Mazimuriyaa 43

1 Abeet S’oossaw, taana shatintsaa.

S’oossaa erenna asatuwaana ta mootuwaa neeni mootetta.

C’immiyaa iita asatuwaappe taana neeni ashsha.

2 S’oossaw, taani naagetta attiyaa miis’ay neena.

Neeni taana ayaw aggay? Taani ayaw ta morkkiyaan,

naak’ettaade kayyotaadde hamettoo?

3 Ne poo’uwaanne ne tumuwaa taw kiitta;

unttunttu taana kaaletsino.

Ne geeshsha deriyaa neeni de’iyaasaa afino.

4 He wode taani ta S’oossaa yarshshuwaa sa’aa,

taana nashechchiyaa S’oossaakko baana.

Abeet S’oossaw, ta S’oossaw,

taani diitsaa diis’s’aade, neena sabbana.

5 Ta shemppattee, taani ayaw kayyottaytaa?

K’ay ayaw jabbakattayttaa?

Taani S’oossan hidootaa wotsana.

Ayaw gooppe, taani biro

taana ashshiyaawaanne ta S’oossaa galatana.