Ezequiel 36

इस्राएल पै परमेसवर की आशीष

1 "फेर हे माणस की सन्तान, तू इस्राएल के पहाड़ां तै भविष्यवाणी करकै कह, हे इस्राएल के पहाड़ों, यहोवा का वचन सुणो। 2 परमेसवर यहोवा न्यू कहवै सै: दुश्मन नै तो थारे बारै म्ह कह्या सै, ‘आहा! पुराणे बखत की ऊँच्‍ची जगहां इब म्हारे हक म्ह आगी’ 3 इस कारण भविष्यवाणी करकै कह, परमेसवर यहोवा न्यू कहवै सै: माणसां नै जो थारे ताहीं उजाड़या अर च्यांरु ओड़ तै थारे ताहीं इसा निगळ लिया के थम बची होई जात्तां*36:3 बची होई जात्तां लोवै-धोवै की जात्तां जो यरुशलेम के पतन के पाच्छै रह गई थी अर उननै उसतै फायदा ठाया होगा। का हक हो जाओ, अर बकवादी थारा जिक्र करै अर आम माणस थारी निन्दा करै सैं; 4 इस कारण, हे इस्राएल के पहाड़ों, परमेसवर यहोवा का वचन सुणो, परमेसवर यहोवा थारे तै न्यू कहवै सै, यानिके पहाड़ां अर पहाड़ियाँ तै अर नाळयां अर तराइयां तै, अर उजड़े होए खण्डहरां अर निर्जन नगरां तै जो च्यांरु ओड़ की बची होई जात्तां तै लूट गे अर उनके हाँसण का कारण होगे सैं; 5 परमेसवर यहोवा न्यू कहवै सै, पक्‍का मन्‍नै अपणी जळण की आग म्ह बची होई जात्तां के अर सारे एदोम कै बिरुध्द म्ह कह्या सै के जिननै मेरे देश ताहीं अपणे मन के पूरे आनन्द अर घमण्ड तै अपणे हक म्ह करया सै के वो पराया होकै लूट्या जावै। 6 इस कारण इस्राएल के देश के बारें म्ह भविष्यवाणी करकै पहाड़ां, पहाड़ियाँ, नाळयां, अर तराइयां तै कह, परमेसवर यहोवा न्यू कहवै सै, देक्खो, थमनै जात्तां की निन्दा सही सै*36:6 थमनै जात्तां की निन्दा सही सै गैर जातियाँ नै उनकी निन्दा की थी।, इस कारण मै अपणी बड़ी जळजळाहट तै बोल्या सूं। 7 परमेसवर यहोवा न्यू कहवै सै: मन्‍नै या कसम खाई सै के बेसक थारे च्यांरु ओड़ जो जात सैं, उननै अपणी निन्दा खुदे सहणी पड़ैगी।"

8 "पर, हे इस्राएल के पहाड़ों, थारे पै डाळियाँ पनपैंगी अर उनके फळ मेरी प्रजा इस्राएल के खात्तर लागैंगे; क्यूँके उसका बोहड़ आणा धोरै सै। 9 देक्खो, मै थारे पक्ष म्ह सूं, अर थारी ओड़ कृपादृष्टि करुँगा, अर थम जोत्ते-बोए जाओगे; 10 अर मै थारे पै घणे माणस यानिके इस्राएल के सारे घरान्‍ने नै बसाऊँगा; अर नगर फेर बसाए अर खण्डहर फेर बणाए जावैंगे। 11 मै थारे पै माणस अर पशु दोन्‍नु नै घणे बढ़ाऊँगा; अर वे बढ़ैंगे अर फूल्‍लै-फळगें; अर मै थमनै पुराणे बखत की तरियां बसाऊँगा, अर पैहले तै घणी थारी भलाई करुँगा। फेर थम जाण ल्योगे के मै यहोवा सूं। 12 मै इसा करुँगा के माणस यानिके मेरी प्रजा इस्राएल थारे पै चाल्‍लै-फिरैगी; अर वे थारे माल्‍लिक होवैंगे, अर थम उनका अपणा हिस्सा होवैंगे, अर वे फेर थारे कारण बेबस न्ही होवैंगे। 13 परमेसवर यहोवा न्यू कहवै सै: जो माणस थारे तै कह्या करै सैं, ‘तू माणसां का खाणआळा सै, अर अपणे पै बसी होई जात्ति नै बेबस कर देवै सै,’ 14 इस करकै फेर तू माणसां नै ना खावैगा, अर ना अपणे पै बसी होई जात्ति नै बेबस करैगा, परमेसवर यहोवा की याए वाणी सै। 15 मै फेर जात्ति-जात्ति के माणसां तै तेरी निन्दा ना सुणवाऊँगा, अर तेरे ताहीं जात्ति-जात्ति की ओड़ तै फेर निन्दा न्ही सहणी पड़ैगी, अर तेरे पै बसी होई जात्ति नै तू फेर ठोक्‍कर ना खुवावैगा, परमेसवर यहोवा की याए वाणी सै।"

