Mazimuriyaa 2

S’oossaan Dooreteedda Kaatiyaa

1 Amanenawanttu ayaw denddiinoo?✝2:1-2 Kit. 4:25-26

K’ay kawutetsatuu ayaw patsennabaa mak’ettiinoo?

2 Sa’aa kaatetuu denddeeddino;

asaa mooddiyaawanttu ittippe shiik’eeddino.

Unttunttu Med’inaa Godaa bollanne

I okkeeddawaa bolla ittippe shiik’eeddino.

3 Unttunttu, «Nuuni unttunttu sanssalataa duutsoytte;

unttunttu nuuna k’achchiyaawaakka wora oloytte» yaagiino.

4 Saluwaan bare araatan utteeddawe

unttunttu bolla miic’c’ee;

Goday unttunttu bolla k’iliic’ee.

5 I bare hank’k’uwaan unttuntta seeree;

bare wolk’k’aama hank’k’uwaan unttuntta yashissee.

6 Goday, «Taan ta geeshsha deriyaa S’iyoone bolla

ta kaatiyaa kawutsaad» yaagee.

7 He kaatii, «Taan Med’inaa Godaa higgiyaa awaayana;✝2:7 Kit. 13:37; Ibr. 1:5; 5:5

I taana, ‹Neeni ta na’aa;

taani hachchi new aawuwaa gidaaddi.

8 Neeni taana oochcha;

Taani kawutetsaa ubbaa new immana;

sa’aa ubbay nebaa gidanawaa.

9 Neeni birataa s’am"an unttuntta mentsereetsana;✝2:9 Sas'. 2:26-27; 12:5; 19:15

Unttuntta neeni urk’k’aa miishshaa mentsiyaawaadan liik’issana› yaagee» yaageedda.

10 Hewaa diraw, hinttenoo kaatetoo, eeyattoppite;

ha sa’aa mooddiyaawanttoo, hinttena naagite!

11 Med’inaa Godaw yashshatetsan ootsite;

kokkorssaan azazettite.

12 S’oossay hank’k’ettina, ogiyaan hintte d’ayennaadan suure wozanaan aw goynnite;

ayaw gooppe, Aa hank’k’uu ellekka ees’s’i kesana.

Bak’ati an k’osetti attiyaa ubbatuu anjjetteedawantta.✝2:12 2 Sam. 15:13—17:22