Mateus 15

Eene kanaanitische Fru äa Gloowen

21 Un Jesus jinkj von doa wajch un jinkj en de Jäajenden von Tierus un Sidon. 22 Un kjikj, eene kanaanitische Fru kjeem von dee Jäajenden un schrieech no Am un säd: Erboarm Die äwa mie, Har, du David sien Sän! Miene Dochta es oajch besäten. 23 Oba Hee auntwuad ar kjeen Wuat. Dan kjeemen siene Jinja, prachaden Am un säden: Lot ar gonen, wiels see schricht ons hinjaraun. 24 Hee oba auntwuad un säd: Ekj sie nich jeschekjt, aus bloos no de veloarne Schop vom Hus Israel. 25 See kjeem oba un foll ver Am dol un säd: Har, halp mie! 26 Hee oba auntwuad un säd: Daut es nich goot, daut eena de Kjinja äa Broot nemt un schmitt daut ver de Hunjkjes. 27 Oba see säd: Jo, Har, un doch äten de Hunjkjes de Kjreemels, waut von äare Haren äa Desch faulen. 28 Dan auntwuad Jesus un säd to ar: Oo Fru, dien Gloowen es groot; die saul daut woaren, waut du velangst. Un äare Dochta wort en deeselwje Stund jesunt.