Evangelium Matäus 14

Jesus jeit oppem Wota

22 Dan fuaz bedwunk Jesus siene Jinja, en daut Schepp to stieen un ver Am no de aundre Sied to foaren, bat Hee de Volkjshäaden entloten haud. 23 Un aus Hee de Volkjshäaden entloten haud, jinkj Hee opp dän Boajch, om auleen to bäden; un aus daut Owent wort, wia Hee doa auleen. 24 Oba daut Schepp wia aul medden oppem Mäa, un must Noot lieden von de Walen, wiels de Wint wia äant jäajenaun. 25 Oba en de vieede Nachtwoak*14:25 von Klock 3 bat 6 zemorjes. kjeem Jesus no äant un jinkj oppem Mäa. 26 Oba aus de Jinja Am sagen oppem Mäa gonen, veschrocken see un säden: Daut es een Jespanst! un schrieejen ut Angst. 27 Oba dan räd Jesus fuaz met äant un säd: Siet jetroost, dit sie Ekj; enjst junt nich! 28 Petrus auntwuad un säd: Har, wan Du daut best, dan befäl mie no Die to komen opp daut Wota. 29 Un Hee säd: Komm! Un Petrus stieech ut daut Boot rut un jinkj opp daut Wota no Jesus opptoo. 30 Oba aus hee dän stoakjen Wint sach, enjst hee sikj; un aus hee aunfunk to sinkjen, schrieech hee un säd: Har, rad mie! 31 Jesus strakjt fuaz de Haunt ut, pakt am aun un säd to am: Oo du Kjliengloowscha, wuarom twiewelsd du? 32 Un aus see en daut Schepp nenstieejen, läd sikj de Wint. 33 Un dee, waut em Schepp wieren, kjeemen un follen ver Am dol un säden: Du best woarhauftich Gott sien Sän!