1 S'oossay nuuni naagetti attiyaa saanne nuw wolk'k'aa.

Nuuna metuu gakkiyaa wode,

maaddanaw I ubbaa gede matan de'ee.

2 Hewaa diraw, biittay k'aas's'inttokka,

woy deretuu abban kunddinttokka,

Nuuni yayyokko.

3 Abbaa beetay guummiide, hoommuwaa mayninttokka,

Aa wolk'k'aama hobbiyan deretuu yiik'k'iyiik'k'inttokka,

nuuni yayyokko.

4 Itti shaafay de'ee.

He shaafay goggiide, S'oossaa katamaa,

Ubbaappe D'ok'k'iyaa S'oossay de'iyaa geeshsha sa'aa nashechchee.

5 S'oossay Aa giddon de'iyaa diraw,

he katamay k'aas's'enna.

Wontta guuran S'oossay Aa maaddana.

6 Gadiyaa Asay shabbarettee;

kawutetsatuu k'aas's'iino.

S'oossay bare k'aalaa sisseedda wode, sa'ay seeree.

7 Med'etetsaa Ubbaa Goday nuunanna de'ee;

Yaak'ooba s'oossay nuuni k'osetti attiyaa sa'aa.

8 Haa yiite; Med'inaa Goday oosuwaa s'eellite;

I sa'aan aheedda bashshaa be'ite.

9 I sa'aa gas'aa gakkanaw de'iyaa olaa te"ee;

wonddaafiyaa mentsee;

tooraa mentsee;

gonddalliyaakka taman s'uuggee.

10 Woppu giite; taani S'oossaa gidiyaawaa erite.

Taani kawutetsatuwaa giddon d'ok'k'ay.

K'ay biittaa bollankka d'ok'k'ay.

11 Ubbaappe Wolk'k'aama Med'inaa Goday nuunanna de'ee;

Yaak'ooba S'oossay nuuni k'osetti attiyaa sa'aa.