Êxodo 11

ಮೋಶೆನೆ ಪೈಲ್ಹೋಟ ಲಡ್ಕಾವ್ನಿ ಮರಣ್ಣಿ ಬಾರೇಮ ಬೋಲ್ಯೊತೆ

1 ಯೆಹೋವ ಮೋಶೆನ, "ಫರೋಹನಾಬಿ ಅಜು಼ ಈಜಿಪ್ಟ್‌ವಾಳನಬಿ ಬಿಜು಼ ಎಕ್ಕಸ್‌ ಮುಸಿಬತ್ ಲ್ಯಾವುಸ್‌. ಯೊ ಆವಾನ ಬಾದ್‌ಮ ತುಮುನ ಹಜ್ಜಾ಼ಥು ಜಾ಼ವಾನ ಹುಕುಮ್ ದಿಶೆ ಎತ್ರೇಸ್ ಕಾಹೆತೆ ತುಮುನ ಖ್ಹಾರಸ್ನ ಜು಼ಲಮ್‌ಥಿ ಮೋಕ್ಲಿದಿಶೆ. 2 ಇನಖ್ಹಾಜೆ ಪರ್ಖ್ಹೊ ತಯೇಡ ಖ್ಹಾರು ಇವ್ಣ ಇವ್ಣ ಆಜು಼ಬಾಜು಼ಮ ರ‍್ಹವಾಳಥಿ ಖ್ಹೊನ್ನು ರೂಪುಖ್ಹಾರು ಬೋಲಿಲೇವ್ಣುಕರಿ ಅಛ್ಛಿಂತರ ಅದ್ಮಿವ್‌ನ ಬೋಲ್"ಕರಿ ಬೊಲ್ಯೊ. 3 ಯೆಹೋವನೆ ಇಸ್ರಾಯೇಲ್‌ವಾಳಪರ್ ಈಜಿಪ್ಟ್‌ವಾಳಮ ಗೋರ್‌ ಪೈದಾಕರ‍್ಯೊ. ಆಸ್ ಕಾಹೆತೆ ಈಜಿಪ್ಟ್ ದೇಖ್ಹ್‌ಮ ಫರೋಹನು ಪರಿವಾರ್‌ವಾಳು ಅಜು಼ ಮೋಶೆನ ಮಹಾನ್ ಪರ್ಖ್ಹೊಕರಿ ಮಾನಿಲಿದು 4 ತದೆ ಮೋಶೆ ಫರೋಹನ, "ಯೆಹೋವ ಹುಕುಮ್ ಶಾತ್ ದೇಸ್‌ಕತೊ, ‘ಮೇ ಅಧಿರಾತ್‌ಮ ಈಜಿಪ್ಟ್‌ವಾಳಮಾಕರಿ ಚಾ಼ಲಿನ್ ಜೈ಼ಶ್. 5 ತದೆ ಸಿಂಹಾಸನ್‌ಪರ್ ಬೆಠೋತೆ ಫರೋಹನ್ನೊ ಪೈಲ್ಹೊಟ ಛಿಯ್ಯಾಥಿ ಧರಿನ್, ದಳಾನಿ ಘಟ್ಟಿನ ಪೀಠೆ ಬೆಠಿಥೀತೆ ದಾಸಿನ ಪೈಲ್ಹೊಟ ಛಿಯ್ಯಾಲಗುಬಿ ಈಜಿಪ್ಟ್ ದೇಖ್ಹ್‌ಮ ಛಾ಼ತೆ ಪೈಲ್ಹೊಟ ಲಡ್ಕಖ್ಹಾರು ಮರಿಜಾ಼ಷೆ. ಜಾನ್ವರ್‌ಮಾಬಿ ಪೈಲ್ಹೋಟು ಖ್ಹಾರು ಮರಿಜಾ಼ಷೆ. 