1 SAMUEL 19

Mixal Ɔɖi David Ngbã

11 Saul ɔsese makpakpɛ̃dze i David iyo. Ɔɣere ma sɔ madzuɛ̃ si maɖoe wũ ku kaya. Ɣɛɛ David ɔre Mixal, ɔsɛ̃ wũ ɔɣere wũ sɔ, "Si airui atere ku kasɛ̃ gagbe i fɔ ngbã iti ne, mato maaɖoe-ɔ ku kɔrãkaɖe." 12 Ne ɔso Mixal ɔbuai David iso ɔsora wũ ɔkigu i fesere kanya fiɛ ɔrui ɔtere. 13 Ne Mixal ɔsu irapɔa*19.13 Irapɔa: Iyo biara ɔwe ɣaa i iyo i Israel karɔ̃ iso marɔ ne sɔ 'teraphim' i Hebrew siɖe ame ɔsu ɔrara i karɛkɔ̃ iso ɔfu ne arapia fiɛ ɔsu katepuĩ siwɛrɛ̃ ɔsia i iti kasiakɔ̃.

14 Ɔwi wɔ i Saul ɔsese ɔ̃ makpakpɛ̃dze sɔ masɛ maamɔɛ̃ David ne, Mixal ɔɣɛ sɔ, "Ɔto ɔnyɛ."

15 Ne Saul ɔledza makpakpɛ̃dze isese sɔ masɛ maanyɔ David, ne ɔɣere ma sɔ, "Mikɔ wũ i ɔ̃ karɛkɔ̃ iso mibɔ me si loaɖoe wũ." 16 Ɣɛɛ gɔ makpakpɛ̃dze ɔbo i iyo kame ne, manyɔ ne irapɔa nrɛ i karɛkɔ̃ iso fiɛ katepuĩ siwɛrɛ̃ se i iti kasiakɔ̃.

17 Saul ɔɣere Mixal sɔ, "Be ɔso asɔsɔla me ngbɔ fiɛ atã wũ tsirise ɔrui ɔtere?"

Mixal ɔtã wũ mmuai sɔ, "Ɔɣere me sɔ, 'Si aibuai me lorui lotere ne loaɖoe-ɔ.' "

18 Ɔwi wɔ i David ɔɔrui ɔtere ne, ɔkɛlɛ Samuel kɔrɛ i Rama ɔsɛ ɔ̃aɣere wũ nwa pelepele i Saul ɔɔbara wũ. Ne ma gu Samuel ɔkɛlɛ Nayot masɛ maawe i mmɔ.