1 राजा 18

देशो रा सूका खत्म ऊणा

41 तेबे एलिय्याहे अहाबो खे बोलेया, "उठी की खा-पी, कऊँकि पारी बर्खा ऊणे री आवाज आऊणे लगी री।" 42 तेबे अहाब खाणे-पीणे चली गा ओर एलिय्याह कर्मेल पाह्ड़ो री चूँडिया पाँदे चढ़ीगा ओर जमीना दे पड़ी की आपणा मूँ जानूआ बीचे करी ता। 43 ओर तिने आपणे सेवको खे बोलेया, "चढ़ी की समुद्रो रिया तरफा खे नजर करी की देख," तेबे तिने चढ़ी की देखेया ओर वापस ऊई की बोलेया, "कुछ नि दिशदा।" एलिय्याहे बोलेया, "फेर सात बार जा।" 44 साती बार तिने बोलेया, "देख, समुद्रो बीचा ते माणूंए रे आथो रा जा एक छोटा बादल़ उठणे लगी रा।" एलिय्याहे बोलेया, "अहाबो गे जाई की बोल कि रथो पाँदे चढ़ी की थाले जा, केथी एड़ा नि ओ कि तूँ बर्खा रिया बजअ ते एथी रूकी जाए।" 45 थोड़ी जी देर बाद ई सर्ग अवा साथे उडाई री पऊण ओर तूफानो साथे काल़ा ऊईगा ओर पारी बर्खा ऊणे लगी ओर अहाब रथो पाँदे चढ़ी की यिज्रेलो खे गया।*18:45 याकू. 5:18