6 ತದೆ ಈಜಿಪ್ಟ್ ದೇಖ್ಹ್‌ ಅಖ್ಖು ಮೋಟಿ ಅಂದ್ರೊಖ್ಹ್ ಉಷೆ, ಎಥ್ರಾನು ಅಂದ್ರೊಖ್ಹ್ ಹಮ್ಕೆಲಗು ದೇಖ್ಹ್‌ಮ ಕೆದೇಬಿ ಕೋಹುಯಿರ‍್ಹುಥೂನಿ ಅಗ್ಗಳ್ ಕೋಉಷೇನಿ. 7 ಕತೋಬಿ ಈಜಿಪ್ಟ್‌ವಾಳನಬಿ ಇಸ್ರಾಯೇಲ್‌ವಾಳನಬಿ ಯೆಹೋವ ಫರಕ್ ಕರಿರಾಖ್ಯೊಸ್ ಕರಿ ಬೋಲಾನು ತುಮುನ ಮಾಲುಮ್ ಪಡಾನಿತರ ಇಸ್ರಾಯೇಲ್‌ವಾಳಮ ಛಾ಼ತೆ ಜಾನ್ವರ್‌ನ ರ‍್ಹವೊ, ಅದ್ಮಿವ್‌ನ ವಿರೋದ್‌ರ‍್ಹವೊ ಎಕ್ ಕುತ್‌ರ‍್ಯು ಜಿನು ಭೂಕ್‌ಷೆ ಕೊಯ್ನಿ’ 8 ತದೆ "ತಾರು ಅದಿಕಾರಿಖ್ಹಾರು, ಮಾರಕನ ಆಯಿನ್ ಆಡ್ ಪಡಿನ್, ‘ತೂ ತಾರ ಅಧೀನ್‌ಮ ಛಾ಼ತೆ ಅದ್ಮಿಖ್ಹಾರು ಹಮುನ ಮ್ಹೇಲಿನ್ ಜಾ಼ವ್ಣುಕರಿ ಗಿಂಗಾವ್‌ಷೆ. ಇನಪಾರ್ ಮೇ ಚ಼ಲ್ಯೊಜೈಷ್" ಕರಿ ಬೊಲ್ಯೊ. ಮೋಶೆ ಆ ವಾತೆನ ಬೋಲಿನ್ ಇರಾದೇಥಿ ಭರೈನ್ ಫರೋಹನ ಮ್ಹೇಲಿನ್ ನಿಕ್ಳಿನ್ ಚ಼ಲೆಗಯೊ. 9 ಯೆಹೋವ ಮೋಶೆನ, "ಈಜಿಪ್ಟ್ ದೇಖ್ಹ್‌ಮ ಮಾರು ಮಹಾನ್ ಕಾಮ್ನ ಬಿಜೂ಼ಬಿ ಘಣೇಥಿ ಚಾ಼ಲ್ನುತೆಖ್ಹಾಜೆ ಫರೋಹ ತುಮಾರಿ ವಾತ್ನ ಖ್ಹಮಜ಼್‌ಷೆ ಕೊಯ್ನಿ" ಕರಿ ಬೊಲ್ಯೊ. 10 ಮೋಶೆ ಅಜು಼ ಆರೋನ ಇವ್ಣೆ, ಫರೋಹನ ಖ್ಹಾಮ್ಣೆ ಯೊ ಮಹಾನ್ ಕಾಮ್‌ಖ್ಹಾರು ಕರ‍್ಯು. ಕತೋಬಿ ಯೆಹೋವ ಫರೋಹನ ದಿಲ್ನ ಹಟಕರಾಯೊತೆ ಇನಖ್ಹಾಜೆ ಫರೋಹ ಇಸ್ರಾಯೇಲ್‌ವಾಳನ ಇನ ದೇಖ್ಹ್‌ನ ಮ್ಹೇಲಿನ್ ಜಾ಼ವಾನ ಹುಕುಮ್ ಕೊ ದಿದೋನಿತೆ ಗಯೊ.