इस्राएल का नया जीवन

16 फेर यहोवा का यो वचन मेर धोरै पोहच्या 17 "हे माणस की सन्तान, जिब इस्राएल का घरान्‍नां अपणे देश म्ह रहवै था, फेर अपणी चाल चलण अर काम्मां के जरिये वे उसनै अशुद्ध करै थे; उनकी चाल चलण मेरे ताहीं ऋतुमती की अशुद्धता जिसी जाण पड़ै थी। 18 इस करकै जो हत्या उननै देश म्ह करी, अर देश ताहीं अपणी मूरतां कै जरिये अशुद्ध करया, इसकै कारण मन्‍नै उनपै अपणी जळजळाहट भड़काई। 19 मन्‍नै उन ताहीं जात्ति-जात्ति म्ह तित्तर-बितर करया, अर वे देश-देश म्ह बिखरगे; उनके चाल चलण अर काम्मां कै मुताबिक मन्‍नै उनतै सजा दी। 20 पर जिब वे उन जात्तां म्ह पोहचे जिन म्ह वे पोहचाये गये, फेर उननै मेरे पवित्र नाम ताहीं अपवित्र ठहराया*36:20 फेर उननै मेरे पवित्र नाम ताहीं अपवित्र ठहराया गैर जातियाँ यो कहवै के ये माणस परमेसवर की प्रजा सैं, थारे कारण मेरे पवित्र नाम की अपमान करैं थे। गैर जात कैदियाँ की बुरी हालत देखकै कहवै थी के यहोवा सिर्फ एक राष्ट्रीय देवता सै जिस म्ह शक्ति न्ही के अपणी बेट्टियाँ नै बचाले।, क्यूँके माणस उनके बारे म्ह न्यू कहण लाग्गे, ‘या यहोवा की प्रजा सैं, पर उसके देश तै लिकाड़े गए सैं।’ 21 पर मन्‍नै अपणे पवित्र नाम की खबर ली, जिसनै इस्राएल के घरान्‍ने ताहीं उन जात्तां के बीच अपवित्र ठहराया था, जड़ै वे गये थे।"

