Mazimuriyaa 109

Morkkiyaa Bolla Shiik’o Woosaa

Zammaaretuwaa Kaappoo Yes’etteedda, Daawite s’aafeedda mazamuriyaa

1 Abeet taani galatiyaa S’oossaw,

neeni taw c’o"u gooppa.

2 Ayaw gooppe, iita worddanchcha asatuu,

barenttu doonaa ta bolla dooyeeddino;

unttunttu worddo ins’s’arssan ta bolla haasayiino.

3 Unttunttu is’o k’aalaanna taana dooddiino;

gaasuu bayinnan taananna oletiino.

4 Taani unttuntta siik’aynne unttunttoo woossay;

gidooppekka, unttunttu taana mootiino.

5 Taani lo"uwaa ootsina,

unttunttu taw iitaa zaariino;

taani unttuntta siik’ina, unttunttu taana is’s’iino.

6 Ta morkkiyaa bolla iita daannaa suntsaa;

mootanchchay Aa ushechchan ek’k’o.

7 Aa biddiyaa wode, I bayzzanchcha gidiide beetto;

Aa woosaykka aw simmiide gometo!

8 Aa laytsay k’aammo;✝109:8 Kit. 1:20

Aa suntsatetsaakka haray akko!

9 Aa naanatuu aawuwaa d’ayiide yii"ino;

Aa machata am"e gidu!

10 Aa naanatuu yuuyyi yuuyyiide woossino;

barenttu de’iyaa onaappekka yederssettino!

11 Aa mas’uwaa ubbaa ac’oo oyk’k’o;

I daaburiide kesseeddabaa ubbaa allagay bonk’k’o!

12 Ooninne aw keekkabaa ootsoppo,

woy aawuwaa d’ayeedda Aa naanaatoo k’arettoppo!

13 Aa naanatuu ubbay wuri d’ayino;

kaalliyaa yeletaan Aa suntsay dogetto.

14 Aa aawotuwaa nagaray Med’inaa Godaa sintsan k’ofetto;

Aa aatti nagaray ubbakka k’uc’ettoppo!

15 He nagaray ubbaa gede Med’inaa Godaa sintsan beetto;

unttuntta hassayissiyaawe sa’aappe d’ok’olletti kichcho!

16 Ayaw gooppe, I

keekkabaa ootsanaw ubbakka k’oppibeenna;

hiyyeesatuwaa, metootanchchatuwaanne

wozanay madus’s’eeddawantta yederssiide wod’eedda.

17 I shek’k’anaw doseedda diraw,

ikka shek’k’etteeddawaa gido!

I anjjanaw dosenna diraw,

anjjuu aappe haakko!

18 I shek’k’iide salenna;

Aa shek’ay haatsaadan Aa bollaa katso!

Zayitiyaadan Aa mek’etsan gelo!

19 Afilaadan Aa kammo;

sak’k’iyaadan ubbaa gede Aa s’eessan de’o!

20 Hawe taana mootiyaawanttoonne

taana iitan zigiriyaawanttoo,

Med’inaa Goday immiyaa woytuwaa gido!

21 Shin abeet Ubbaa Mooddiyaa Med’inaa Godaw,

ne suntsaa diraw, taana maadda.

Aggena ne siik’uwaanne

ne keekkatetsaa diraw, taana ashsha.

22 Ayaw gooppe, taani

hiyyeessanne metootanchchaa asaa;

ta wozanaykka maduns’s’eedda.

23 Taani omarssa kuwaadan d’ayana hanay;

taani booliyaadan k’ok’k’ofettay.

24 S’oomishin ta gulbbatay is’s’eedda;

ta bollaykka laafee.

25 Taana mootiyaawanttoo k’iliic’iyaawaa gidaaddi;✝109:25 Mat. 27:39; Mar. 15:29

unttunttu taana be’iide, barenttu huup’iyaa k’aatsiino.

26 Abeet Med’inaa Godaw ta S’oossaw, taana maadda;

aggena ne siik’uwaadan taana ashsha.

27 Abeet Med’inaa Godaw, hewe

ne kushiyaa gideeddawaanne

hewaa neeni ootseeddawaa ta morkketuu erino.

28 Unttunttu taana shek’k’ooppenne,

neeni taana anjja!

Ta bolla denddiyaawanttu yeellatino;

shin taana ne k’oomaa nashshechchaa.

29 Taana mootiyaawanttu kawushshaa mayno;

barenttu yeellaakka kutaadan k’umayino.

30 Taani ta ins’s’arssan Med’inaa Godaa daroppe galatana;

daro Asay shiik’eeddasaan Aa galatana.

31 Ayaw gooppe, I hiyyeesaa diraw mootettee;

hayk’k’oo pirddiyaa asaappekka Aa ashshee.