1 Abeet ta S’oossaw, ta morkkatuwaappe taana ashsha;

ta bolla denddiyaawanttuppe taana naaga.

2 Iita ootsiyaawanttuppe taana ashsha akka;

suutsaa gussiyaa asatuwaappe taana ashsha.

3 Abeet S’oossaw, unttunttu taana wod’anaw

kuukuliide naagiyaawaa be’a!

He wolk’k’aama iita asatuu ta bolla yaa’iino.

Abeet Med’inaa Godaw, ta bayzzuwaa diraw

woy ta nagaraa diraw gidenna.

4 Unttunttu taana olanaw wotsaa jaamiyaawe,

ta balaa diraassa gidenna.

Beegotta, taakko haa yaade be’a.

5 Abeet Ubbaappe Wolk’k’aama Med’etaa Ubbaa Godaa S’oossaw,

Israa’eeliyaa S’oossaw,

kawutetsatuwaa ubbaa pirddanaw beegotta;

makkalaa ootsiyaawantta maaroppa.

6 Unttunttu omarssan simmiino;

kanatuwaadan boc’c’iidde, katamaa giddon yuuyyiino.

7 Hekko, unttunttu barenttu doonaan haasayiide salikkino;

unttunttu ins’s’arssay mashshaa mala.

Unttunttu biro, «Ooninne sisenna» giide k’oppiino.

8 Shin abeet Med’inaa Godaw,

neeni unttunttu bolla miic’c’aasa;

kawutetsatuwaa ubbaa bolla k’iliic’aasa.

9 S’oossaw, neeni taw k’osetta attiyaa sa’aa gidiyaa diraw,

taani ne wolk’k’an ammanettay.

10 Ta S’oossay aggena bare siik’uwaan taakko yaana;

ta S’oossay ta morkkatuwaa s’ooniyaawaa I taana bessana.

11 Ta asatuu doggenna mala, neeni unttuntta wod’oppa.

Abeet S’oossaw, nu gonddalliyaw,

ne wolk’k’an unttuntta laalaade s’oona.

12 Unttunttu barenttu doonaa nagaraa dirawunne

barenttu ins’s’arssaa k’aalaa diraw,

barenttu otoruwaan oyk’k’ettino.

Unttunttu shek’aa dirawunne unttunttu haasayiyaa wordduwaa diraw,

13 ne hank’k’uwaan unttuntta d’ayissa.

S’oossay Yaak’ooba zaratuwaa mooddiyaawaanne

sa’aa gas’aa gakkanaw de’iyaa biittaa mooddiyaawaa Asay erana mala,

unttuntta mule attenaadan d’ayissa.

14 Ta morkketuu omarssan simmiino;

kanatuwaadan boc’c’iidde,

katamaa giddon yuuyyiino.

15 Unttunttu miyaawaa demanaw toyilakattiino;

kallana d’ayooppe laawiino.

16 Shin taani ne wolk’k’aa sabbana;

wontta aggena ne siik’uwaabaa yes’s’ana.

Ayaw gooppe, neeni taw ta waayiyaa gallassi,

taani bak’ata attiyaa saanne k’osetta attiyaasaa gidaadda.

17 Abeet taw wolk’k’aa gideedda S’oossaw,

taani neena sabbana.

Ayaw gooppe, taani k’osetta attiyaa sa’aynne

aggena siik’uwaa taana bessiyaa S’oossay neena.✝59:17 2 Sam. 8:13; 1 Od. 18:12