, bʉshana abandʉ bathangakarama.»

Mʉkatsɨ ashesha mafʉtha ko muthwe wa Yesʉ

6 Yesʉ abere alɨ ɨBetanɨa mo nyʉmba ya Simoni Mʉbenzɨ, 7 mʉkatsɨ mʉgʉma mwayɨfʉnda hofɨ naye niahekire murangi wa marasi wa kɨtsɨro kɨnene. Yesʉ abere anemulya, omʉkatsɨ mwashesha amarasɨ ayo ko muthwe ʉwe. 8 Abɨga babere bashʉnga ebyo, mobatsɨbʉka n’ɨnegena bathɨ: «Bʉshana na ki bubihya bʉlɨ ng’obu? 9 Amarasɨ aya angagutsibwe kɨtsɨro kɨnene, n’ɨha esofaranga s’abatsene!»

10 Yesʉ mwamɨnya emɨanɨtsye yabo, mwabwɨrabo athɨ: «Omunubya omʉkatsɨ oyu bʉshana na ki? Ebyo amanyɨkolera bikwirire. 11 Kʉshangwa mwandabya n’abatsene ebɨro byoshi, h’ingye, muthindabye nangye ebɨro byoshi. 12 Omʉkatsɨ oyu amashesha amarasi aya ko mʉbɨrɨ aye, bʉshana n’ithegekania erɨthabwa lyaye. 13 Kwenene enyɨbabwɨra, ahoshi handafʉlwa Engʉlʉ Mbʉya eyi, mo kɨhʉgo kyoshi, bandaganʉlɨra eby’omʉkatsɨ oyu athakola, na andagenda ɨbʉkwa.»

Yuta ahothera Yesʉ

14 Aho, mʉgʉma w’oko bɨga ikumi na babɨrɨ, yo wahʉlawamo Yuta Isikariote, mwaya eyɨrɨ abakʉlʉ b’abaheri 15 n’ɨbwɨrabo athɨ: «Mwanyɨha ki nyamabaha Yesʉ?» Aho mobamʉha bɨtsere makumi ashathʉ bya faranga.*26:15 Bɨtsere makumi ashathʉ: Byabyaga bɨrɨngene na lʉhembo lwa mwetsɨ mʉgʉmaSoma Sakarɨa 11:12. 16 Ɨthoka ko ndambi eyo, Yuta mwagenda ashondya mwanya angahanamo Yesʉ.

Yesʉ alya akalyo k’ePasaka hagʉma n’abɨga bʉwe

17 Ekɨro kɨmbere ky’elinye ly’emikati ɨthemo tsatsʉ, abɨga mobayabʉtsya Yesʉ bathɨ: «Ushondya thʉyakʉkometsye akalyo k’ePasaka ko hayi?» 18 Yesʉ mwashʉbɨtsyabo athɨ: «Mʉye mo muyi omwa mʉndʉ mʉlebe na mʉmʉbwɨre mʉthɨ: "Nyinya-kowethʉ anegena athɨ endambi aye yamahika, nɨ omwawe monyalɨra ePasaka hagʉma n’abɨga baye."» 19 Abɨga mobakola nga ko Yesʉ ahamʉlagabo na mobatheka akalyo k’ePasaka.

20 Bwabere bwakʉra, Yesʉ mwalya hagʉma n’abɨga ikumi na babɨrɨ. 21 Babere banemulya, Yesʉ mwanegena athɨ: «Kwenene enyɨbabwɨra, mʉgʉma wa mw’imwe anyɨhothera.» 22 Abɨga mobafwa bulige bʉnene na mobathanga ɨmʉbʉtsya mʉgʉma mʉgʉma bathɨ: «Ni ingye he Nyinya-kowethʉ?» 23 Yesʉ mwashubya athɨ: «Yo ʉkolera hagʉma nangye mo mbale, nɨ ɨye yo wanyɨhothera. 24 oMʉgala w’oMʉndʉ ayɨgendera nga kw’aMashako anegenire kw’ɨye. Hewethuwe bʉhanya ko yo wamʉhothera! Lyabyaga lɨtholere omʉndʉ oyo nɨathabʉthwa!» 25 Yuta, yo wamʉhothera, mwamʉbʉtsya athɨ: «Ni ingye he Mʉkangɨrɨtsya?» Yesʉ mwamʉshʉbɨtsya athɨ: «Nɨ ɨwe wo wamanegena.»

Linye lya Nyinya-kowethʉ

26 Babere bakɨnalɨ abalya, Yesʉ mwatsɨmba omukati, abere amamala ɨsɨma Gongo, mwatsitsangawo na mwahawo abɨga bʉwe n’ɨbwɨrabo athɨ: «Mʉtsɨmbe, mulye, ono nɨ mʉbɨrɨ aye.» 27 Honyuma kw’aho, mwatsɨmba olwatha lw’etifai, abere amamala ɨsɨma Gongo, mwahalobo nɨanegena athɨ: «Mʉshomero imwe boshi, 28 kʉshangwa ono nɨ mʉsasɨ aye, mʉsasɨ w'endagane ow’asheshekire bʉshana na bandʉ bangɨ, na bʉshana n’obuganyiri bw’ebɨtsɨbʉ.