1 SAMUEL 16

Samuel Ɔsɔla David Nnɔĩ Lɛ Igara

1 Bosate ɔɣere Samuel sɔ, "Ku me ɔwi aanyua imararãso i Saul iti gɔ loɔsɛ̃ wũ lɛ Israel igara awe? Su nnɔĩ fere i ibui*16.1 ibui: I Israel kubarara kanya ne, masɛ mafere nnɔi i isa ame masu masɔla igara ame si aɣo ɔri, nto losese-ɔ Yese kɔrɛ i Betlehem. Loɔɖi ɔ̃ ɔbibirɛrɛĩ ɔwɛ̃ sɔ ɔɖe igara."

2 Ɣɛɛ Samuel ɔkarɛ sɔ, "Nda loabara loasɛ? Si Saul ɔnɔ ne ɔto ɔ̃aɖoe me."

Ne Bosate ɔtã mmuai sɔ, 'Su nantsuĩbitɛ wɔ loiɣe ɔnya la si aɣɛ sɔ, "Loba losɔrɛ ara lotã Bosate.' 3 Kpedza Yese bɔ ara isɔrɛ ame, fiɛ loate-ɔ nnɛ aabara. Nwɔ loɖi ne ɔ̃ aasɔla nnɔĩ atã me ne.

4 Samuel ɔbara nnɛ i Bosate ɔɣɛ. Ɔwi wɔ ɔbo i Betlehem ne, ɔmagɛ̃ makpakpa ɔba maasarɛgu wũ ku iti ikpakpa. Makarɛ wũ sɔ, "Isobuɛ ame aba?"

5 Samuel ɔtã mmuai sɔ, "Aĩ, isobuɛ ame iɖe; loba losɔrɛ ara lotã Bosate. Misekelera so si mibagu me ara isɔrɛ ame." Ne Samuel ɔsekelera Yese gu ɔ̃ mabibirɛrɛĩ fiɛ ɔkpedza ma ɔbɔ isɔrɛ ame ne.

6 Gɔ maba ne Samuel ɔnya Eliab ne ɔbu sɔ, "Gbaã Bosate nwɔ ɔsɔla nnɔĩ nɣɛ i Bosate anɔ i ngbe ne."

7 Ɣɛɛ Bosate ɔɣere Samuel sɔ, "Daanyɔ sɔ ɔ̃ ɔɖe ala ɔre situri ɣee ɔkɔlɛ ɔso, loiɖi wũ. Bosate iisɛ ɔnyɔ ara lɛ kumɛgɔ i maturi sɛ manyɔ ara awe. Maturi sɛ manyɔ ara kato kato kuseme, ɣɛɛ Bosate sɛ ɔnyɔ ɔtu ame."

8 Ne Yese ɔkpere Abinadab ne ɔɣere wũ sɔ ɔnene si ɔsɛ ɔfe i Samuel katɔ̃. Ɣɛɛ Samuel ɔɣɛ sɔ, "Bosate iiɖi nwɔgbe ana." 9 Yese ɔtã Samax ɔsɛ ɔne ɔba si ɔsɛ katɔ̃, ɣɛɛ Samuel ɔɣɛ sɔ, "Nwɔgbe ana Bosate iiɖi wũ." 10 Yese ɔtã ɔ̃ mabibirɛrɛĩ ikɔdzɛ ɔsɛ mafe Samuel katɔ̃, ɣɛɛ Samuel ɔɣere wũ sɔ, "Bosate iiɖi mmagbe." 11 Ne ɔso ɔkarɛ Yese sɔ, "Mabibirɛrɛĩ ɔɖuɖu ma aba i ngbe ne?"

Yese ɔtã mmuai sɔ, "Ɔbirɛrɛĩ kosore ɔkuti ɔpia. Ɣɛɛ ɔkpa ɔ̃anyɔ masɛrɛ iso."

Samuel ɔɣɛ sɔ, "Pia ɔrere si ɔkpere wũ ɔbɔ, boibasɛ i karɔ̃ gbɔgbɔɔgbɔ ɔba ɔ̃abo."

12 Ne ɔso ɔpia ɔturi fiɛ makɔ wũ mabɔ. Ɔɖe ɔbi gu ɔko ɔrɛtɛa nwɔ kuseme nlɛ fiɛ ɔre situri ku anɔmi fɛrɛrɛa.

Ne Bosate ɔɣɛ sɔ, "Ta si asɔla wũ nnɔĩ, ɔ̃ ɔɖe ne."

13 Ne ɔso Samuel ɔsu ibui gu nnɔĩ fiɛ ɔsɔla wũ i ɔ̃ manyiibirɛrɛĩ katɔ̃. Ne Bosate Siwarã ɔba i David iso ku ɔle ita iyi nɛmɔ iso. Ne Samuel ka ɔkɛlɛ Rama.

David Ɔbara Karabara Ɔtã Saul

14 Kiniɔ ne Bosate Siwarã ɔɔrui i Saul iso ne Bosate ɔtã siwarã nyanyariã ɔba siaɖaa wũ.

15 Saul maɖabo ɔɣere wũ sɔ, "Nyɔ, siwarã lalaa dzɛ lobɔrɛ i Ɣaa kɔrɛ to siɖaa-ɔ. 16 Tã fɔ maɖabo ma i ngbe si mabie ɔturi ɔrere wɔ loawo siwɛ̃ sango ɔsa. Ɔ̃asa wũ si siwarã lalaa dzɛ lobɔrɛ i Ɣaa kɔrɛ ɔba-ɔ iso, iyɔ ito ialɛ-ɔ iɖo."

17 Ne ɔso Saul ɔɣere ɔ̃ maɖabo sɔ, "Mibie ɔturi ɔrere wɔ nsɛ ɔsa siwɛ̃ sango kukaakɔ si mikɔ wũ mibɔ me."

18 Maɖabo ɔwɛ̃ ɔtã mmuai sɔ, "Lonya Yese wɔ lobɔrɛ i Betlehem ɔbibirɛrɛĩ ɔwɛ̃ wɔ nɣe kumɛgɔ masa siwɛ̃ sango. Ɔɖe kpãrɛrɛĩ fiɛ ɔba kagbegbe, nwɔ nsɛ ɔɖeika kukaakɔ fiɛ ɔre situri; ana neBosate piagu wũ."

19 Ne Saul ɔsese makpabo i Yese kɔrɛ ɔɣere wũ sɔ, "Sese me fɔ ɔbi David wɔ nsɛ ɔnyɔ masɛrɛ iso." 20 Ne ɔso Yese ɔkɔ ɔ̃ ɔbi David ne ɔsu ɔfirimu ɔsia boɖoboɖo ato, wain bɔiakokpo ɔwɛ̃ gu katepuĩ bitɛ ɔkɛlɛ Saul kɔrɛ ne.

21 David ɔba Saul kɔrɛ ne ɔbo i ɔ̃ karabara ame ne. Saul ɔɖɔɛ wũ gbaã, ne David ɔkpese ɔ̃ akpirasarãdze ɔwɛ̃.

22 Saul ɔsese Yese kanya ɔɣɛ sɔ, "Tã David si ɔwe i wũ karabara ame, alasɔ ɔbo me anɔ."

23 Ɔwi ɔrere wɔ i siwarã lalaa dzɛ lobɔrɛ i Ɣaa kɔrɛ ɔba i Saul iso ne, David ɔ̃asu ɔ̃ siwɛ̃ sango ɔsa. Iyɔ siwarã lalaa sɛ sita wũ iso, so ɔɔɣɔ Saul ibɛrɛkɛ ilɛ wũ.