Isaías 31

ጾሳይ የሩሳላመ ናጋና

1 ማዱዋ ኮያናዉ ዱገ ግብጼ ዎያዋንቶነ ፓራን አማነትያዋንቶ አየ አና! ጮራ ግድያ ድራዉ ፓራ ጋረቱዋን፥ ዳሮፐ ምኖ ግድያ ድራዉ ፓራ አሳቱዋን አማነትያዋንቶ አየ አና! ኡንቱንቱ እስራኤልያ ጌሻኮ ጼልክኖ፤ ዎይ መና ጎዳፐ ማዱዋ ኮይክኖ። 2 ሽን እካ ባሻ አሀናዉ ዳንዳይያ አዳ ኤራንቻ፤ ባረ ጌዳዋካ አገና፤ ኢታቱዋ ጎልያ አሳ ቦላነ ኢታባ ኦያዋንታ ማድያዋንቱ ቦላ ደንዳና። 3 ግብጼ ጋድያ አሳቱ አሳፐ አትና፥ ጾሳ ግድክኖ። ኡንቱንቱ ፓራቱካ አሾፐ አትና፥ አያና ግድክኖ። መና ጎዳይ ሀንቁዋን ባረ ኩሽያ ምጭያ ዎደ፥ ማድያዌ በታና፤ ማደትያዌካ ኩንዳና፤ ኡንቱንቱ ኡባይካ እትፐ ያና።

4 ጾሳይ ታና ሀዋዳን ያጌ፤ "ጋሙ ዎይ ዎዳላ ጋሙ መህያ ኦይቂደ ጉድያ ዎደ፥ ዳሮ ሄንንቻቱ አ ቦላ ጼሰት ሺቆፐካ፥ እ ኡንቱንቱ ዋሶ ዳጋመና። ኡንቱንቱ ዋሶካ ያየና። ሄዋዳንካ፥ ኡባፐ ዎልቃማ መና ጎዳይ ጽዮነ ደርያንነ አ ቃን ኦላ ጋከታናዉ ዱገ ዎና። 5 ካፉ ቦላና አዋልያዋዳን፥ ኡባፐ ዎልቃማ መና ጎዳይ የሩሳላመ ጎንዳላናነ አሽ አካና፤ እ አ ቦላና አደ፥ አ ዎ አካና" ያጌ።

6 ህንተኖ እስራኤልያ አሳቶ፥ ህንተ ሎይ ማካሌዳዋኮ ስምተ። 7 አያዉ ጎፐ፥ አሳ ኡባይ ባረንቱ ናጋራንቻ ኩሽያን ብራፐነ ዎርቃፐ መዳ ኤቃቱዋ ሄ ጋላስ ኦላና።

8,9 ታማይ ጽዮነን፥ ጮጪ የሩሳላመን ደእያ ጾሳይ ሀዋዳን ያጌ፤ "አሶረ አሳዋ ግደና ማሻን ኩንዳና፤ አሳዋ ግደና ማሻይ ኡንቱንታ ማና። ኡንቱንቱ ማሻ ስንፐ ባቃታና፤ ኡንቱንቱ ዎዳላ አሳቱ ዴጾ ኦሶ አዛዘታና። ዳጋማ ጋሱዋን፥ ኡንቱንቱ ምኖ ጌሱ ላለታና፤ ኡንቱንቱ ኦላ ጋዳዋቱካ ዳጋማዉ ኦላ ባንድራ አግ ባሺደ ባና" ያጌ መና ጎዳይ።