1 एक दिन भविष्यबक्तेया बीचा ते किने एकी एलीशा नबीए खे बोलेया, "ये जगा जेती आसे तां साथे रऊँए, ये आसा खे बऊत छोटी ऊई गी ए। 2 इजी री खातर आसे यरदनो री नदिया तक चलूँए ओर तेथा ते एक-एक लकड़ी लई की, एती आपू खे रणे खे एक जगा बणाऊँए;" एलीशा नबीए बोलेया, "ठीक ए, जाओ।" 3 तेबे एकी जणे बिनती करी की बोलेया, "तूँ बी आसा साथे चल;" तिने बोलेया, "चलूँआ।"

4 तेबे से तिना साथे चलेया ओर सेयो यरदन नदिया रे कनारे पऊँची की लकड़ी बाडणे लगे। 5 पर जेबे एक जणा लकड़ी बाडणे लगी रा था, तो क्वाड़ी थरे ते निकल़ी की पाणिए बीचे छूटी गी; तेबे से चींगी की बोलणे लगेया, "हाय!, मेरे प्रभु, से तो मांगी की थी ल्याई री।" 6 परमेशरो रे दास एलीशे पूछेया "से केई जे छूटी?" जेबे तिने जगा बताई, तेबे तिने एक लकड़ी बाडी की तेथी पाईती ओर से लोआ पाणिए पाँदे तरने लगेया। 7 तिने बोलेया, "एतेखे पाणिये ते चकी लो।" तेबे तिने से पाणिए पाँदा दे चकी की आपू गे लई ली।

8 एक बार जेबे अरामो रा राजा इस्राएलो साथे लड़ने खे आपणी सेना पेजणे खे त्यार ऊआ तेबे तिने पईले आपणे सेनापतिया साथे सला कित्ती ओर तीना खे बताओ था कि सेयो आपणे डेरे केई लगाओ। 9 तेबे परमेशरो रे पग्त एलीशे इस्राएलो रे राजे खे सन्देसा पेजेया, "चौकसी कर ओर तेते जगा रिये ऊई की नि जाया, कऊँकि तेती अरामी सिपाई लूकी रे।" 10 तेबे इस्राएलो रे राजे तेते जगा दे, जेतेरे बारे दे परमेशरो रे दासे तेसगे बताया था, दूत पेजी की आपणी रक्षा कित्ती ओर एड़ा एक, दो बार नि, बल्कि कई बार ऊआ।

11 इजी बजा ते अरामो रे राजे रा मन बऊत कबराईगा; तेबे तिने आपणे कर्मचारिया खे बुलाई की तिना ते पूछेया, "क्या तुसा मांगे नि बताणा कि आसा बीचा ते इस्राएलो रे राजे रिया तरफा खे कुण ए?" तेसरे एकी कर्मचारिये बोलेया, "ओ मेरे प्रभु! ओ राजा! एड़ा नि ए, 12 एलीशा जो इस्राएलो दे भविष्यबक्ता ए, से इस्राएलो रे राजे खे तिना गल्ला बी बताई देयोआ, जो तूँ आपणे सऊणे रे कमरे दे बोलेया।" 13 राजे बोलेया, "जाई की देखो कि से केई ए, तेबे मां आपणे माणूं पेजी की से पकड़वाणा।" तेबे तेसखे ये सन्देश मिलेया कि "से दोतानो दे आ।" 14 तेबे तिने तेथी कोड़े ओर रथा समेत पारी सेना पेजी ओर तिने राती आई की शईर चऊँ कनारा ते केरी ला। 15 प्यागा परमेशरो रे पग्तो रा सेवक उठेया ओर निकल़ी की क्या देखोआ कि कोड़े ओर रथा समेत एकी दले शईर केरी राखेया। तेबे तेसरे सेवके तेसखे बोलेया, "हाय! मेरे स्वामी, आसे क्या करुँ?" 16 तिने बोलेया, "डर नि; कऊँकि जो म्हारी तरफा खे ए, से तिना ते जादा ए, जो तिना रिया तरफा खे ए।" 17 ये बोलणे ते बाद एलीशे ये प्रार्थना कित्ती, "ओ यहोवा, एसरिया आखी खोली दे कि ये से देखी सको जो आऊँ देखूँआ।" तेबे यहोवे एलीशा रे सेवको रिया आखी खोली तिया ओर जेबे से देखणे लगेया, तेबे क्या देखेया कि एलीशा रे चऊँ कनारला पाह्ड़ आगी वाल़े कोड़ेया ओर रथा साथे फरेया राए। 18 जेबे अरामी लोक तेसगे आए, तेबे एलीशे यहोवे ते प्रार्थना कित्ती कि एस दलो खे अन्दा करी दे। एलीशा रे एस वचनो रे मुताबिक परमेशरे सेयो अन्दे करीते। 19 तेबे एलीशे तिना रे नेड़े जाई की बोलेया, "ये से बाट नि ए ओर ना ये से शईर ए, जेती तुसा जाणा ए, मां पीछे आई जाओ, मां तुसे तेस माणूंए गे, जेसखे तुसे टोल़ने लगी रे, पऊँचाणे।" तेबे तिने सेयो सामरिया दे पऊँचाई ते। 20 जेबे सेयो सामरिया शईरो दे आईगे, तेबे एलीशे फेर यहोवे ते प्रार्थना कित्ती, "ओ यहोवा, इना सिपाईया रिया आखी खोल ताकि यो देखी सको।" तेबे यहोवे तिना रिया आखी खोली तिया ओर जेबे सेयो देखणे लगे तेबे क्या देखेया कि आसे इस्राएलो री राजधानी सामरिया शईरो बीचे ए। 21 तिना खे देखी की इस्राएलो रे राजे एलीशा खे बोलेया, "ओ मेरे मालक, क्या आऊँ इना खे काई देऊँ?" 22 तिने ज्वाब दित्तेया, "इना खे नि काआ। क्या तूँ इना खे काया करेया, जिना खे तूँ तलवार ओर धनुषो साथे बन्दी बणाई लया? तूँ इना खे रोटी-पाणी दे, ताकि यो खाई-पी की आपणे स्वामिए गे वापस ऊई जाओ।" 23 तेबे राजे अरामी सिपाईया खे बड़िया खाणा बणवाया ओर जेबे सेयो खाई-पी चुके, तेबे तिने सेयो पेजी ते ओर सेयो आपणे स्वामिए गे चली गे। इजी ते बाद अरामो री सेना इस्राएलो दे फेर नि आई।

