1 Med'inaa Goday kawuteedda.

Sa'aan de'iyaa Asay nashetto;

haakko haatsaan dooddetto saan de'iyaa asatuukka nashetino.

2 Shaariinne d'ip'p'i go d'umay Aa dooddeedda.

S'illotetsaynne tumatetsay Aa kawutetsaa araataw baaso.

3 Tamay aappe sintsanna bee;

Aa dooddeedda morkkatuwaa s'uuggee.

4 Aa walk'k'antsay sa'aa poo'issee;

biittay hewaa be'iide kokkoree.

5 Med'inaa Godaa sintsan, sa'aa ubbaa Godaa sintsan

wogga deretuu eessaa muk'aaddaadan muushiino.

6 Salotuu Aa s'illotetsaa awaayiino;

asay ubbay Aa bonchchuwaa be'ee.

7 Worddo s'oossatoo goyinniyaawanttunne

he go"enna eek'atuwaan c'eek'ettiyaawanttu ubbay yeellatino.

S'oossatuu ubbay S'oossaw gulbbatino.

8 Abeet Med'inaa Godaw, S'iyoone asay,

ne s'illo pirddaa sisiide nashettee;

Yihudaa katamatuwaa asaykka hashshu gee.

9 Abeet Med'inaa Godaw, neeni sa'aa ubbaappe d'ok'k'aasa;

s'oossatuwaa ubbaappe neeni d'ok'k'u gaasa.

10 Med'inaa Godaa siik'iyaawanttu iitaa is's'ite.

I barew amanetiyaa asatuwaa shemppuwaa naagee;

k'ay unttuntta iitatuwaa kushiyaappe ashshee.

11 S'illotoo poo'uu poo'ee;

wozanaa suuretoo nashechchay de'ee.

12 Hinttenoo s'illotoo, Med'inaa Godaan nashettite;

Aa geeshsha suntsaa galatite.