1 Med'inaa Godaa galatite!

Hinttenoo Med'inaa Godaa k'oomatoo,

Med'inaa Godaa suntsaa galatite!

2 Hinttenoo Med'inaa Godaa golliyaa giddon,

nu S'oossaa golliyaa dabaaban ek'k'eeddawanttoo,

S'oossaa galatite!

3 Med'inaa Goday keeka gidiyaa diraw,

Med'inaa Godaa galatite!

I lo"a gidiyaa diraw,

Aa suntsaa sabbite!

4 Med'inaa Goday Yaak'ooba bare huup'ew,

Israa'eeliyaa asaakka barew buzo ootsiide dooreedda.

5 Med'inaa Goday wolk'k'aama gidiyaawaanne

nu Goday s'oossatuwaa ubbaappe d'ok'k'iyaawaa,

taani eray.

6 Saluwankka saankka,

abbatuwaaninne unttunttu c'iimmotuwaa ubbaa giddonkka,

Med'inaa Goday bare doseeddawaa ubbaa ootsee.

7 Iraa tooko shaariyaa sa'aa gas'aappe I dentsee;

I iraanna walk'k'antsaa kiittee;

bare minjjiyaa sa'aappe c'arkkuwaa kessee.

8 Gibs'e biittan asaa naanatuwaappenne,

mehiyaa maraappe,

bayira yeletteeddawantta wod'eedda.

9 Neenoo Gibs'ee, Par"oonanne Aa k'oomatuwaa muranaw,

hinttenttu gidon ooratsabaanne malalissiyaabaa yeddeedda.

10 I daro kawutetsatuwaa bayzzeedda;

wolk'k'aama kaatetuwaakka wod'eedda.

11 Amooretuwaa kaatiyaa Sihoona,

Baasaane kaatiyaa Ooganne,

Kanaane kaatetuwaa ubbaa wod'eedda.

12 Unttunttu biittaa bare asatuwaa,

Israa'eelatuwaa laatisseedda.

13 Abeet Med'inaa Godaw, ne suntsay med'inaw de'ana;

yeletaappe yeletaa gakkanaw Med'inaa Goday hassayettana.

14 Med'inaa Goday bare asaw pirddana;

I bare k'oomatoo k'arettana.

15 Gadiyaa asatuwaa eek'atuu asaa kushii

biraappenne work'k'aappe med'd'eeddawantta.✝

16 Unttunttoo doonay de'ee, shin haasayikkino;

ayifii de'ee, shin s'eellikkino.

17 Haytsay de'ee, shin sissikkino;

unttunttu doonaan shemppuu baawa.

18 Unttuntta med'd'eeddawanttunne,

unttunttun ammanettiyaawanttu,

ubbay unttunttudan hanino.

19 Israa'eeliyaa golliyaa asatoo,

Med'inaa Godaa galatite;

Aaroona golliyaa asatoo,

Med'inaa Godaa galatite;

20 Leewiyaa golliyaa asatoo,

Med'inaa Godaa galatite;

Med'inaa Godaw yayyiyaawanttoo,

ubbay Med'inaa Godaa galatite.

21 Yerusaalamen de'iyaa Med'inaa Goday

S'iyoonen galatetto!

Med'inaa Godaa galatite!