Salmos 19

S’oossay S’illotetsaa Awaa

1 Salotuu S’oossaa bonchchuwaa haasayiinonne

salotuwaa gufantsuu I bare kushiyan ootseeddawaa awaayee.

2 Itti gallassay yenkko gallassaw hewaa odee;

itti k’ammaykka yenkko k’ammaw eratetsaa k’onc’c’issee.

3 Haasayi woy k’aalay baawa;

unttunttu kooshshaykka sisettenna.

4 Gidooppekka, unttunttu haasayaa kooshshay sa’aa ubbaan laaletteedda;✝19:4 Rom. 10:18

unttunttu k’aalaykka sa’aa gas’aa gakkeedda.

S’oossay away de’iyaa sa’aa saluwaan giigisseedda.

5 Nashettiide kare sooppe kesiyaa mishiraadan,

Wotsaa naasiyaw giigeedda wotsanchchaadan,

away wontta wontta kesee.

6 Away itti bagga saluwaa gas’aappe mokkiide,

hara bagga saluwaa gas’aa gakkanaassi bee;

Aa ho"uwaappe geemmiyaawe ayaynne baawa.

7 Med’inaa Godaa higgii suure;

shemppuwaa zaaree.

Med’inaa Goday odiyaawe ammanettiyaawaa;

akeekay pac’c’eeddawanttoo eratetsaa immee.

8 Med’inaa Godaa wogay likke;

wozanaa nashechchee.

Med’inaa Godaa azazuu geeshsha;

wozanaa poo’issee.