Mazimuriyaa 150

S’oossaa Galatite

1 Med’inaa Godaa galatite!

Aa geeshsha sa’aan S’oossaa galatite;

Aa wolk’k’aama saluwaan Aa galatite.

2 Aa wolk’k’aama oosatuwaa diraw, Aa galatite;

ubbaappe aad’d’iyaa Aa gitatetsaadan Aa galatite.

3 Malakataa punniidde, Aa galatite;

Diitsaanne maasink’k’uwaa diis’s’iidde,

Aa galatite.

4 Darbbiyaa bak’k’iiddenne duriide,

Aa galatite;

Diitsaa diis’s’iiddinne lookkuwaa punniidde, Aa galatite.

5 Dawalaa k’aatsiidde, Aa galatite;

dawalaa shoc’iide, Aa galatite.

6 Pas’a shemppatuu ubbatuu,

Med’inaa Godaa galatino!

Med’inaa Godaa galatite!