1 Abeet Med'inaa Godaw, ta woosaa sisa; ta watiwatuwaa hayzza.

Neeni s'illuwaanne ammanettiyaawaa gidiyaa diraw,

taw zaaruwaa imma.

2 Ne sintsan s'illo gidana Asay baawa;✝

hewaa diraw, taana ne k'oomaa pirddaw shiishshoppa.

3 Taana ta morkkii yederssiide,

biittaana gatsi kinchchereetseedda;

beni hayk'k'eedda asatuwaadan taana d'uman wotseedda.

4 Hewaa diraw, taani hidootaa k'ans's'aad;

ta wozanaykka yibbaateedda.

5 Taani beni wodetuwaa hassayay;

neeni ootseedda oosuwaa ubbaa zaara zaaraadde k'oppaynne

ne kushii ootseeddawaa akeekay.

6 Taani ta kushiyaa neekko mic'c'aad;

mela biittay haatsaa koyiyaawaadan,

ta shemppuu neena saamettee.

7 Abeet Med'inaa Godaw, taw zaaruwaa immanaw elleella!

Taani hidootaa k'ans's'aad.

Taani duge duufuwaan geliyaa asatuwaa mala gidennaadan,

ne som"uwaa taappe gentsoppa.

8 Taani neena ammanettiyaa diraw,

wontta wontta aggena ne siik'uwaa taana bessa.

Taani ta shemppuwaappe neena woossiyaa diraw,

taani baanaw bessiyaa ogiyaa taana tamaarissa.

9 Abeet Med'inaa Godaw, taani neekko bak'ateedda diraw,

taana ta morkkatuwaappe ashsha.

10 Neeni ta S'oossaa gidiyaa diraw,

taani ne sheniyaa ootsana mala, taana tamaarissa;

lo"o Ayyaanan taana suure ogiyaa kaaletsa.

11 Abeet Med'inaa Godaw, ne suntsaa diraw, taana ashsha;

ne s'illotetsan taana metuwaappe kessa.

12 Aggena ne siik'uwaan ta morkkatuwaa wod'a;

ta baaligaaratuwaa ubbaa d'ayissa;

ayaw gooppe, taani ne k'oomaa.