1 Abeet S’oossaw, neeni nuuna med’inaw ayaw aggaadii?

Ne hank’k’uu ne k’ooruwaan de’iyaa dorssatuwaa bolla,

ayaw suulleedee?

2 Neeni beni dooreedda asaa, neeni

new buzo ootsaade wozeedda zaratuwaa hassaya.

Neeni de’eedda S’iyoone deriyaa k’oppa.

3 Ane ne Geeshsha Gollii koleteedda sa’aa yaade s’eella.

Morkketuu aani de’iyaabaa ubbaa d’aysseeddino.

4 Ne morkketuu ne Geeshsha Golliyaa giddon,

«Nuuni s’ooneeddo» yaagiide gereereeddino.

S’oonuwaa malaataa yaagiide, barenttu banddiraa esseeddino.

5 Unttunttu mitsaa k’ans’s’anaw barenttu kalttaa,

d’ok’k’u ootsiide, ek’k’eedda asatuwaadan haneeddino.

6 Unttunttu masetteedda sank’k’aa ubbaa,

barenttu kalttaaninne madooshaaninne mentsi yeggeeddino.

7 Geeshsha Golliyaa taman s’uuggiide d’ayisseeddino;

new goyinniyaa sa’aa tunisseeddino.

8 Barenttu wozanaan, «Unttuntta nuuni,

ubbaanna d’ayssana» yaagiide k’oppeeddino.

Biittan Asay S’oossaw goyinniyaa sa’aa ubbaa taman s’uuggeeddino.

9 He wode mallay nuw imettennan is’s’eedda;

timbbitiyaa odiyaawe ittuunne baawa.

Hawaadan haniide, woyissa wodiyaa de’anentto,

eriyaa Asay nu giddon ittuunne baawa.

10 Abeet S’oossaw, ne morkketuu,

woyissa wodiyaa ne bolla k’iliic’anee?

Unttunttu ne suntsaa med’inaw borannee?

11 Ne kushiyaa shiishsha akkaade ayaw gam"ay?

Ne ushechcha kushiyaa ne k’umayuwaappe kessaade unttuntta d’ayssa.

12 Gidooppenne, abeet S’oossaw,

neeni benippekka ta kaatiyaa;

neeni biittaa bolla atotetsaa ahaada.

13 Ne wolk’k’aama wolk’k’aan neeni abbaa shaakkaadda;

Aa giddon de’iyaa dawiyaa huup’iyaa neeni k’os’s’aadda.

14 Leewaataana giyaa dawiyaa huup’iyaa k’os’s’aade,

Aa ashuwaa bazzuwaan de’iyaa med’etatoo,

k’uma ootsaade immeeddawe neena.✝

15 Neeni pulttotuwaa dooyaa yeddaadda;

ubbaa gede goggiyaa shaafatuwaa k’ay melissaadda.

16 Gallassay newaa; k’ammaykka newaa;

k’ay awaanne aginaa unttunttu sa’aan wotseeddawe neena.

17 Biittaw zawaa wotseeddawe,

balgguwaanne boniyaa med’eeddawe neena.

18 Shin abeet Med’inaa Godaw, ne morkketuu,

neena wooti k’iliic’eeddinontto,

booza asatuu ne suntsaa wooti boreeddinontto hassaya.

19 New moodettiyaawanttu shemppuwaa

iita morkketoo aatsaade immoppa.

Metootanchchatuwaa med’inaw dogoppa.

20 Nu biittan de’iyaa d’uma sa’ay ubbay,

makkalanchchatuwaan kumeedda diraw,

neeni nuw c’aak’k’eedda c’aak’uwaa k’oppa.

21 Naak’etteeddawantta yeellayoppa;

hiyyeesatuunne metootanchchatuu ne suntsaa galatino.

22 Abeet S’oossaw, dendda; ne yewuwaa mootetta.

Gezo asatuu gallassaa ubbaan,

ne bolla k’iliic’eeddawaa hassaya.

23 Ne morkketuu ne bolla waassiyaa waasuwaanne

neena is’s’iyaawanttu,

pac’i bayinnan k’iliic’iyaa k’iliic’uwaa dogoppa.