1 सुलैमान राजे मिस्रो रे राजा फिरौनो साथे दोस्ती कित्ती ओर तेसरिया बेटिया साथे ब्या करी ता। से यरूशलेम शईरो दे दाऊदपुर जगा दे तदुए तक रई जदुए तक कि मईल, यहोवे रा मन्दर, ओर यरूशलेम शईरो रे चऊँ कनारली दवाल बनाणे रा काम पूरा नि ऊई गा। 2 तेस बखते यहोवे रा मन्दर बणी की त्यार नि ऊई रा था, इजी री खातर इस्राएलो रे लोक एबु बी ऊच्ची जगा देई डांगरा खे बलि करेया करो थे। 3 सुलैमान यहोवे ते प्यार करो था ओर आपणे बाओ दाऊदो री बिदिया पाँदे चलदा तो रया, पर से ऊच्ची जगा पाँदे बी बलि चढ़ाओ था ओर तूप बाल़ो था। 4 तेबे राजा गिबोन शईरो दे बलि चढ़ाणे खे गया, कऊँकि मुख्य ऊच्ची जगा सेई थी, तेबे तेथो री बेदिया पाँदे सुलैमाने 1,000 आगी दे होमबलि चढ़ाए।

5 जेबे सुलैमान गिबोनो दे था, तेबे यहोवे राती सुफने रे जरीये तेसखे दर्शण देई की बोलेया, "जो कुछ तूँ चाएआ कि आऊँ ताखे देऊँ, से मांते माँग।" 6 सुलैमाने बोलेया, "तूँ आपणे दास मेरे बाओ दाऊदो पाँदे बड़ी कृपा करदा रया, कऊँकि से आपू खे तां सामणे जाणी की तां साथे सच्चा, वफादार ओर ईमानदार था। तैं तेस पाँदे एथो तक करूणा कित्ती थी कि तेसखे तेसरी गद्दिया पाँदे बैठणे वाल़ा एक पाऊ देई राखेया, जेड़ा कि आज सामणे ए। 7 ओर एबे ओ मेरे यहोवा परमेशर! तैं आपणे दास मेरे बाओ दाऊदो री जगा पाँदे राजा बणाई राखेया, पर आऊँ छोटे पाऊए जेड़ा ए जो एसा जिम्मेदारिया खे निबाणा नि जाणदा। 8 पर तेरा दास तेरी चूणी री प्रजा रे बऊत लोका बीचे ए, जिना री गिणती बऊत जादा ऊणे रिया बजअ ते नि ऊई सकदी। 9 तूँ आपणे दासो खे आपणी प्रजा रा न्याय करने खे समजणे खे एड़ी शक्ति दे कि आऊँ खरे-बुरे खे परखी सकूँ, कऊँकि एड़ा कुण ए जो तेरी इतणी बड़ी प्रजा रा न्याय करी सको?" 10 एते गल्ला ते परमेशर बऊत खुश ऊआ कि सुलैमाने एड़ा वरदान मांगेया। 11 तेबे परमेशरे तेसखे बोलेया, "कऊँकि तैं एड़ा वरदान मांगी राखेया ओर ना तो लाम्बी उम्र, ना पैसा ओर ना आपणे दुश्मणा रा नाश मांगेया, पर समजणे खे विवेको रा वरदान मांगी राखेया, इजी री खातर सुण, 12 आऊँ तेरे मांगणे रे मुताबिक करूँआ, ताखे अक्ल ओर विवेको साथे परेया रा मन देऊँआ, एथो तक कि तां जेड़ा ना तो तांते पईले कोई ऊआ ओर ना बादो ते कोई कदी ऊणा। 13 फेर जो तैं नि मांगेया, मतलब पैसा ओर महिमा, से बी आऊँ ताखे एथो तक देऊँआ कि तेरी पूरी जिन्दगी तां जेड़ा कोई राजा नि ऊणा। 14 तेबे जे तूँ आपणे बाओ दाऊदो जेड़ा मेरी बाटा दे चलदा ऊआ, मेरी बिदिया खे ओर आज्ञा खे मानदा रएगा, तो मां तेरी उम्र बढ़ाणी।"