24 पर कुछ बखतो रे बाद अरामो रे राजे बेन्हददे आपणी सारी सेना कट्ठी कित्ती ओर सामरिया शईर चऊँ कनारा ते केरी ता। 25 शइरो खे चऊँ कनारा ते केरने रिया बजा ते सामरिया शईरो दे पारी अकाल़ पड़ीगा ओर से एड़ा किरेया रा रया कि अन्तो रे एक गह्दे रा सिर चाँदिए रे अस्सी सिक्केया दे ओर प्याले री चौथाई पर कबूतरो री बीट पाँज सिक्के चाँदिए दे बिकणे लगी। 26 एक दिन इस्राएलो रा राजा दवाला पाँदे कूमणे लगी रा था कि एकी जवाणसे तेसखे आका पाई की बोलेया, "ओ प्रभु, ओ राजा, बचा।" 27 फेर राजे बोलेया, "जे यहोवा ताखे नि बचाओ, तो आऊँ ताखे केथा ते बचाऊँ? क्या खल्याणो ते, या अंगूरा रे रसकुण्डो बीचा ते?" मांगे खाणे खे कुछ नि आ। 28 तेबे राजे तेसा ते पूछेया, "ताखे क्या ऊई रा?" तेसे ज्वाब दित्तेया, "एसे जवाणसे माखे बोलेया था कि माखे आपणा पाऊ दे कि आसे आज एसखे खाऊँ, तेबे काल मां आपणा पाऊ देणा ओर आसा से बी खाणा।" 29 तेबे मेरा पाऊ पकाई की आसे खाई ला, तेबे जेबे दूजे दिने मैं एसा खे बोलेया "कि आपणा पाऊ दे कि आसे तेसखे खाऊँ, तेबे एसे आपणा पाऊ लकोईता।" 30 तेसा जवाणसा री ये गल्ल सुणी की राजे आपणे टाल्ले फाड़े, से तो दवाला पाँदे कूमणे लगी रा था, जेबे लोके देखेया, तेबे तिना खे एड़ा दिशेया कि तिने पीतरे आपणे शरीरो दे टाट पईनी राखी। 31 तेबे तिने बोलेया, "जे आऊँ आज शापातो रे पाऊ एलीशा रा सिर तेसरे धड़ो पाँदे रणे देऊँ, तो परमेशर मां साथे एड़ा ई बल्कि इजी ते बी जादा करो।" 32 एलीशा आपणे कअरे बैठी रा था ओर बुजुर्ग बी तेस साथे बैठी रे थे। तो जेबे राजे आपू गे ते एक दूत पेजेया, तेबे तेस दूतो रे पऊँछणे ते पईले तिने बुजुर्गा खे बोलेया, "देखो, एस खूनिए रे पाऊए कोई मेरा सिर बाडणे खे पेजी राखेया, इजी री खातर जेबे से दूत आओ, तेबे दरवाजा बन्द करी की रोकी की राखणा। क्या तेसरे स्वामिए रे पैरा री आवाज तेस पीछे नि सुणदी?" 33 से तिना साथे इना गल्ला करने ई लगी रा था कि राजा ओर दूत तेसगे पऊँची गे ओर राजा बोलणे लगेया, "ये मुसीबत यहोवे रिया तरफा ते ए, एबे आऊँ आगो खे यहोवे री बाट कऊँ न्याल़दा रऊँ कि से म्हारी मताद करो?"