Mazimuriyaa 45

Siik’uwaa Timirttiyaa

K’oore Naanatuu Zammaaretuwaa Kaappoo C’iishshaa Waatsa Giyaa Waatsan Yes’s’eedda Yetsaa. Akeekan S’aafetteedda Siik’uwaa Yetsaa.

1 Taani ta yetsaa kaatiyaa sisana,

ta wozanay lo"o k’ofaa pulttee;

ta ins’s’arssay lo"o s’aafiyaa asaa bi’iriyaa mala.

2 Asaa ubbaappe neeni malanchchanne;

ne haasayay nashetsiyaawaa gidana mala,

S’oossay neena med’inaw anjjeedda.

3 Wolk’k’aama kaatiyaw,

ne mashshaa ne s’eessan danc’c’a;

bonchchuunne gitatetsay newaa.

4 Ne tumatetsaa, ashkketetsaanne s’illotetsaa diraw,

ne anggaa mayyaade, s’oonanaw piriis’a.

Ne ushechcha kushii malalissiyaabaa besso.

5 Ne pootsay k’ara;

unttunttu kaatiyaa morkkatuwaa wozana ayifiyaa c’addino.

Kawutetsatuu ne gediyaan kunddino.

6 Abeet S’oossaw,

ne kawutetsaa araatay med’i med’inaw de’ee;✝45:6-7 Ibr. 1:8-9

ne kawutetsaa s’am"aykka suuretetsaa s’am"aa.

7 Neeni s’illotetsaa siik’aasa;

geelatetsaa is’s’aa.

S’oossay, ne S’oossay, neena

ne laggetuwaappe aatsiide,

nashshechchaa zayitiyaa okkeeddawe hewaassa.

8 Kawaraan, godare uutsaaninne birggudiyaan,

ne mayuu ubbay pushakketteedda.

Danggarssaa zaaliyaan alleek’k’etteedda,

ne kawutetsaa golliyaan diis’s’iyaawanttu neena nashechchiino.

9 Kaatiyaa golliyaan de’iyaa mac’c’a asatuwaa giddon,

kaatetuwaa mac’c’a naanatuu de’iino;

kaatata geeshsha work’k’aan alleek’k’ettaade,

neeppe ushechcha baggan ek’k’aaddu.

10 Ta naattee, sisa; hayzza;

ne haytsaa haa yegga.

Ne zariyaanne ne aawuwaa golliyaa doga.

11 Ne pulaa kaatii amottee;

I new goda gidiyaa diraw, aw azazetta.

12 S’iroosa Asay iziw imotaa akkiide yaana;

duretuu neena awuddashana.

13 Kaatiyaa naatta kaatiyaa golliyaa giddon waata lo"ay!

Izi bullachchaa mayuukka work’k’aa k’ac’inan dadetteedda.

14 Bare alleek’k’o mayuwaa mayyaade, kaatiyaakko moyzzetaw;

Izi lagge naanatuu wodorotuu,

izo kaalliide, Aa sintsa aheeddino.

15 Unttunttu nashettiiddenne hombboc’iidde yiide,

kaatiyaa golliyaa geliino.

16 Kaatiyaw, ne aawotuwaa kotaa ne naanatuu akkana.

Neeni unttuntta biittaa ubbaa bollan suntsana.

17 Taani ne suntsay yeletaa ubbaan hassayettanaadan ootsana.

Hewaa diraw, Asay med’i med’inaw neena galatana.