1 S’oossay denddo; Aa morkketuu laalettino.

Aa is’s’iyaawanttu Aa sintsaappe bak’attino.

2 C’uway c’arkkuwaan punettiyaawaadan,

neeni unttuntta punna d’ayssa.

Muk’aadday taman muushiyaawaadan,

iitatuu S’oossaa sintsappe d’ayino.

3 Shin s’illotuu hashshu giino;

S’oossaa sintsan nashetino;

nashshechchan ililino.

4 S’oossaw yes’s’ite; Aa suntsaa sabbite.

Shaariyaa bollan gaalifiyaawaa d’ok’k’u d’ok’k’u ootsite kessite;

Aa suntsay Med’inaa Godaa;

Aa sintsan nashettite.

5 S’oossay bare de’iyaa geeshsha sa’aan,

aawuu bayinna naanaatoo aawuwaa;

k’ay asinay hayk’k’eedda mac’c’a asatoo daana.

6 S’oossay barekka de’iyaawanttoo golle asaa immee.

K’asho golliyaan de’iyaawantta biliide,

unttuntta ishaluwaan wotsee.

Shin makkalanchchatuu meleedda biittan de’iino.

7 Abeet S’oossaw, neeni ne asaa kaaletseedda wode,

neeni unttunttunna mela bazzuwaa beedda wode,

8 Siina Deriyan k’onc’c’eedda S’oossaa sintsan,

Israa’eeliyaa S’oossaa sintsan biittay k’aas’s’eedda;

salotuu iraa duge tigeeddino.✝

9 Abeet S’oossaw, neeni iraa darissaade bukissaadda;

mela biittaa zaaraadde ooratsaadda.

10 Ne asaykka yaan utteedda.

Abeet S’oossaw, ne keekkatetsan,

hiyyeesatoo koshshiyaabaa giigissaade immaadda.

11 Goday kiitaa kiitteedda;

he kiitaa afeeda mac’c’a asatuu dara.

12 Unttunttu, «Morkke kaatetuunne

unttunttu tooranchchatuu guyye bak’ateeddino;

son atteeda mac’c’a asatuu omooduwaa shaakketteeddino.

13 Unttunttu, P’ooliyaa work’k’aa k’efiyaana de’iyaa,

biraappe med’etteedda harap’p’iyaa misiliyaa,

omooduwaa demmoode, hinttenttu,

dorssaa sikuwaa giddon ayaw giseedditee?» yaageeddino.

14 Ubbaa Danddayiyaa S’oossay,

kaatetuwaa laaleedda wode,

S’almmoona asaa bolla shachchaa bukisseedda.

15 Baasaane deretuu wogga wolk’k’aama deretuwaa;

baasaane deretuu daro s’eeratuu de’iyaawantta.

16 Daro s’eeratuu de’iyaa deretoo,

S’oossay baressa ootsanaw dooreedda asaa,

hintte ayaw k’anaatiide s’eelliitee?

Med’inaa Goday aan med’inaw de’anawaa.

17 S’oossaa olaa paraa gaaretuu

tammu sha"aaninne sha"u gede sha"an paydetiyaawantta;

Goday Siinaa deriyaappe bare geeshsha sa’aa yeedda.

18 Omoodetteedda darotuwaa akkiide,

I pude d’ok’k’aa keseedda.✝

Asaappe, haray atto makkalanchcha asaappekka imuwaa akkeedda.

Med’etaa Ubbaa Goday yaan de’ana.

19 Gallassaan gallassaan nu tookuwaa tookkiyaa Goday,

nuuna ashiyaa S’oossay galatetto.

20 Ee, nu S’oossay nuuna ashshiyaa S’oossaattee!

Hayk’k’uwaappe attiyaawe,

Ubbaa Mooddiyaa Med’inaa Goday ashshinada.

21 S’oossay tumuwaappe bare morkkatuwaa,

guuggiyaa kinchchana;

nagaraa ogiyaan hamettiyaa,

goofaranchchatuwaa huup’iyaa p’alk’k’ana.

22 Goday yaageedda; «Taani hintte morkkatuwaa,

Baasaaneppe zaaraadde ahana;

taani unttuntta c’iimmo abbaa giddoppe kessaade guyye ahana.

23 Hewenne, neeni ne morkkatuwaa,

suutsaa gidduwaana c’olbbaya yed’d’aade hamettanaassanne;

ne kanatuukka morkkiyaa suutsaappe,

barenttu gishuwaa ins’s’arssan laac’c’anaassa» yaageedda.

24 Abeet S’oossaw, ne salppii,

ta S’oossaa ta kaatiyaa salppii,

Geeshsha Golliyaa geliyaa wode ubbaw beettee.

25 Yes’s’iyaawanttu sintsaana; diis’s’iyaawanttu guyyenna;

k’ay karabuwaa bak’k’iyaa wodorotuu gidduwaana.

26 Unttunttu, «S’oossaa kuntseedda shiik’uwaan galatite;

hinttenoo, Israa’eeliyaa zeretsatoo,

Med’inaa Godaa galatite» yaagiino.

27 He salppiyaan ubbaappe teefatiyaa,

Biiniyaama zaratuu koyiro beettiino.

Kaalliide Yihudaa kaappatuu barenttu c’itaana de’iino;

wurssetsan Zaabiloona Kaappatuunne Nifttaaleema kaappatuu beettiino.

28 Abeet S’oossaw, ne wolk’k’aa k’onc’c’issa.

Abeet nuw ootseedda S’oossaw,

ne minotetsaa bessa.

29 Hewaa diraw, Yerusaalamen de’iyaa

ne Geeshsha Golliyaa kaatetuu yiide,

new imotaa immana.

30 Do’aadan mak’k’aa giddon de’iyaa Gibs’e asatuwaa neeni seera.

Booratuwaanne maratuwaa wudiyaa,

malatiyaa kawutetsatuwaa neeni yederssa.

Unttunttu gulbbatiide, barenttu biraa new immana gakkanaw,

neeni unttuntta seera.

Olettanaw yeemottiyaa asatuwaa laala.

31 Kiitetteedda kaappatuu Gibs’eppe yaana;

Top’p’ata bare kushiyaa elle S’oossaakko mic’c’ana.

32 Hinttenoo, sa’aa kawutetsatoo,

S’oossaw yes’s’ite;

33 salotuwaan, benippe de’iyaa salotuwaan biyaa Godaa sabbite.

Sisite! I bare kooshshaa,

bare wolk’k’aama guntsaa kiittee.

34 S’oossaa wolk’k’aabaa awaayite;

Aa anggay Israa’eeliyaa bollaanna;

Aa wolk’k’aykka saluwaana.

35 S’oossay bare Geeshsha Golliyaappe k’onc’c’oode, Maalalisee.

Israa’eeliyaa S’oossay bare asaw minotetsaanne wolk’k’aa immee.

Med’inaa Goday galatetto.