15 तेबे सुलैमान जागी की उठेया ओर देखेया कि ये तो सुफना था। तेबे से यरूशलेम शईरो खे गया ओर यहोवे रे वाचा रे सन्दूको सामणे खड़ा ऊई की, होमबलि ओर मेलबलि चढ़ाए ओर आपणे सारे कर्मचारिया खे पाट्टिया कित्तिया। 16 एक दिन दो वेश्या राजे गे आई की तेस सामणे खड़ी गिया। 17 तिना बीचा ते एक जवाणस बोलणे लगी, "ओ मेरे प्रभु! आऊँ ओर ये जवाणस दोनो एक ई कअरे रऊँईया ओर एसा साथे कअरे रंदे ऊए मेरे एक बच्चा ऊआ। 18 तेबे मेरे बच्चा ऊणे ते तीन दिन बाद एसा जवाणसा रे बी बच्चा ऊआ; आसे दोनो साथे-साथे थिया, आसा दुँईं खे छाडी की कअरे ओर कोई माणूं नि था। 19 ओर राथियो खे एसा जवाणसा रा बच्चा एसा निठे दबी की मरी गा। 20 तेबे एसे आदिया राती उठी की, जेबे तेरी दासी सई दी थी, तेबे मेरा बच्चा मांगा गे ते लई की आपणी छातिया पाँदे राखी ता ओर आपणा मरेया रा बच्चा मेरी छातिया गे लटयाल़ी ता। 21 प्यागा जेबे आऊँ आपणे बच्चे खे दूद पल्याणे खे उठी, तेबे से मरेया रा मिलेया; पर प्यागा मैं से त्यानो ते देखेया कि से मेरा पाऊ नि ए।" 22 तेबे दूजी जवाणसे बोलेया, "ना, जिऊँदा पाऊ मेरा ए ओर मरेया रा पाऊ तेरा ए। पर से बोलदी रयी, ना, मरेया रा तेरा ए ओर जिऊँदा पाऊ मेरा ए, ईंयाँ सेयो राजे सामणे बईस करदिया रईया।" 23 राजे बोलेया, "एक तो बोलोई कि जो जिऊँदा ए, सेई मेरा पाऊ ए ओर मरेया रा पाऊ तेरा ए ओर दूजी बोलोई कि ना, जो मरेया राए, से तेरा ए ओर जो जिऊँदा ए, से मेरा पाऊ ए।" 24 तेबे राजे बोलेया, "मांगे तलवार ल्याओ;" तेबे एक तलवार राजे गे ल्याई। 25 तेबे राजे बोलेया, "जिऊँदे बच्चे रे दो टुकड़े करी की आदा एसा जवाणसा खे देई दो आदा दूजिया जवाणसा खे देई दो।" 26 तेबे जिऊँदे पाऊए री माया रा मन आपणे पाऊए रे प्यारो ते परी गा ओर तेसे राजे खे बोलेया, "ओ मेरे प्रभु! जिऊँदा पाऊ एसा खे देई दे; पर एसखे नि मारो।" दूजी जवाणसे बोलेया, "से ना तो मेरा ऊणा चाईयो, ना तेरा, एसरे दो टुकड़े करी देयो।" 27 तेबे राजे न्याय करदे ऊए ईंयाँ बोलेया, "पईलिया जवाणसा खे जिऊँदा बच्चा देई दो; ये नि काणा; कऊँकि एसरी माये ये ईए।" 28 जो न्याय राजे कित्तेया था, तेतेरा सन्देश सारे इस्राएलो खे मिलेया ओर तिने राजे रा डर मानेया, कऊँकि तिने ये देखेया कि तेसरे मनो दे न्याय करने खे परमेशरो री बुद्धि ए।