Zammaaretuwaa Kaappoo Yes’etteedda, Daawita Mazimuriyaa

1 Hiyyeesaw k’oppiyaa Asay anjjetteedawaa;

metuwaa gallassi Med’inaa Goday Aa ashshee.

2 Med’inaa Goday Aa naagiide, pas’a wotsee.

Inne biittaa bollan anjjetteedawaa gidee;

S’oossay Aa Aa morkkatuwaa amoo aatsiide immenna.

3 Med’inaa Goday Aa harggiyaa hiitsan de’ishiinakka maaddee;

I sakkettinakka, Aa patsee.

4 Taana gidooppe, taani, «Abeet Med’inaa Godaw,

taani neena naak’k’eedda diraw, taana maara;

Harggiyaappekka taana patsa» yaagaad.

5 Ta morkketuu iitaban taana haasayiidde,

«I awude hayk’k’anddeeshsha?

K’ay Aa suntsaykka awude d’ayanddeeshsha?» yaagiino.

6 Taana be’anaw yiyaa ooninne taw worddobaa odee;

bare wozanaan taana zigiriyaawaa biddee.

Hewaappe guyyiyaan, kare kesiide,

yaanne haanne oduwaa laalee.

7 Taana is’s’iyaa ubbatuu

ittippe ta bollan saasukkiino;

«Iitabay Aa bolla gakkee» giide k’oppiino.

8 Unttunttu «Aa iita harggii oyk’k’eedda;

I he giseeddasaappe ubbakka denddenna» yaagiino.

9 Haray attina, taani ammanettiyaa ta siik’o laggii,✝41:9 Mat. 26:23; Mar. 14:18; Luk'. 22:21; Yoh. 13:18

taani barsseeddawe ta kushiyaa sa"eedda.

10 Shin abeet Med’inaa Godaw, neeni taana maara;

taani unttunttu kushiyaa kesanaadan,

taana harggiyaa hiitsaappe dentsa.

11 Neeni taanan nashettanawaa taani eray;

Ayaw gooppe, ta morkkii taana,

s’ooniide gayrena.

12 Neeni taana ta suuretetsaa diraw zemppisaadda;

ne sintsan taana med’inaw wotsaadda.

13 Med’inaa Goday, Israa’eeliyaa S’oossay,

med’inaappe med’inaa gakkanaw galatetto.✝41:13 Maz. 106:48

Amen"i. Amen"i.