22 "इस कारण तू इस्राएल के घरान्‍ने तै कह, परमेसवर यहोवा न्यू कहवै सै: हे इस्राएल के घरान्‍ने, मै इसनै थारे खात्तर न्ही, पर अपणे पवित्र नाम कै अनुसार करुँ सूं जिसतै थमनै उन जात्तां ताहीं अपवित्र ठहराया जड़ै थम गये थे। 23 मै अपणे बड़े नाम नै पवित्र ठहराऊँगा, जो जात्तां म्ह अपवित्र ठहराया गया, जिस ताहीं थमनै उनके बिचाळै अपवित्र करया; अर जिब मै उनकी नजर म्ह थारे बीच पवित्र ठहरूँगा, फेर वे जात जाण लेवैगी के मै यहोवा सूं, परमेसवर यहोवा की याए वाणी सै। 24 मै थमनै जात्तां म्ह तै ले ल्यूँगा, अर देशां म्ह तै कठ्ठा करुँगा; अर थमनै थारे अपणे देश म्ह पोंहचा दियुँगा। 25 मै थारे पै शुद्ध पाणी छिड़कूँगा, अर थम शुद्ध हो जाओगे; अर मै थमनै थारी सारी अशुद्धता अर मूरतां तै शुद्ध करुँगा। 26 मै थमनै नया मन देऊँगा, अर थारे भित्तर नई आत्मा पैदा करुँगा; अर थारी देह म्ह तै पत्थर का दिल लिकाड़कै थमनै माँस का दिल देऊँगा। 27 मै अपणा आत्मा थारे भित्तर देकै इसा करुँगा के थम मेरी विधियाँ पै चाल्‍लोगे अर मेरे नियमां नै मानकै उनके मुताबिक करोगे। 28 थम उस देश म्ह बसोगे जो मन्‍नै थारे पितरां तै दिया था; अर थम मेरी प्रजा ठहरोगे, अर मै थारा परमेसवर ठहरूँगा। 29 मै थमनै थारी सारी अशुद्धता तै छुड़ाऊँगा, अर अन्‍न उपजण का हुकम देकै, उसनै बढ़ाऊँगा अर थारे बीच काळ ना गेरूँगा। 30 मै दरखतां के फळ अर खेत की फसल बढ़ाऊँगा, के जात्तां म्ह काळ कै कारण फेर थारी निन्दा न्ही होवैगी। 31 फेर थम अपणे बुरे चाल चलण अर अपणे काम्मां नै जो आच्छे न्ही थे, याद करकै अपणे अधर्म अर घिनोणे काम्मां कै कारण अपणे आप तै घृणा करोगे। 32 परमेसवर यहोवा की या वाणी सै, थम जाण ल्यो के मै इसनै थारे खात्तर न्ही करदा। हे इस्राएल के घरान्‍ने अपणे चाल चलण कै बारै म्ह शर्मिन्दा हो अर थारा मुँह काळा हो जावै।"

33 "परमेसवर यहोवा न्यू कहवै सै, जिब मै थमनै थारे सारे अधर्म के काम तै शुद्ध करुँगा, फेर थारे नगरां नै बसाऊँगा; अर थारे खण्डहर फेर बणाए जावैंगे। 34 थारा देश जो सारे आण-जाण आळयां कै स्याम्ही उजाड़ सै, वो उजाड़ होण के बदलै जोत्या बोया जावैगा। 35 अर माणस कह्या करैंगे, ‘यो देश जो उजाड़ था, वो अदन के बाग जिसा होग्या, अर जो नगर खण्डहर अर उजाड़ होगे अर ढाए गये थे, वे गढ़आळे होए, अर बसाए गये सैं।’ 36 फेर जो जात थारे लोवै-धोरै बची रहवैंगी, वे जाण लेवैगी के मन्‍नै यहोवा नै ढाए होए ताहीं फेर बणाया, अर उजाड़ म्ह पेड़ रोप्पे सैं, मन्‍नै यहोवा नै न्यू कह्या, अर इसाए करुँगा।"

37 "परमेसवर यहोवा न्यू कहवै सै, इस्राएल के घरान्‍ने म्ह फेर मेरे तै बिनती करी जावैगी के मै उनके खात्तर यो करुँ; यानिके मै उन म्ह माणसां की गिणती भेड़-बकरियाँ की तरियां बढ़ाऊँ। 38 जिसा पवित्र बखत की भेड़-बकरियाँ, यानिके नियत त्यौहारां के बखत यरुशलेम म्ह की भेड़-बकरियाँ अनगिणत होवै सैं उस्से ए तरियां जो नगर इब खण्डहर सैं वे अनगिणत माणसां के झुण्डां तै भर जावैंगे। फेर वे जाण लेवैंगे के मै यहोवा सूं।"